3
Ke'aixɨa mɨtiyɨni Kerutsareme meta Kura kwieyaritsie
1 Tsiparatsɨ xekeneu'enana.
Ti'aitame, Yawé Naimekɨmɨtɨrɨkaɨye,
Kerutsareme meta Kura pɨtinawairieni,
naime parewiya meta naime titakɨ memɨteyumikwakai:
naime 'ikwai memɨteheuyehɨakai,
meta naime haa kememɨteheuyehɨakai.
2 Mɨkɨ mɨka'utimamawe meta kwinimieme mɨreuyutamiewe pakumaweriya,
'itsɨkame meta Kakaɨyari niukameya,
muyuawitsie miemekɨ mɨtiyɨ'ɨkitɨa meta 'ukiratsi,
3 kuyaxi wa'ukiyari meta mariwemekɨ ti'uximayatame,
'ɨxatsitame, meta kwinimieme mɨreutawewiwe
meta 'utakwitɨ tixaɨtɨmexi mɨtiwawiwiya.
4 Memanuyetei temari pɨta nepɨwarayeitɨani,
meta tɨɨri te'aitamete nepuwarayeitɨani.
5 Yuxexuitɨ hipame wahamatɨa mepuyuti'uximatɨani:
yuhepaɨ 'ukitsi mepuyu'uximatɨaka,
yu'aurie kiekatari,
temaikɨ, 'ukiratsi hamatɨa,
tewi tixaɨtɨ mɨkatihɨkɨ, waɨkawa mɨtiyunaki'erie hamatɨa.
6 Hikɨ xewitɨ tewi yu'iwa kaniwiyamɨkɨ
yupaapa kie, mɨpaɨ katinitahɨawimɨkɨ:
«'Ekɨ pemanuyeyerɨni pepɨhɨkɨtɨni, 'ekɨ tuwaxa 'amɨyewa pemexeiyakɨ,
'ikɨ kiekari naitɨ mu'unitsie 'aixɨa ketineuyuri».
7 Matsi mɨkɨ mɨpaɨ katinita'eiyamɨkɨ:
«Ne tiyu'uayemawame nepɨkahɨkɨ,
nekie paa pɨkaxɨawe meta tuwaxa 'amɨyewa nepɨkahexeiya,
teɨteri nemɨtiwata'aitɨanikɨ pepɨkanetsi'anuyeyetsani».
8 Kerutsareme kaniwatayuakeni,
Kura kanika'unikeni,
mɨya mepɨte'anuyehu
Yawé kemɨkatinake memutiyuanekɨ meta mɨpaɨ memɨte'u'uwakɨ:
me'ixani'erietɨ mɨkɨ mariwetɨ witsikemɨtiyuxexeiya.
9 Kememɨteyurie yuhɨxie paitɨ mepumatsiɨkɨ
meta ke'axamemɨteyuriekɨ mekaniyutemamawieka Tsurumatari wahepaɨ,
kememɨteyurie naime mepɨtewaxeitsitɨa.
Xɨa'ui mɨkɨ wahetsiemieme,
yɨkɨmana 'axa'anekɨa memeuyukaxɨrɨwakɨ.
10 Heitseriemekɨ yamɨtikamie mɨpaɨ xeketeneutahɨawi kename 'aixɨa 'anemekɨ yeyani,
kemɨtiuyurikɨ kaniyutemawiekamɨkɨ 'ikwaxi xeiyatɨ.
11 Xɨa'ui 'axamɨtiuka'iyari, matsi 'aixɨa 'anemekɨ pɨkayeyani.
Ti'uximayatɨ kemɨtiuyuri yakatinipitɨariemɨkɨ.
12 Xɨa'ui neteɨterima, waɨriyarika memɨtewa'aitɨa tɨɨri mepɨhɨkɨ
meta 'ukarawetsixi mepɨte'aitamete.
Xɨa'ui neteɨterima, memɨxe'uwitɨxime mepɨxeheuyexɨrie,
huyeta yeuta mepeukuyuyuipike.
13 Yawé puyukuha'aritɨwa wahetsie mɨrahɨanikɨ,
'apuwe yuteɨterima wataxanetake.
14 Yawé 'iwaurika kaniwewimɨkɨ
'ukirawetsixi wahepaɨtsita meta yuteɨterima wahɨxie memanuyetei:
«Xeme kaxie xekaniukaxɨtɨani,
tixaɨtɨ mɨkarexeiya tipiiniteya xekiita katineyepika.
15 ¿Titakɨ heitserie xetehexeiyatɨ neteɨterima xetewananaima
tixaɨtɨ memɨkatehexeiya waheima xete'uyehu?»,
mɨpaɨ kanaineni Ti'aitame,
Yawé Naimekɨmɨtɨrɨkaɨye.
16 Yawé mɨpaɨ kanaineni:
«Tsiyuni niwemama 'ukari kwinimieme mekateniyuti'ɨreni
yɨkɨipi mehutseratɨkaitɨ mekaniku'uwani,
xeime kwamanamɨtɨ kemɨtiuneniere meta kememɨte'ɨkɨka mepuyumatsiɨkɨ,
yu'ɨkatetsie memɨteheutapietɨka mete'utiyuitɨwatɨ.
17 'Ayumieme Yawé nerɨitsitekɨ kaniwakanɨmɨkɨ
Tsiyuni niwemama 'ukari wamu'utsie,
Yawé yemekɨ memu'umetsekame kaniwahayewamɨkɨ».
18 'Iya tukaritsie, Ti'aitame naime pɨtikɨxɨnaxɨani tita memɨteheukapine: kakaitsie tepɨa mɨkamanetɨka, kɨpatetsinamete, tɨpunite, 19 nakɨtsate, matsɨwate, 'ixurikite kɨmana memanuyukunarɨma, 20 tuwaxate, tepɨa kaunariyari 'ɨkatetsie mieme, hɨiyamete, witsimɨtiu'ɨatɨka, mɨrakatɨriketɨka, 21 hanira, mɨxikɨrawi tsuritsiemieme, 22 kamixate witsimɨti'anene, matate, kamixa witsimɨnene, kɨtsɨurite 'etsimɨnene, 23 xikɨrite, 'ixurikite 'aixɨa mɨ'anene, mukuretsi meta xikurite.
24 Witsimɨtiu'ɨakai katinitikuri'ɨakaxɨamɨkɨ,
hɨiyame kaunari pɨhɨkɨtɨni,
mepɨkahunixɨani witsimemɨteyutsikeniyari,
hiwerika kamixayari mepanakatɨni witsimɨ'anene memanakatɨkɨniyari,
mepuyutetewiyani witsimemuyukuyuruwaniyari.
25 'Ateɨterima 'ixiparakɨ mepɨkwi'iwa,
meta memɨka'ukamama 'ahetsɨa miemete meyukwitɨwetɨ mepukwi'iwa.
26 Kiekari 'itupariyari putitsuanani meta hiwerika kamixayari panakatɨni,
yuxaɨta kiekari nutuixietɨ, kwiepa pɨtayerɨni.