3
'Awakuxi kemɨtiyutanenewi
1 'Awakuxi Kakaɨyari niukameya nenewierieya. Mɨpaɨ katiniukwikarieni.
2 Yawé, ke'aixɨa pemɨtikuxaxatsiwa nekatinimarieka,
tita pemɨtiutiwewi, Yawé, mɨkɨkɨ nepɨma.
Hikɨta yaketineuyuri hekwamekɨ tame te'u'uwakaku,
hikɨta tahetsiemieme yaketineuyuri temixeiyakɨ,
'ahaxɨatsie, kepemɨti'akanenimaya kena'eriwani.
3 Kakaɨyari Temani mɨrayetewatsie kanayemieni,
Parani hɨriyaritsie Mɨpatsie kanakamieni.
Tepɨ'uxipieni
Xawatɨriyayakɨ muyuawitsie naitɨ puxawatɨ
meta kwiepa naitsarie 'aixɨa pɨrahɨawarɨwa.
4 Xawatɨriyaya merɨkariya hepaɨ pɨtiyuxexeiya,
mamateyatsie mimierɨkari kaneuneikatɨkani,
mɨkɨ warita tɨrɨkariyaya kaniyu'awietani.
5 Kwiniya mɨyatɨ hɨxiena kananuyekani,
tai kaniweiyani 'utɨmana.
6 Kepauka muwakeka, kwie kaniutimamaweni,
kepauka mɨtaneniere, nuiwarite mekaniutiyɨyɨakani.
Meripaitɨ mieme hɨrite kanikapenikeni
meta yemurite meripaitɨ miemete kanati'unikeni,
matsi Kakaɨyari huyeteya yuheyemekɨ 'atsipɨkayɨwe.
7 Nekaniwaxeiyani meyuhiweriekame Kutsani mɨrakutewa memɨkutei,
meta Mariyani memɨkutei mekaniuyɨyɨakatɨkani.
8 ¿Petiha'akai, Yawé, kepauka pemiwa hatɨate?
¿Petiha'akai haa mɨtɨrɨkawi hepaɨtsita?
¿Waɨkawa petiha'akai haramara hepaɨtsita
'ayumieme 'akawayutsixi wahetsie peranutiya,
meta 'akaxetate kuyaxa miemete memɨtehayu'iwa wahetsie?
9 'Atupi 'ari pepuhekɨataxɨ,
'ɨrɨ peputahɨniyaxɨ 'i'uitɨwameta.
Tepɨ'uxipieni
Kwie hetsie hatɨate pekaniukatuani,
10 hɨrite mematsixeiyatɨ mekaniutimamani.
Waɨkawa wiyeri 'ekamatɨ kaniukaxɨrieni,
meta hamewari 'amatiyewatsie mieme kaniuyutihaxɨatɨwani, hamewariyari 'anenetɨ muyuawitsie paitɨ kaneutimemeni.
11 Tau meta metseri matɨa muyuawitsie kanewa'uweni,
'a'ɨrɨte kwinie mayɨwawe xawatɨriyayakɨ,
'apitsika 'amɨtewi xawatɨriyayakɨ.
12 Peha'atɨ, naitsarie kwiepa pekaniuyeikani,
waɨkawa peha'atɨ, nuiwarite pekaniwatipɨnani.
13 Pekanayeyani 'ateɨterima pewaxɨnake,
pekanayeyani pemenayexei 'ahetsiemieme petawikweitsitɨanike.
Ti'aitame pekaniutapɨna 'axateyuruwamete wanuiwari mɨhɨkɨtɨkai,
maweme pekaniuhayewa 'ɨkateyatsie katsutɨme mu'uyatsie 'u'akame.
Tepɨ'uxipieni
14 'Apitsika 'amɨtewikɨ kuyaximama wamu'ute pekananutixɨriexɨani,
meha'atɨ mekatanitaxɨriexɨakukaitɨni,
meyutemamawietɨ tahetsie kwinie netɨ mekaniukeni,
mɨkayuhɨawexɨa kemɨ'itɨariwa hepaɨ.
15 Haramara pekaniutaketsini 'akawayutsixi wahekɨ,
pewatayuitɨwatɨ haa mɨmariwe.
16 Kepauka 'ikɨ nemɨtiu'eni, netaɨta nekaniutimani,
niukieyakɨ, netenite kaniutiyɨyɨaka,
ne'umete mutikwaire hepaɨ nepɨreka'erietɨya,
meta ne'ɨkate putiweranaxɨa.
Peru ne netiukanewietɨ nekanita'ikwewani
kepauka 'uximatɨarika tukari
munuani 'iya nuiwari wahetsie hikɨ memɨtatsika'una.
17 Tsepanetɨ xapa mɨka'ukaxutuwe,
meta tsepa kaxie takari mɨka'ukayaxikeni,
tsepa huriwu takari mɨkatiukaxuawerixɨ,
meta kwiepa tsepa 'ikwaxite mɨkatiutixuawerixɨ,
tsepanetɨ muxatsi kuraruta memuyemaweni,
meta tsepa kuraruta nixewitɨ tewa mɨkayeyeika,
18 tsepanetɨ mɨpaɨ mɨti'ane, ne Yawé hetsie nekaniyutemawiekamɨkɨ,
nepɨnetemawieka Kakaɨyari hetsie netiwiyatɨ, netsiwikweitsitɨwame.
19 Yawé naimekɨmɨyɨwe netɨrɨkariya kanihɨkɨtɨni,
maxa kemayɨwe mɨpaɨ ne'ɨkate katinipitɨaka
meta 'ameutitewatsie paitɨ ne'uyeikame kanenayeitɨwani.
Teyuitɨwamete wa'ukiyari. 'Ikɨ kanaritekɨ ke'utakwikarieni.