3
Niniwe kemɨtika'unarieni
1 Xɨa'ui, kiekari xuriya pemɨtayeuriwa,
'itarikakɨ pemɨhɨne,
pemɨkatihayewa 'inawarikɨ,
meta pemɨkatihayewamɨkɨ pe'amienetɨ.
2 Kaunari 'iwaɨyɨpame yuariyaya kana'eniɨriɨkɨni,
meta kaxeta 'ɨkateya yuariyari,
kawayutsixi watɨranari,
kaxetate wayuariya,
3 kawayutsixi wanautsari,
putimerɨka wa'ixiparate,
pitsikate putixawatɨre,
mepɨyumɨire mɨkite,
kaxarite pukuxeɨrietɨka,
kaxarite naitsarie kaneutiheni,
yunaitɨ wahetsie mekanekaxɨrɨweni.
4 'Ikɨ naitɨ mɨyakatiniuyɨni waɨkawamexɨa muyutuakɨ,
mɨkɨ 'ukaratsi tuminikɨ muyumayɨinɨa witsimɨti'ɨimari,
mɨkɨ mɨrakumate kemɨtiwaru'irɨwiya.
Kiekarite katiniwaru'irɨwiya wahamatɨa 'ukahuputɨ,
meta nuiwarite wakewaiyatɨ.
5 «Ne nematsi'aye'unietɨ 'ena nekaniuweni
—Yawé Naimekɨmɨtɨrɨkaɨye mɨpaɨ kanaineni—.
'Ahɨxie paitɨ 'a'iwi nenitihanimɨkɨ,
nuiwarite memɨmatsixeiyakɨ kepemɨtimawe,
meta te'aitamete 'atewiyarika memɨxeiyakɨ.
6 Mɨkati'itiya nekamanikawirimɨkɨ,
nepɨmatsitewiyatsitɨani teɨteri wahɨxie nepɨmatsihɨani.
7 Yunaitɨ memɨmatsixeiya mekaniyuta'unaxɨakuni,
mɨpaɨ menitiyuakuni: “Niniwe 'ari kaniuka'unarieni.
¿Kemɨ'ane puyuhiwerieka hetsiena mieme?”
¿Hakewa nepeikaxeiya kemɨ'ane minɨtɨani?»
Niniwe yuheyemekɨ kemɨtika'unarieni
8 ¿Kamɨtsɨ 'ekɨ matsi 'aixɨa peti'ane keyuri Tewatsi,
kiekari haa hixɨapa mɨyema,
Niru hatɨayari manuyehane 'aurie mukuma,
haramara hetsiena munua mayeitɨa
meta haa yukuraru mayeitɨa?
9 Kutsi meta 'Ekipitu mepiparewiekai yemekɨ,
Puti meta Riwiya meminɨ'ɨ mepɨhɨkɨtɨkai.
10 Mɨyatɨtɨ, Tewatsi kiekariyari kanehanieni 'ateewa,
'ateewa paitɨ kananutahɨiyani.
Niwemama mekaniutitetseweiyani
kaye 'itsikinayaritsie.
Teɨterimama waɨkawa memeuka'u meniyuta'iwirieni,
meta mekaniwarutihɨani teɨteri wa'ukiyarima.
11 Yaxeikɨata 'ekɨ, Niniwe, pekanititawaimɨkɨ,
peka'uka'iyaritɨ pekanayeimɨkɨ
Yaxeikɨata 'ekɨ, mɨmatsi'aye'unie pemakatɨ,
pekanitiwaumɨkɨ hakewa peme'ati'awieta.
12 'Akuraru 'amatitewa piní kanihɨkɨtɨni
mexɨakame mieme takari mɨkwakwaxi:
xɨka 'utakatsieni,
kemɨ'ane mitikwani teta kaneukaxɨrɨweni.
13 Neuxei, kepauka memɨwaraye'unie memɨwatakwinitsie
'akuyaxima 'ukarawetsixi wahepaɨ mekaniyɨaka.
'Akwieyaritsie mieme 'ituparite heuyepietɨkaitɨ huhutatɨ kaniyuhayewamɨkɨ,
karikɨ kɨmana mɨreunamirikekai tai kanitixɨtsitɨamɨkɨ.
Yakɨ xeikɨa kemɨtiukuxeɨri
14 Haa waɨkawa keneuxeɨri kuyaxi 'awarita memaketɨkɨnetsie mieme,
'akuraru 'akenatitɨriya.
Haxupa kenekakexi, 'a'ɨkakɨ haxu 'aixɨa keneuyuri
meta xɨnariya keneutiwewi.
15 Mana kwitɨ tai kamenitaxɨtsitɨamɨkɨ
meta 'ixiparakɨ pekanimieriemɨkɨ,
mɨmatsi'aye'unie 'utsika mɨtikɨme hepaɨ kametinikwaimɨkɨ.
Kene'amɨiriyani 'utsikari wahepaɨ
meta kene'axiɨtɨaka tekɨmemete wahepaɨ.
16 Tetuayamete 'ahetsɨa miemete pepɨwarutimɨiriyaxɨ
xurawetsixi wareuyeta meyupaɨmeme
17 Matsiparewiwamete 'utsikari wahepaɨ mekani'aneni
meta 'aparatsiyuta te'uximayatamete, 'etsimemɨtepepe memɨka'u'umeyari wahepaɨ,
muhaɨtɨnitsie 'ixumeri 'amɨtɨtɨ hetsie menikayaxikeni,
matsi tau manatinenitsie mekaniyuta'unani,
xewitɨtɨma pɨkatimate hakewa memeyuti'awietaxɨa wataxeiyake.
18 'Atsiriyatsie ti'aitame,
'amuxatsi wahɨwemete karima meneukutsu,
'akuyaxima pemɨwaranayexie meneukutsixɨani.
'Ateɨterima hɨritetsie meneutaxɨriyaxɨani,
pumawe xewitɨ muwakuxeɨrienikɨ.
19 Kepemɨtiukakukuine 'uayeyari pumawe,
'ahaiya pɨkayu'uayemarinɨa.
Yunaitɨ memɨtehetimani kepemɨranuyetɨakɨ,
'ixɨarari mekaniwewikuni ke'axapemɨranuyetɨa hepaɨtsita.
¿Kemɨ'ane nutsɨ puyuhayewaxɨ katiuka'eniexɨaka
waɨkawamekɨ 'axamɨti'ane hepaɨtsita? Nixewitɨ.