12
1 'Epɨrahini 'eka xeikɨa kanikwaka,
tukarikɨ 'eka mɨxɨka 'utɨa pukuyeika,
waɨkawa 'itarika kaniwewieka meta kaniyumieneni.
'Atsiriya ti'aitame hamatɨa tɨratu mepɨwewietɨwe,
'Ekipitu ti'aitame hetsɨa hatseiti kaniyetuayani mɨtiyutuaka hepaɨ».
2 Yawé Kura kanixanetani,
pɨrayukatɨani Kakuwu naime kemuyuri,
naime kemɨtiuyuri mɨkɨta mɨpaɨ pɨtipitɨarieni.
3 Yumaama hukayatsie paitɨ yekaitɨ yu'iwa putami,
meta kepauka temaikɨ matɨa Kakaɨyari hamatɨa puyutami.
4 Niuki tuayame putami pe'iwaxɨ,
putatsua pitawawiri 'aixɨa miyurienikɨ.
Weteri pikaxei,
mana hamatɨana pɨtiutixa,
5 Yawé Kakaɨyari Naimekɨmɨtɨrɨkaɨye hamatɨa pɨtiutixa,
Yawé mɨtitewa.
6 Peru 'ekɨ kenenua 'akakaɨyari hetsɨa,
peti'akanaki'erietɨ kemɨtiheitserie ketineyurieneni,
hetsiena yuri peti'erietɨ.
7 Kanani ti'inɨnɨatameya 'aixɨa pɨka'anene,
pinake hipame mɨtiwanawatsirieneni.
8 'Epɨrahini mɨpaɨ putaine yuta'ɨretɨ.
«Waɨkawa nepɨrexeiya,
waɨkawa ne'ukatewame pɨnetsi'ayeitɨa.
Naime nemɨrana'iwaxɨtsie xɨka xete'utixeiya
mana xepɨkatekaxeiya 'axamɨti'ane».
9 «Ne Yawé nekanihɨkɨtɨni 'akakaɨyari
'Ekipitu pe'uyeikakaku paitɨ,
nekamanakunuitɨamɨkɨ 'ixuriki kiiyarita pekanayekaimɨkɨ,
kepauka makumawetsie temutakaxei hepaɨ.
10 Ne Kakaɨyari niukametemama nepɨtiwarutaxatɨa,
mamariwaweme 'inɨari nepɨtixe'uxeitsitɨa,
ne ne'utainekaku 'ɨxatsikɨ mepɨtexekuxaxatɨwakai».
11 Karaha kiekatari 'axamekateniu'iyarini,
Kanahekɨakari tixaɨ pɨkarayani.
Kirikari paitɨ tuurutsixi mepɨwaretimawa,
'ayumieme mɨrayutimawatɨre tetexi kanitaxɨriexɨamɨkɨ,
'ɨtsita paitɨ.
12 Kakuwu kaniuyuta'una 'Arami hɨriyaritsie,
'Ixaheri katiniuta'uximayata muxatsi wahɨiyarikɨ
yu'ɨya 'iwanetɨ.
13 'Ixaheri 'Ekipitu mayewitɨkienikɨ meta mita'ɨwiyakɨ,
Yawé yuniukame kanenɨ'ani.
14 Peru 'Epɨrahini Yawé kaniuyehaxɨatɨani,
'ayumieme Kakaɨyari waɨkawa kaniwarutixani'erieni.
Hikɨ Yawé pɨrekapitɨani ke'axamɨtiuyuri,
kemɨtiuka'iyari mɨpaɨ katinanuyeyeimɨkɨ.