'Awakuxi
1
1 'Ikɨ kemɨtiyɨni niukiyari kanihɨkɨtɨni 'Awakuxi Kakaɨyari niukameya kemɨtiunieritɨarie.
'Awakuxi Kakaɨyari kemɨtiutahɨawixɨ
2 Yawé, ne'utahiwatɨ parewiya nepɨmatsiwawirie,
peru 'ekɨ pepɨkanetsi'enie,
¿Kepaukakeri pepɨnetsihanu'enieni?
Waɨkawamekɨ nepɨmatsiwawiriekai mukumawerekɨ ketemɨtenanaimarie, peru 'ekɨ 'atsipepɨkara'eriwa.
3 ¿Titayari penetixeiyatsitɨa hipatɨ kememɨtenanaimarie?
¿Titayari netiwaxeiyani hipatɨ kememɨtehiweritɨarie?
Naitsarie nepɨtixeiya kememɨteyuka'una meta kememɨteyunanaima,
kememɨteyukwitɨwe meta kememɨte'ayuye'unie.
4 Nixewitɨ 'a'aitsika hetsie yapɨkatikamie
meta nixewitɨ kemɨtiheitserie yapɨkatikamie yu'iwa hetsɨa.
'Axamemɨte'u'iyari kemɨtiheitserie memɨte'u'uwa mekaniwananaimaka,
meta 'itsɨkame kemɨtiheitserie yapɨka'utaine.
Yawé kemɨtiuta'a
5 «Xekeniwaruxeiya nuiwarite.
Kwixekeniwaruxeiya meta xemamatɨ xekeneuyuhayewa.
'Ikɨ tukariyaritetsie yanepɨtiyurixime tixaɨtɨ yaxemɨkateha'eriwa
tsepa xewitɨ mɨpaɨ mɨtixe'uxatɨa yuri xepɨkate'erieka.
6 Karireutsixi nekaniwayuitɨamɨkɨ,
mɨkɨ teɨteri memayu'eririya memɨhɨkɨ meta memɨtɨrɨkawi,
naitsarie kwiepa memuku'uwa
hipame wakwie yuhetsiemieme meyeitɨakutɨ.
7 Mɨkɨ teɨteri mepɨmamariwawe meta mepɨmakaxiwa,
yu'inɨari niukiyaritsie xeikɨa yamekatenikahuni.
8 Wakawayutsixi tɨwexi wareuyeta mepayɨwawe,
'ɨrawetsixi tɨkakɨta miemete wareuyeta mepɨte'u'iyari.
Kawayutsixi wahetsie me'utetɨ yumɨiretɨ meputinanautsa,
memutei 'atewapaitɨ mepaneika.
Wirɨkɨxi kememɨte'uxɨrɨwe memɨtetakwanitsie mɨpaɨ mekateniyumateni.
9 Mekani'axɨakuni naime meteye'unarɨmetɨ,
memɨyehunitsie marika puxuaweni,
memɨwaranutaxɨrɨwa xiekari mɨranukutuiwa hepaɨ mekateniwaruxexeɨriwani.
10 Te'aitamete mekaniwatewiyatsitɨaka,
kuwexinaruritsixi mekaniwananaimaka,
mekaniutinaweni kiekari yukuraru 'amatitetewa memexeiyatɨka wahepaɨtsita,
xiekari 'imɨmɨiyari mekaniutiwewiwani, hikɨ kiekaritsie mekaneutahakeni.
11 'Eka naime mɨtiye'unatɨyeika hepaɨ mekani'aneni,
peru waɨkawa 'axamekateniuyurieni, yutɨrɨkariyatɨme yukakaɨyari memayeitɨakɨ».
Hutarieka 'Awakuxi Kakaɨyari kemɨtiutahɨawixɨ
12 'Ekɨ, Yawé, yuheyemekɨ 'apekaniuyeikani.
'Ekɨ, nekakaɨyari pemɨpatsie, hatsuakutɨma pemɨkamɨwe pekanihɨkɨtɨni.
'Ekɨ, Yawé, kemɨtiheitserie memɨteyurienikɨ pepɨwa'atɨani,
'ekɨ, ne'ai, pekaniwa'atɨamɨkɨ memɨtatsi'ayemari'itɨanikɨ.
13 'Ahɨxite yemekɨ pɨ'itiyatɨka 'axamɨti'ane pepɨkareuxeiyawe,
pepɨkayɨwe pemɨwaxeiyani hipatɨ menanaimariekaku.
¿Titayari kamɨtsɨ 'axamemɨte'u'iyari 'atsipekatiwayuriwe?
¿Titayari kayuwatɨ petiuma
mexi 'axamemɨte'u'iyari 'aixɨa memɨte'u'uwa mewakwa'a?
14 Teɨteri tsapari haramaratsie memɨye'uwa pepɨwarayeitɨa,
kwiepa yuhukama memɨteku'uwa memɨkatehekakutsiyari pepɨwarayeitɨa.
15 Wawiruniya yukwaitsɨkɨ yunaime kaniwaranatihapanani,
yuwipitekɨ yunaime kaniwakuyuruwani,
yu'ataxayakɨ kaniwaranatitutuweni,
mɨpaɨ meteyurietɨ mekaniyutemamawieka.
16 'Ayumieme wawiruniyutsixi yu'ixiparate yukakaɨyari mekanayeitɨwani,
meta mekaniwarayexeiyani.
'Ixiparate waparewiekaku
waɨkawa xikutsixi mekanayexɨrieni.
17 ¿Kamɨtsɨ petiwapitɨaka yuheyemekɨ mɨpaɨ memɨteyurieka?
¿Yuheyemekɨ metehayu'iwani hipame wakiekaritsie metahaketɨ mewakwitɨ mekawanenimayatɨ?