2
Tewi ti'inɨnɨatame mahurie
1 Kepauka nemanukunierixɨta, xeimeta tewi nekaniuxeiya ti'inɨnɨatame 'ahuriekame. 2 Ne nekanita'iwawiya: «¿Hakewa pepeutɨa?» Mɨkɨ mɨpaɨ kanetiniuta'eiya: «Kerutsareme nekaneu'inɨatamieni. Nepɨtimaimɨkɨ kehatayewa meta kehayetewi».
3 Niuki tuayame pɨyemieximekairi nehamatɨa mɨtikuxatakai, yapauka xewitɨta niuki tuayame punua hetsɨana. 4 Mɨpaɨ katinitahɨawe: «Yapauka mɨkɨ temaikɨ 'ipaɨ ketineutaxatɨa:
»“Kerutsareme kiekariyaritsie waɨkawa teɨteri mepuxuaweni,
meta tewaxi waɨkawa mepuxuaweni,
'ayumieme Kerutsareme
yukuraru kahexeiyatɨ payani.
5 Hikɨ kiekari warita —Yawé mɨpaɨ paine—
tai kuraruyari nepɨhɨkɨtɨni,
meta kiekari taɨta
nepitahɨniya waɨkawa 'aixɨa mɨti'anekɨ”.
6 »Xekenayekɨni, xekenayekɨni.
Xekeneuyuta'una mɨkɨ kiekari tayeta mukumatsie
—Yawé mɨpaɨ kanaineni—.
»Ne nepɨtiuyuri nemɨxeheutaxɨriexɨa
nauka 'ekayarikɨ mɨyuawitsie miemekɨ
—mɨpaɨ kanaineni Yawé—.
7 »Xeme Tsiyunitari, Wawiruniya xemu'uwa xekenayekɨni mana, xekeneyuta'una». 8 Karikɨ Yawé Naimekɨmɨtɨrɨkaɨye mɨpaɨ kanaineni, mɨnetsiheyenɨ'a 'iya nuiwarite naime memɨxete'unawairi wahetsɨa:
«Kemɨ'ane teɨteri neteɨterima memɨwa'uximatɨa,
nehɨxita memeumemeni hepaɨ mekaniyɨaka.
9 Ne nepɨyeha'ani mɨkɨ teɨteri wahepaɨtsita,
hikɨ waɨriyarika tewa'uximayatsiriwametetɨtɨ mepɨtewanawatsirieni wapiinite.
»'Ana mɨpaɨ mekatenetimaikuni kename Yawé Naimekɨmɨtɨrɨkaɨye netsiheyenɨ'a.
10 »Xekeneutihiwani temawierikakɨ, Tsiyunitari.
Ne nekaninuamɨkɨ xehamatɨa ne'ukaitɨ nekanayeimɨkɨ
—Yawé mɨpaɨ kanaineni—.
11 »Mɨkɨ tukaritsie,
yuwaɨkawatɨ nuiwarite Yawé mekanitinɨikuni.
Mɨkɨ neteɨterima mepakɨne,
neta watsata nepuyeikani.
»'Ana mɨpaɨ xekatenetimaikuni kename Yawé Naimekɨmɨtɨrɨkaɨye hɨkɨ mɨnetsiheyenɨ'a xehetsɨa. 12 Tawarita Kura kwieyari Yawé yuhetsiemieme payeitɨani, kwieya mɨpatsie, meta tawarita Kerutsareme panayexeiya. 13 Yunaitɨ kwiepa xemɨtama kayuwatɨ xekeneumaka Yawé hɨxie, 'ariri kanayeyani muyuawitsie yukii mupatsieta tahetsɨa nuanike».