13
Yawé 'Ixaheri hetsiemieme kemɨtiuyeha'a
1 'Epɨrahini pɨmariwekai 'ixaheritsixi wahɨxie.
Kepauka mɨtikuxatakai teɨteri mepɨmamakai me'i'enietɨ.
Peru mɨkɨ Wahari hayexeiyatɨ patɨa,
'ayumieme 'axamɨti'anekɨ kaniumɨni.
2 Hikɨ yaxeikɨa 'axapɨtiyuriene,
mɨkɨ katiniyuwewirieka kemɨtiyukɨhɨawe,
kakaɨyarixi pɨratakɨ pɨtiwawewie, kakaɨyarixi memɨkwaniyarietɨka,
mamakɨ memɨwewiyatɨka.
Wahepaɨtsita meputiyuane:
«Teɨteri mepɨtewamawirie
meta mepɨwati'itsewe tsikerutsixi wahepaɨ me'aneneme».
3 'Ayumieme hai ximeri mieme hepaɨ me'anenetɨ mepakɨne,
haɨtsi ximeri paitɨ manuku'eke hepaɨ,
xatsi 'eka mei'enitsitɨwa hepaɨ,
kɨtsi huxunuta matineika hepaɨ.
4 «Peru ne Yawé 'akakaɨyari nekanihɨkɨtɨni,
'Ekipitu paitɨ pe'uyeikakaku.
'Ayumieme tawarita xeime Kakaɨyari pepɨkahetimani ne xeikɨa,
nixeime 'awikweitsitɨwame pepɨkakaxeiya ne xeikɨa.
5 Ne nepɨyɨanekai makumawetsie nemɨmatsihetima,
mɨkahakawiwiye makuwakitsie.
6 Ne nepɨtixe'umi xeme xeputihuxai,
peru xehuxatɨ xepuyuti'ɨrixɨ
meta xepɨnetsihatɨmai.
7 'Ayumieme ne wakɨmana maye nepayani,
nepɨwatihupieni huye tetsita, hatɨwe hepaɨ.
8 Nepɨwatakwini meta watawitsie nepɨwareuxutsixɨani
hutse yuniwema wakwerietɨ mɨtiyuyuruwa hepaɨ.
Maye hepaɨ nepɨtiwakwani.
Yeutanaka 'ɨtsita mɨtiyutsana hepaɨ.
9 »'Ixaheri nepɨmatsika'una,
kemɨ'ane mɨmatsiparewie pemaye'uniekɨ.
10 ¿Hakewa ti'a'aitɨwame,
para naime 'akiekarite mɨtawikweitsitɨanikɨ?
¿Hakewa 'a'itsɨkate pemɨwaruta'iwau:
“Ti'aitame meta 'itsɨkate keneneyetuiri”?
11 Neha'atɨ ti'aitame nemetsi yetuiri,
neha'atɨ nemetsi'unawairi.
12 Ke'axamɨtiuyuri 'Epɨrahini kaniuti'utsieni,
naitɨ paka'utɨarie ke'axamɨtiuyuri.
13 'Ukaratsi tiniwerɨmetɨ kukuiniyaya paye'axime,
peru mɨkɨ nunutsi pɨkayɨkɨhɨawe:
kepauka maye'ani manuyeyanikɨ,
'aixɨa pɨkatikuyeixa mɨpaɨ kani'aneni 'Ixaheri mɨkayuwaɨriyakɨ.
14 »¿Netixetawikweitsitɨani mɨkite wateukiyapa?
¿Ne mɨkite watsata netixe'ayehapani?
¿Kewari mɨya, kemɨtiyuruwa?
¿Kewari mɨki teukiyapa, kepemɨtiyuka'una?
Xekenahuni, ne nepɨkaxetinenimayata».
15 Tsepa 'Epɨrahini rexeiyatɨ matɨa yu'iwama watsata,
Yawé 'ekaya kaninuamɨkɨ,
'eka mɨxɨka makumawetsie mieme,
hamuhapane meta haixate kanikawaxɨamɨkɨ.
Tita memɨteheuxeiya katinika'unariemɨkɨ,
naime tita witsiti'anenekame memɨtehexeiyakai katinikumawerimɨkɨ.
16 Teɨteri Tsamariya kiekatari yuhetsie mekatenahɨakuni,
yukakaɨyari me'aye'unietɨ mepakɨ.
'Ixiparatekɨ mekanikwi'iwakuni,
tɨɨri mekanititetseweiyakuni kwiepa,
memayehukatɨka yuhukatsie mekaneuxitekiexɨakuni.