2
Yawé hɨrieya
(Kits 2:1-4 – Mik 4:1-3)
1 Kitsariyaxi kemɨtiunieritɨarie 'Amuxi nu'aya Kura hetsiemieme meta Kerutsareme:
2 'Imatɨrieka tukaritsie,
hɨri Yawé kiiya manuwe pɨkawatayuitɨarieni
matsi 'a'utewitɨ kanayeimɨkɨ,
hɨrite naime kana'iwamɨkɨ,
hetsɨana yunaitɨ nuiwarite mekani'axɨakuni.
3 Teɨteri meyumɨiretɨ mekani'axɨakuni, meta mɨpaɨ mekanitiyuakuni:
«Xekenakɨni, Yawé hɨrieyatsie tepanutikɨne,
Kakuwu Kakaɨyarieya kie,
yuhuye mɨtatsiheta'ɨkitɨanikɨ
meta huyetana xeikɨa temuhunikɨ».
Karikɨ Tsiyunitsie xeikɨa 'ɨkitɨarika kanayenexɨamɨkɨ,
meta Kerutsaremetsie Yawé niukieya.
4 Mɨkɨ nuiwarite watsata kaniwataxanetamɨkɨ
meta mɨkɨ yuwaɨkawame wa'itsɨkame kanihɨkɨtɨkamɨkɨ.
Yu'ixipara hararu mepayeitɨaxɨani
meta yupitsika 'ɨxa xikame mekanayeitɨaxɨakuni.
Nuiwariteri 'ixiparakɨ mepɨkayutakwini,
tawariri mepɨkayuti'ɨkitɨani kuyaxa miemekɨ.
5 Kakuwu kiekarieya, niwa kenaye'a,
Yawé hekɨariyayatsie tepuhuni.
Yawé tukarieya
6 'Ateɨterima pepɨwaruku'eiri,
Kakuwu nuiwarimama,
tau manatineika kiekatari muyuawitsie miemekɨ memɨteyɨ'ɨkitɨa wayeiyarikɨ memɨhɨpɨnekɨ,
meta memɨtehetimamateke piritsiteutsixi kememɨtewarexeiya wahepaɨ,
meta tɨratu mepuyuwewirie 'ateewa kiekatari wahamatɨa.
7 Wakwietsie huru meta pɨrata pɨhɨne,
mɨraye'atɨka memɨteheuxeiya pɨkati'inɨari.
Wakwietsie kawayutsixi kwinimieme mepɨte'ane,
meta wakaxetate kuyaxa mieme pɨkati'inɨari.
8 Wakwietsie kakaɨyarixi memɨwewiyatɨka mepɨhɨne,
teɨteri yuwewiya hɨxie mepukatunuma'uwe,
yumamakɨ ketitamemɨte'utiwewi.
9 Tewi tixaɨtɨ pɨkarayeitɨariwa,
tewi pɨkayɨwe 'atsimɨtiuyurieni.
Pɨkayɨweri pemɨtiwareuyehɨwirieni.
10 'Aitá keneutahaki,
kwauni tsata keneuyuti'awieta
Yawé pe'ayemakatɨ
meta witsikemɨ'anekɨ mariwetɨ.
11 Kwinimieme mɨtiyuta'ɨre hɨxiteya tixaɨtɨ pɨkarayeitɨarieni
teɨteri kememɨteyuti'ɨre kanititunariexɨariemɨkɨ.
'Iya tukaritsie Yawé xeikɨa 'aixɨa katinikuxaxatsiwamɨkɨ.
12 Yawé Naimekɨmɨtɨrɨkaɨye xeime tukaritsie kanayenemɨkɨ
yunaitɨ memuyuti'ɨre meta mamariwaweme memayuyeitɨwa wahepaɨtsita,
yunaime memuyuti'ukita wahepaɨtsita, tixaɨtɨ mekatehɨkɨtɨme mɨwarayeitɨanikɨ,
13 kariuxa Riwanutsie mieme, muyuti'ɨre meta kwinimieme mutɨtɨ hepaɨtsita,
meta naime xiu Watsanitsie mieme hepaɨtsita,
14 hɨri naime 'amutɨtɨtsie mieme hepaɨtsita,
meta yemurite 'amutɨtɨ hepaɨtsita,
15 tuxiyu kwinimieme mutɨtɨ naime hepaɨtsita,
kuraru mɨtɨrɨkawi hepaɨtsita,
16 yunaime kanuwate 'amupapa Taritsi mɨye'axe wahepaɨtsita,
meta yunaime kanuwate 'amupapa witsimɨ'anene wahepaɨtsita.
17 Tewi kwinimieme mɨtiyuta'ɨre kanititunariexɨamɨkɨ,
teɨteri kememɨteyuti'ɨre tixaɨtɨ pɨkarayeitɨarieni.
'Iya tukaritsie Yawé xeikɨa 'aixɨa katinikuxaxatsiwamɨkɨ,
18 meta yuri memɨkakakaɨyarixi yuheyemekɨ mepukumaweriyarieni.
19 Teɨteri terɨta mekaneutahaxɨakuni,
meta kwiepa makutsitsinitsie,
Yawé me'ayemakatɨ
meta witsikemɨ'anekɨ mariwetɨ,
kepauka mɨkɨ manukukenitsie
kwie tayuitɨanike.
20 'Iya tukaritsie tewi
yukakaɨyarixi hurukɨ memɨwewiyatɨka meta pɨratakɨ,
mɨkɨ mɨwarutiwewiekai muwarayexeiyanikɨ,
teuxari meta 'atsixi memuyekietsie puwareutaxɨrieni.
21 Tetexi terɨyarita kaneutahamɨkɨ
meta 'ai mukatatarita,
Yawé me'ayemakatɨ
meta witsikemɨ'anekɨ mariwetɨ,
kepauka mɨkɨ manukukeni
kwie mɨwatayuitɨanikɨ.
22 Tewitsie yuri xete'erietɨ xeketeneuhayewa,
mɨkɨ 'etsiwa xeikɨa katinaye'aka.
Tukarieya xeihɨtsieriyari kanihɨkɨtɨni.