4
'Uki mɨnaki'eriwa
1 Kwinie yemekɨ pepɨti'ɨimari 'uka nemɨmatsinaki'erie.
Witsipepɨti'axexeiya.
'Ahuxite 'ixuriki pemeukuwera warita, kukuruxi memeutuxa mepɨhɨkɨ.
'Akɨpate tsipuri xeitewayari memeuyɨyɨwi wahepaɨ pɨtiyuxexeiya
Karaha hɨriyaritsie memu'uwa.
2 'Atamete muxatsi hekwamekɨ memutixikieni hepaɨ pɨtiyuxexeiya,
xike memanatikɨ me'uka'ɨyarieka.
Yuxexuitɨ mɨkɨ yu'iwama mepuwarexeiya,
xewitɨ pɨkayuxaɨta.
3 'Ateni hɨiyame mɨxeta hepaɨ pɨtiyuxexeiya,
'aniuki pɨnetsihehana.
'A'aurite 'ixuriki pemeukuwera warita,
xikɨti hixɨata mɨxitekieka hepaɨ pɨtiyuxexeiya.
4 'Akɨipi Rawiri tuxiyuya hepaɨ pɨtiyuxexeiya,
tetexi mɨxitekietɨkakɨ mɨwewiya,
hetsiena pukuwɨ xeimiriyari kɨmana memɨyukunarɨma,
kuyaxi memɨyukunarɨma mɨkɨ naitɨ pɨhɨkɨ.
5 'Atsitsi yuhutatɨ maxatsi yeutari wahepaɨ mepɨteyuxexeiya,
'ɨimari niwemama yuhutame muwarayexei
memɨtekwatɨwe tuturi texuxuritsata.
6 'Akuxi kakɨyɨriwekaku,
'akuxi 'etɨri katipariwekaku,
nekananutiyeimɨkɨ mixaxi yemuriyaritsie,
meta 'ɨkwa witsimu'ɨa hɨriyaritsie.
7 Naitɨ 'ekɨ witsipepɨ'ane, 'uka nemɨmatsinaki'erie,
naitɨ 'aixɨa pepɨ'ane.
8 Hikɨmɨ tepanukakɨne Riwanu hɨriyaritsie, 'uka nemɨmatsihɨawene,
Hikɨmɨ tepanukakɨne Riwanutsie.
Kenanakaye'a 'Amaná hɨriyari 'amanutitewitsie,
Tsenixi meta Heximuni yekɨrita.
Kenanakaye'a hakewa mayetsi meme'uwatsie,
mɨkɨ hɨritsie hakewa tɨwexi memayu'eririya wakietsie.
9 Ne'iyari pepɨhɨa,
ne'iwa 'uka nemetsihahɨawe,
xeihɨxiyarikɨtɨtɨ penetsi'uxeiyaku,
'akuka xeiwiwierikɨ
ne'iyari pepɨhɨa.
10 Kwinie yemekɨ witsipa'ane 'anaki'eriya,
ne'iwa 'uka nemetsihɨawene.
Matsi witsipa'ane 'anaki'eriya, winu kemɨkaha'ane,
meta pemuyutawiriwa witsimu'ɨa
tixaɨtɨ kemɨkatiɨ'ɨa hepaɨ pepɨ'ɨa.
11 'Uka nemetsihahɨawe, 'atenitsie xiete payeneika,
retsi meta xiete 'anenitɨa pepɨ'awieta.
Riwanu kemu'ɨa
mɨpaɨta pɨ'ɨatɨka 'akamixate.
12 Haraweri tuturi muwa'etsie mɨreuname pekanihɨkɨtɨni,
ne'iwa 'uka nemetsihahɨawe,
haraweri tuturi muwa'etsie mɨreuname meta haixa manukaname pekanihɨkɨtɨni.
13 'Atsitsi xeiharaweriyari pɨhɨkɨtɨka xikɨti muwa'etsie,
witsi'anenetɨ 'ikwaxi,
tuturiyari naaru meta hatsahaxi,
14 naitɨ kɨyexi muwatsuayatɨka witsimu'ɨatɨka,
naaru meta 'atsapɨrani,
karamu meta kanera,
mixaxi meta 'aruhe,
witsimɨti'anene xeikɨa naitɨ.
15 'Ekɨ haa pekanihɨkɨtɨni harawerita mieme,
haixa haa mayenierenikɨ mɨ'ayumieme mexeiya pekanihɨkɨtɨni,
haa 'akiyari pekanihɨkɨtɨni Riwanu makanena.
'Uka mɨnaki'eriwa
16 Kenanutanieri, 'eka tayeta mieme.
'Eka tatsutɨa mieme, niwa kenaye'a.
Neharawerita xekeneuka'ekawi,
witsikemɨtiuye'ɨa xekeneutawiwiexɨa.
Yuharawerita 'uki neminaki'erie kehamieni
muwa mieme 'ikwaxi witsima'ane keha'inɨata.