'Akehuxi
1
Matɨari Kakaɨyari kemutayɨ: Kememɨte'aye'eritɨarie tuki tawari memanukuketɨanikɨ
1 Merikɨtsɨ Raríyu ti'aitakaku hutarieka wiyari, 'ataxewi metseri 'umiekaku mexɨakame tukaritsie, Yawé niukieya kaninuani 'Akehuxi hetsɨa Tsuruwaweri hetsiemieme Tsaratiheri nu'aya, Kura kwieyaritsie tatuwani mɨhɨkɨtɨkai meta mawari wewiwamete tiwa'aitɨwame Kutsuhexi Kutsaraki nu'aya: 2 «Yawé Naimekɨmɨtɨrɨkaɨye mɨpaɨ kanaineni: “'Ikɨ teɨteri mepɨniukixie mɨpaɨ meputiyuane kename 'akuxi ka'aye'awe tukari kepauka Yawé tukieya manukuketɨarieni tawari”».
3 Yaxeikɨata 'ikɨ Yawé niukieya kaninuani niukameya 'Akehuxi hetsɨa:
4 «¿Kamɨtsɨ xeme titayari
kii 'aixɨa 'anenemeta xete'ayetetɨka xeikɨa
mexi netuki 'unitɨ mana'uwe?»
5 Mɨpaɨ kanaineni hikɨ Yawé Naimekɨmɨtɨrɨkaɨye:
«Xekeneuyutimaixɨa yurikɨ kexemɨteyuriku.
6 »Xeme waɨkawa xekaniuka'etsani, peru 'etsiwa xekaniuka'itsanani,
xekateniutikwa'ani, peru xepɨka'utihuxarɨwe,
xekatenanuye'eni, peru xepɨkahuxaiwawe,
xepuyukemaritɨa, peru yaxeikɨa xepɨyexerikwitɨwe,
meta ti'iwame tuminieya yapɨreuyeika
kuxitari matsani hepaɨ».
7 Mɨpaɨ kanaineni Yawé Naimekɨmɨtɨrɨkaɨye:
«Xekeneuyutimaixɨa yurikɨ kexemɨteyuriku.
8 »Xekenehu xeme hɨritsie,
kɨyexi xekene'atɨa hikɨ netuki xekenanukuketɨa tawari.
Tawari xe'iwewietɨwekaku ne ne'ixeiyatɨ nepɨnetemawieka,
'ana xekaninenierikuni ne kenemɨtimariwe
—Yawé mɨpaɨ kanaineni—.
9 »Xeme waɨkawa xekatenitakwewieka,
peru 'etsiwa xeikɨa xepuka'itsana,
tita yukiita xemɨte'uti'uta,
ne xeihɨtsieriyarikɨ nekanikumaweriyani.
¿Ketitayari? Netuki 'unitɨ 'amuwekɨ,
mexi xeme yuhetsiemieme xeikɨa xetekuwautɨwe
—mɨpaɨ kanaineni Yawé Naimekɨmɨtɨrɨkaɨye—.
10 »'Ayumieme, xeme ya'ane xewiwiekaku, pɨka'ukawiyexɨ, meta kwiepa 'ikwaxi pɨkatiutixuawerixɨ. 11 Ne yanekatiniuyurieni mɨtiwanikɨ 'ɨtsita meta hɨritsie, tɨrikutsata, kaxie haraweriyaritsata, meta huriwatsata, mɨraka'etsitɨretsie, tewaxi wahetsie meta teɨteri wahetsie, meta naime tewi 'uximayatsikayatsie».
12 Tsuruwaweri Tsaratiheri nu'aya, mawari wewiwamete tiwa'aitɨwame Kutsuhexi Kutsaraki nu'aya, meta yunaitɨ teɨteri, Yawé yukakaɨyari mepanu'eni, mɨyatɨtɨ, Kakaɨyari niukameya 'Akehuxi kemutayɨ mepenu'eni, Yawé wakakaɨyari meiyenɨ'akai, 'ana teɨteri Yawé me'ayemakatɨ mepakɨ. 13 Hikɨ 'Akehuxi, Kakaɨyari niukameya, tawari Yawé niukieya kaniwarutaxatɨani teɨteri: «Ne xehamatɨa nepuyeika. Ne, Yawé, mɨpaɨ nekanaineni». 14 Hikɨ Yawé kaniwarupitɨani memɨyuwaɨriyakɨ Tsuruwaweri Tsaratiheri nu'aya, kuwexinaruri mɨhɨkɨtɨkai Kura kwieyaritsie, meta mawari wewiwamete tiwa'aitɨwame Kutsuhexi Kutsaraki nu'aya, meta yunaitɨ Kakaɨyari teɨterimama memɨyuhayewatɨwekai, hikɨ mekanitsutɨani Kakaɨyari Yawé Naimekɨmɨtɨrɨkaɨye tukieya mewewietɨwetɨ. 15 Xeitewiyari heimana nauka tukariyaritsie mepɨyɨaka, 'ataxewi metseriyaritsie, hutarieka wiyari ti'aitakaku Raríyu.