11
Kakaɨyari kemɨtitanaki'eri 'Ixaheri
1 «Kepauka 'Ixaheri mununutsitɨkai 'anapai nepinaki'eriekai,
'Ekipitu 'uyeikakaku neniwe nepenayexei.
2 Kepauka matsi waɨkawa nemehɨawekai,
matsi humapai kaniumiekaitɨni.
Mawari taiyariyari pɨwamawirienekai memɨkayuri kakaɨyarixi,*11:2 Pɨyɨweta mɨtayɨni Wahari kakaɨyarixiyari.
'ɨkwa pɨwatairienekai.
3 Ne 'Epɨrahini muyeiwenikɨ nepɨtiti'ɨkitɨa,
ne mamayatsie nemɨkawiekai nepɨhɨkɨ.
Peru mɨkɨ pɨkanetsihetima
kename ne 'aixɨa reu'eriekame neheyeitɨwakai kepauka mɨtikuyeni.
4 'Ahurawa nepuwaha kaunari witsimɨ'anenekɨ,
'ahurawa nepuwaha naki'eriya kaunariyarikɨ.
Kemɨti'uximayakai mɨkɨ yuku nepinawairi,
ne'inaki'erietɨ 'ahurawa neputɨa nemɨtitaminikɨ.
5 »'Ekipitu xepɨkahakunuaxɨaniri,
'Atsiriya pɨta xehetsie pɨtita'aita,
nehetsɨa xemɨ'axɨanikɨ xemɨka'uyuwaɨrikɨ.
6 Xekiekaritetsie 'ixipara me'u'ɨtɨ mekani'axɨakuni,
xekitenie mepɨteheuwitexɨani
kememɨteku'eriwakai mepɨkaheye'atɨani.
7 Neteɨterima mepuyuwaɨriya memɨkanetsinaki'eriekakɨ kenemɨtitewa,
'ayumieme tsepa memɨnetsihahɨawe ne nepɨkawaparewieni.
8 »'Epɨrahini, nepɨkayɨwe nemetsiyetuani.
'Ixaheri, nepɨkayɨwe nemetsi'uku'eirieni.
Ne nepɨkayɨwe nemetsiyetuani 'Arimaha kenemɨtiyetua hepaɨ.
Ne nepɨkayɨwe nemetsi'uku'eirieni Tsewuhini hepaɨ.
Netaɨta, ne'iyari pɨkarexeiya,
metatsiere nekwinurite panukuyuane.
9 Peru ne tawarita nepɨkayeha'ani meta
'Epɨrahini tawarita nepɨkaka'una.
'Ahamatɨa tewi pɨka'uyeika,
ne mana nemuyeikakɨ, Kakaɨyari nemɨpatsie,
'ayumieme kiekari nepɨkatamieni».
10 Yawé maye hepaɨ puyutahaxɨatɨani,
mɨkɨta mepenukuweiya.
Kepauka Yawé haxɨaya meme'enieni,
niwemama tau makayuyuipiketsie hepa mepatinexɨani memamatɨ.
11 «'Ekipitu paitɨ mepanexɨani, wikixi wahepaɨ me'uyu'unarɨmetɨ.
'Atsiriya paitɨ mepanexɨani kukuruxi wahepaɨ memamatɨ,
ne wakiita nekaniwareuta'ɨnaxɨamɨkɨ
—Yawé mɨpaɨ kanaineni—.
'Ixaheri ke'axamɨtiuyuri
12 »'Epɨrahini pɨneti'itaiyane,
'Ixaheri mɨra'aita 'itarikakɨ xeikɨa niuki pɨxɨatɨa,
Kura kuyeikame pɨhɨkɨ, Kakaɨyari hetsɨa 'ateewa paitɨ puyeika.
Kakaɨyari mɨpatsie yamɨtikamie hetsɨa 'ateewa paitɨ puyeika.