1 Merikɨtsɨ xeitewiyari heimana xewi tukaritsie 'atahutarieka metseritsie, Yawé tawari niuki 'Akehuxi yuniukame kaneyenɨ'airieni: 2 «Tsuruwaweri Tsaratiheri nu'aya keneuta'iwawiya, mukuwexinaruri Kura kwieyaritsie, meta Kutsuhexi Kutsaraki nu'aya, mawari wewiwamete tiwa'aitɨwame mɨhɨkɨ, meta yunaime teɨteri keniwaruta'iwawiya: 3 “¿Xewitɨ hikɨ xeme xetsata tiuyeika tuki muxei meripai mieme kemɨtimariwekai? ¿Hikɨta kexete'ixeiya? ¿Wa'atɨ hepaɨna mɨka'ane? 4 Hikɨ —Yawé mɨpaɨ kanaineni— Kamɨtsɨ hikɨ Tsuruwaweri pepɨkamaka kene'awaɨriyani. Kutsuhexi Kutsaraki nu'aya pepɨkamaka kene'awaɨriyani. 'Ekɨ mawari wewiwamete tiwa'aitɨwame pekanihɨkɨtɨni. Xekeneyuwaɨriyani, teɨteri 'ena kiekatari. Xeketene'uximayaka, ne xehamatɨa nekaniuyeikani —mɨpaɨ kanaineni Yawé Naimekɨmɨtɨrɨkaɨye—. 5 Xetsata ne'iyari kaniuyeikamɨkɨ yuheyemekɨ, tɨratu kenemɨtiuwewi hepaɨ xehamatɨa kepauka 'Ekipitu xemayekɨ”.

»Xepɨkamamaka, 6 Yawé mɨpaɨ kanaineni Naimekɨmɨtɨrɨkaɨye: “'Ena mɨtiyehanetsie kwitɨwa, muyuawi nekanitayuitɨamɨkɨ meta kwie, haramara meta kwie makuwaki, 7 yunaitɨ nuiwarite memɨtimamanikɨ yanepɨtiyurieni. Hikɨ yupiinite mɨraye'atɨka mekateni'atɨakuni 'ikɨ tukita, hikɨ witsimɨti'anene mɨkɨ netukita katinitahɨnimɨkɨ —Yawé Naimekɨmɨtɨrɨkaɨye mɨpaɨ kanaineni—. 8 Pɨrata katininepinitɨni, meta huru katininepinitɨni —kanaineni Yawé Naimekɨmɨtɨrɨkaɨye. 9 'Ikɨ tuki hutarieka mieme waɨkawa matsi mariwetɨ payani keyuri matɨari mieme —kanaineni Yawé Naimekɨmɨtɨrɨkaɨye—. Meta 'ena yanepɨtiyurieni kayuwatɨ mumakakɨ”, mɨpaɨ kanaineni Yawé Naimekɨmɨtɨrɨkaɨye».

10 Hikɨ xeitewiyari heimana nauka tukaritsie 'atanauka metseriyaritsie hutarieka wiyari Raríyu ti'aitakaku, Yawé niukieya kaninuani 'Akehuxi Kakaɨyari niukameya hetsɨa: 11 «Yawé Naimekɨmɨtɨrɨkaɨye mɨpaɨ kanaineni: “Mawari wewiwamete keniwaruta'iwawiya tita mɨtipatsietɨka hepaɨtsita”». Hikɨ 'ayumieme 'Akehuxi mɨpaɨ katiniwarutahɨawe:

12 —Xɨka xewitɨ wai mɨpatsie yukamixa 'emɨtewikɨ 'ita'eimame heyani, xɨkata mɨkɨ kamixa xeime paa heyuitɨani, yatɨni 'itsari, yatɨni winu, yatɨni hatseiti, yatɨni tsepa tita 'ikwai, ¿mɨkɨta metepatsieni?

Mawari wewiwamete mɨpaɨ mekatenita'eiya:

—Hawaikɨ.

13 Tawarita 'Akehuxi mɨpaɨ kaniutayɨni:

—Xɨkata xewitɨ tewi ka'itiyatɨ mɨki memayɨakɨ, xɨka mɨkɨ tiukumayɨani hipame 'ikwaite, ¿mɨkɨta kati'itiyatɨ tiyuhayewa?

Mawari wewiwamete mɨpaɨ mekaniutiyuani:

—Huu.

14 Hikɨ 'Akehuxi mɨpaɨ katiniwaruta'eiya:

15 »Hikɨri, hikɨ 'ena mɨtiyehane xekeneuyutimaixɨa. Meripaitɨ xeme Yawé tukieya tsutɨmeyari xemɨkatsutɨawekaitsie 'akuxi, 16 ¿ketixeyuriekai? Kepauka xeme xeitewiyari merirayari 'imɨari xeka'itsanake xemɨyu'eriekai, matsi xeikɨa tamamata merirayari xeniukaxexeiyakaitɨni. Kepaukata kaxie hayari huta tewiyari heimana tamamata rituruyari xekaxeiyake xemɨyu'eriekai, matsi xeikɨa xeitewiyari rituruyari xepukaxexeiyakai. 17 Ne xe'etsari nepeuyehɨa xɨrikɨ, meta tekɨmemetekɨ, meta tee kaniuxɨrieni, naime xe'uximayatsikatsie. Peru xeme mɨyatɨtɨ nehetsɨa xepɨkahanuaxɨa —Yawé mɨpaɨ kanaineni—. 18 Xekeneuyutimaixɨa hikɨ 'ena mɨtiyehane, xeitewiyari heimana nauka tukaritsie, 'atanauka metseritsie, kepauka Yawé tukieya tenariyari xemukatsutɨatsie. Yemekɨ xekenaye'eriwani: 19 Hikɨ yanepɨtayɨni kenemɨtiyurieni 'akuxi 'imɨari muye'ɨnetɨkatsie yetekaku. 'Akuxi kaxie takari kakayaxiwekaku meta xapa takari, meta kɨranaraxi meta huriwu pɨkatikaxuaweriwe, peru hikɨ 'ena mɨtiyehane ne 'aixɨa nepɨxeyurieka».

20 Xeitewiyari heimana nauka tukaritsie mɨkɨ metseriyaritsie, hutarieka Yawé niukieya 'Akehuxi hetsɨa kaninuani: 21 «Tsuruwaweri mɨpaɨ ketineutahɨawi Kura kwieyaritsie mɨkuwexinaruri: “Ne nekanitayuitɨaximeni muyuawi meta kwie. 22 Te'aitamete yunaitɨ kwiepa memɨtama watɨrɨkariya nekaniwanawairiemɨkɨ. Wakaxetate nepatixɨrieni wakutsiyarima yunaime, meta kawayutsixi mepatixɨrieni meta memanatei mepɨyutakwini yu'iwamatɨ 'ixiparakɨ mepɨyukwini. 23 Mɨpaɨ kanaineni Yawé Naimekɨmɨtɨrɨkaɨye: 'Iya tukaritsie ne 'ekɨ nepɨmetsita'inieni, neti'uximayatsiriwame Tsuruwaweri Tsaratiheri nu'aya —mɨpaɨ kanaineni Yawé— ne nepɨmetsi'anayexei, karikɨ hanira titseyumawame hepaɨ pe'aneme nekamanayeitɨamɨkɨ”, mɨpaɨ kanaineni Yawé Naimekɨmɨtɨrɨkaɨye».