Tsakariyaxi
1
Kememɨte'utahɨawarie Yawé hetsie memɨtewiyakɨ
1 Merikɨtsɨ 'atahairieka metseriyaritsie, meta hutarieka wiyaritsie Raríyu ti'aitakaku, 'ana Yawé Tsakariyaxi kaniutahɨawe, Werekiyaxi nu'aya meta 'Iru teukarieya, mɨpaɨ katinitahɨawe:
2 «Yawé kaniha'aka meripaitɨ kiekatari xetutsima wahepaɨtsita. 3 'Ayumieme, mɨpaɨ ketiniwarayehɨtɨa yunaime teɨteri, mɨpaɨ kanaineni Yawé Naimekɨmɨtɨrɨkaɨye:
»“Nehetsɨa xekeneu'axɨa,
neta xehetsɨa nepunuani
—Yawé Naimekɨmɨtɨrɨkaɨye mɨpaɨ kanaineni—.
4 »”Xetutsima kememɨ'anenekai wahepaɨ xepɨka'aneneni,
mɨpaɨ memɨtewakuxaxatɨwakai
Kakaɨyari niukametemama meripai miemetexi,
mɨpaɨ kanaineni Yawé Naimekɨmɨtɨrɨkaɨye:
‘'Axaxete'u'iyaritɨ xeketeneuhayewa
meta 'axaxeteyurietɨ.’
Merikɨte kenemainekai mɨkɨ yamepɨkatekakɨ
meta mepɨkanetsi'u'eni
—mɨpaɨ kanaineni Yawé—.
5 »”¿Hakewa mepe'uwa xetutsima?
¿Kakaɨyari niukametemamata mete'ayeyuyuri?
6 ¿Kamɨtsɨ karaye'atɨarie xetutsima wahetsie
niuki meta 'aitsikate
nemɨwarupitɨa menete'uximayatsiriwamete neniukamete
mɨpaɨ memɨtewataxatɨanikɨ?
»”Hikɨ mɨkɨ Yawé hetsie metewiyatɨ mekanakɨne, meta mɨpaɨ mekaniutiyuani: ‘Yawé Naimekɨmɨtɨrɨkaɨye yapɨtatsi'uyuri kemɨtiu'eri: tahetsie kemɨreuyewekai 'axatete'u'iyarikaku 'axateteyuriekaku.’ ”»
Tewi tsikwaitsata
7 Hutarieka wiyaritsie ti'aitakaku Raríyu, xeitewiyari heimana naurieka tukaritsie tsewati metseriyaritsie, tamamata heimana xewi metseriyari mɨhɨkɨ, 'ana Yawé Tsakariyaxi kaniutahɨawe, Werekiyaxi nu'aya 'Iru teukarieya: 8 Xeitɨkaritsie mɨpaɨ nepɨtiunierixɨ, tewi nepuxei kawayutsie 'anakaime heukɨtaxaɨyemetsie. Mɨkɨ tewi tsikwaitsata kaniyekeni 'etsiwa heukatewakaku 'aki 'utɨma. Waritanata mepɨti'ukai meheukɨtaxawimetsie me'utetɨ meta meheutɨtɨnimetsie meta meheutuxametsie. 9 Ne 'ipaɨ nepɨtita'iwawiyaxɨ: «¿Neti'aitɨwame, 'ikɨri ketita mete'inɨariyari kawayutsixi wahetsie memutei?» Nehamatɨa mɨtikuxatakai niuki tuayame, mɨpaɨ kanetiniuta'eiya: «Nepɨmatitaxatɨani ketita memɨte'inɨariyarite». 10 Hikɨ tewi tsikwaitsata muwekai pɨta mɨpaɨ kanetiniutahɨawe: «Yawé kaniwareyenɨ'ani 'ikɨ kawayutsixi wahetsie memutei, naitsarie kwiepa memakunierekɨ».
11 Merikɨte mɨkɨ memutekai Yawé niuki tuayameya tsikwai tsata muwekai, mɨpaɨ mekateniutahɨawe: «Naitsarie tepukexiyaxɨri kwiepa. Yurikɨ yemekɨ naitsarie kayuwatɨ kaniumaka». 12 Mɨpaɨ me'utiyuaku, niuki tuayame Yawé hetsɨa mieme, mɨpaɨ kaniutayɨni: «Yawé Naimekɨpemɨtɨrɨkaɨye, ¿kepaukake 'aixɨa pepɨtixeiya Kerutsareme meta Kura kiekariteyari, pemɨwaheka haika tewiyari heimana tamamata wiyari?»
13 Niuki tuayame nehamatɨa mɨtikuxatakai Yawé kanita'eiya niuki 'aixɨa 'anemekɨ meta kayuwatɨ tiyupitɨwamekɨ, 14 'ariketa niuki tuayame mɨpaɨ kanetiniutahɨawe: «Karima 'ikɨ niuki keneutaxata Yawé Naimekɨmɨtɨrɨkaɨye hetsɨa mieme:
»“Neminaki'eriekɨ Kerutsareme meta Tsiyuni
wahetsiemieme nepɨ'ɨtetsa.
15 Matsi pɨta, waɨkawamekɨ nepɨha'a
'iya nuiwarite memuyutemamawie wahetsiemieme.
Kepauka nemuyeha'a kwinimiemetɨtɨ nepɨkatiha'akai,
peru matsi mɨkɨ kwinimieme mepɨte'ikwinitɨa”.
16 »Peru hikɨ, mɨpaɨ kanaineni Yawé:
“Tawarita 'ari nekanitinenimayatamɨkɨ Kerutsareme.
Mana tawari netuki kananukuketɨariemɨkɨ,
hikɨ kii wewiwame ti'inɨnɨatameya kanitahaniemɨkɨ,
mɨpaɨ kanaineni Yawé Naimekɨmɨtɨrɨkaɨye”.
17 »Tawarita 'ikɨ karima ketineutaxata, Yawé Naimekɨmɨtɨrɨkaɨye hetsiemieme:
»“Tawarita nekiekarite ranayuhayewame pɨrexeiyani 'aixɨa mɨti'ane,
tawarita Yawé Tsiyuni pɨnɨtɨani,
tawarita Kerutsareme panayexeiya”».
18 Hikɨ kepauka nemeutanierixɨa, nehɨxie nauka 'awayari nekaniuxeiya. 19 Hikɨ nenita'iwawiya niuki tuayame nehamatɨa mɨtikuxatakai: «¿'Ikɨ 'awate ketita ti'inɨariyarite?» Niuki tuayame mɨpaɨ kanetiniuta'eiya: «'Ikɨ 'awate tɨrɨkariyate kanihɨkɨtɨni kɨmana Kuratsie kiekatari, 'ixaheritsixi meta Kerutsaremetari memeutaweiyariexɨa».
20 Hikɨ 'arike Yawé kaneniuxeiyatsitɨanita yunaukame tepɨa tsunamete. 21 Mɨpaɨ nekatinita'iwawiya «¿'Ikɨta kemetekuyurie?» Hikɨ Yawé mɨpaɨ kanetiniuta'eiya: «'Ikɨ 'awate kaniwa'inɨaritɨni nuiwarite yutɨrɨkariyakɨ Kura nuiwarimama memɨwareutaweiyaxɨa, 'ana nitɨma mepɨka'uyɨwekaxɨa xewitɨ mɨyukɨhɨanikɨ. 'Ikɨta tepɨa tsunamete mepu'axɨa mɨkɨ memɨwatimariutakɨ yemekɨ, watɨrɨkariya memɨwanawairienikɨ kemɨ'ane nuiwarite Kura kwieyaritsie memɨtahaxɨa mana kiekatari memɨwareutaweiyaxɨa».