3
Mawari wewiwamete tiwa'aitɨwame 'ixurikiteya mɨ'e'ekwi
1 Hikɨ kaneniuxeiyatsitɨani Kutsuhexi, mawari wewiwamete tiwa'aitɨwame pɨhɨkɨtɨkai, Yawé niuki tuayameya hɨxie 'apuwekai, meta Kauyumarie nepuxei tserietana 'utiweme, 'ixanetamɨtɨ. 2 Niuki tuayame Yawé hetsɨa mieme Kauyumarie mɨpaɨ katiniutahɨawe:
«Yawé kemetsi'utatieni,
Kerutsareme manayexei.
Yawé kematsi'utatieni, Kauyumarie.
'Ikɨ tewi kɨye taxɨximetɨ
taipa manayehanie hepaɨ kaniuyɨni».
3 Kutsuhexi yukemari tɨtɨnime 'anakatɨtɨ niuki tuayame hɨxie puwekai. 4 Hikɨ mɨpaɨ niuki tuayame katiniwarutahɨawe mana memɨti'ukai, me'iparewikutɨ: «Xekenanutihɨniri kemariteya mɨtɨtɨni». Hikɨ Kutsuhexi mɨpaɨta katiniutahɨawe: «Mɨpaɨ ketinemaika, tita 'axapemɨtiuyuri 'ari nekamatinanuyeitɨirieni, 'ayumieme hikɨri 'ixurikite nekamenanakatɨtɨamɨkɨ witsimɨ'anene».
5 Hikɨ neta mɨpaɨ nekaniutayɨni: «Mukuretsi xekenanutiketsirita mɨ'itiya». Hikɨ mekanenutiketsirieni mukuretsi mɨ'itiya meta mekanitikemaritɨani, mexi niuki tuayame Yawé hetsɨa mieme mana 'uwekai. 6 Hikɨ niuki tuayame Yawé hetsɨa mieme Kutsuhexi mɨpaɨ katinayehɨtɨani: 7 «Mɨpaɨ kanaineni Yawé Naimekɨmɨtɨrɨkaɨye:
»“Xɨka ne'aitsikatetsie yapetikamieni,
meta xɨka mawari wewiwame pehɨkɨtɨtɨ peraye'atɨani,
hikɨ 'ana netukita pepɨtita'aita
meta netakwa hepaɨtsita mieme pepɨti'ɨwiyani.
Ne 'ena tixaɨtɨ nepɨmatihɨritɨani
'ena memu'uwa 'ikɨ wahamatɨa.
8 »”Kutsuhexi, keneneu'eni, mawari wewiwamete tiwa'aitɨwame,
meta 'a'iwama meke'u'enanani,
'ahɨxie memayaxike,
xeme xekani'inɨaritɨni kemɨtiyɨni:
Neti'uximayatsiriwame nekani'atɨaximeni,
nekani'atɨaximeni Meukuyɨraxɨ.
9 Kutsuhexi, tete keneuxeiya
'ahɨxie nemitaye.
Mɨkɨ hetsie hɨxite 'atahutatɨ patei,
mɨkɨtsie nepɨreu'utɨani.
Xeitukaritsie kwiepa memɨtama
ke'axamemɨte'uyuri nepɨtiwaranuyeitɨirieni
—mɨpaɨ kanaineni Yawé Naimekɨmɨtɨrɨkaɨye—.
10 »”Mɨkɨ tukaritsie, yuxexuitɨ xekaniwata'iniexɨakuni yu'iwama kaxie hetɨa xemɨtitenikɨ meta piní hetɨa, mɨpaɨ kanaineni Yawé Naimekɨmɨtɨrɨkaɨye”».