2
1 Netanieretɨ nekaniyuhayewamɨkɨ,
wapaitɨ nenieremetsie ne'akakaitɨ,
nepɨta'ikwewani kemɨnetitahɨawe,
kemɨnetita'eiya mɨyanemɨtitahɨawixɨkɨ.
Yawé kemɨtiuta'a
2 Hikɨ Yawé mɨpaɨ kanetiniuta'eiya:
«Kepemɨtiunierixɨ ketinaka'utɨa,
yuhekɨakamekɨ haxu 'etsitsutsuimetsie
para xeiya mekaterɨwa mɨyɨwenikɨ.
3 Karikɨ kepemɨtiunierixɨ yakatiniyɨmɨkɨ yemekɨ kepauka tukaritsie yamɨtiyɨnikekai,
tukari kaniyemieni maye'anikɨ, mɨkɨ tukari pɨkahayewarieni mɨka'aye'anikɨ.
Tsepanetɨ 'amɨreɨtewini yakatiyɨwetɨ, keneta'ikwewani,
mɨkɨ tukari kanaye'amɨkɨ kahauyewekamekɨ.
4 »Memuyuti'ɨre 'iyari heitseriekame mepɨkahexeiya,
peru kemɨtiheitserie 'amuyeika yuri mɨti'eriekɨ payeyurini.
5 Matsi, xikutɨriya pɨtiyu'itaiya,
'ayumieme memuyuti'ɨre 'amepɨkateheutere.
Yukɨipitsie 'emepanatiyeyeure, mɨki teukiya hepaɨ,
meta mepɨkahuxaiwawe mɨki yɨwikame hepaɨ.
Yu'aurie yunaime nuiwarite mekaniwarukuxexeɨriwani
meta yunaime teɨteri mekaniwarehapanani.
6 Peru mɨkɨ hatsuakutɨni tixaɨtɨ mepɨkatehayeitɨarieni.
Nuiwarite mepɨwatinanaimani hikɨ 'ikɨ kwikari wahetsiemieme mepɨtakwika:
»Xɨa'ui waɨkawa rexeiyatɨ mayuyeitɨa hipame tiwapiinitekɨ,
meta piinitɨarika waɨkawa mɨtiukuxeɨri 'itarikakɨ.
¿Kepaukakeri pɨtihayewa mɨyatiyurienetɨ?
7 Yapauka mekananuku'uikuni memɨmetehapinirie.
Memetsi'aye'unietɨ mekanakɨnikuni tinaime mekameteninawairiekuni tita pemɨrexeiya,
mexi 'ekɨ pe'uyɨyɨakani pekatɨrɨkaɨyetɨ.
8 Nuiwarite mekaniyumɨireni pemɨtiwarunawatsiri,
keyupaɨmetɨ teɨteri memɨyutawikweitsitɨani mɨkɨta mepɨmetenawatsirieni,
mɨmɨirekɨ xuriya pemutayeuri,
meta 'ikɨ kwie hetsie waɨkawamekɨ pemɨtiunanaimakɨ,
meta 'ikɨ kiekari hetsie meta mana kiekatari pemɨwarunanaimakɨ.
9 »Xɨa'ui kemɨ'ane yukiita mɨtihɨniya kwamanarikakɨ rana'iwaka
yuniwema watawikweitsitɨanike
wahetsie mɨkatinakenikɨ 'axamɨti'ane.
10 »Kepemɨtiu'eri 'akie kiekatari pepɨwarutewiyatsitɨa xeikɨa:
yumɨireme nuiwarite pepɨwareuyehɨa,
peru 'ekɨtɨtɨ pepɨ'ayuri.
11 'Ayumieme tetexitɨtɨ kuraru 'amatayewa hetsiemiemete mepahiwatɨka,
meta kii pikaxiyaritetsie puwa'eiya wahiwari.
12 »Xɨa'ui kemɨ'ane kiekari mutawewiwa hipame wakwitɨ
meta kemɨ'ane kiekari mukama hipame wananaimatɨ.
13 Yawé Naimekɨmɨtɨrɨkaɨye mɨpaɨ kanaineni,
teɨteri tai hetsiemieme mekete'uximayaka
meta nuiwarite yakɨ xeikɨa meketeyu'uxitɨaka.
14 Haa haramara kemɨranukanama hepaɨ,
mɨpaɨta kwie hetsie mekateniyɨkuni
teɨteri Yawé tɨrɨkariyaya memaitɨ.
15 »Xɨa'ui 'ekɨ, 'a'iwa pemutitawaitɨwa.
Xɨa'ui 'ekɨ, winukɨ pemititawaitɨwa
waiyarieya maweme pexeiyamɨtɨ.
16 Mɨkɨkɨ pepɨtewiyatsitɨarieni pɨta, hawaikɨ witsipepɨkatixeiyarieni.
Kamɨtsɨ 'ekɨta kenanu'i, pemɨwaxeitsitɨanikɨ xitekiya 'inɨariyari kepemɨkarexeiya.
Yawé yutekɨxi yutseriekɨ mehana 'ahetsie ke'itiyeurieni,
meta witsikepemɨtixeiyariekai hetsiemieme, tewiyarika kematsi'upitɨani.
17 Riwanu hepaɨtsita kepemɨtiunanaima mɨkɨta kematsi'utapɨna.
Tewaxi kepemɨtiwareuyehɨa mɨpaɨta peketiuka'unarieni.
Karikɨ kanimɨireni xuriya pemitayeuri,
meta pɨwaɨkawa 'ikɨ kwie hepaɨtsita kepemɨtiunanaima,
meta 'ikɨ kiekari hetsie meta teɨterimama.
18 »¿Tita tiyunaki'erie kakaɨyari mɨwewiya,
kemɨ'ane mitawewi tewi kɨyekɨ tiwewiwame xɨka hɨkɨtɨni?
¿Tita tiyunaki'erie kakaɨyari mukwaxiyarie,
'itarika xeikɨa mɨti'ɨkita?
Tiwewiwame kakaɨyarixi mɨwawewie mekaniuwaweme
mɨkɨ xeikɨa yuri katini'erieka yuwewiyatsie.
19 Xɨa'ui kemɨ'ane kɨye mɨpaɨ mɨtikɨhɨawe: “Kenanutanieri”,
meta tete mɨkaniuwe: “Kenanukukexi”.
Tsepanetɨ huru meta pɨrata memɨkawiriyarietɨka,
tixaɨtɨ memɨxete'uta'ɨkitɨani mepɨkayɨwawe,
memɨkahayeyuyurikɨ.
20 Peru, Yawé yutuki muyepatsieta kanayekani,
naitsarie kwiepa mɨtiuyehane hɨxiena kayuwatɨ meke'umaka».