19
Niuki 'Ekipitu hepaɨtsita mieme
1 Niuki 'Ekipitu hepaɨtsita mieme:
Yawé xekeneuxeiya.
'Ekipitu kaniye'aka hai kwinimieme 'ayɨweme hetsie 'akaitɨ.
'Ekipitu miemete kakaɨyarixi
me'ixeiyatɨ mekaniutiyɨyɨakani,
'ekipitutari wa'iyari
kanitiweranareni.
2 «Yanekatiniyurimɨkɨ 'ekipitutari memayuye'uniekakɨ,
yu'iwamatɨ mepuyutakwini,
yuhamikumatɨ mepuyutakwini,
kiekarite mepuyutakwini,
te'aitamete mepuyutakwini.
3 'Ekipitutari mekayuwaɨriyatɨ mepakɨne
meta yukakaɨyarixi mekaniwatahɨawikuni:
meta mɨkite wa'iyarite,
teyukewaiyamete meta mɨkite wahamatɨa memɨtekuxata meta memɨtehetimamateke,
ne matsi kememɨteku'eriwa nepɨkawapitɨani.
4 Nepɨwapitɨani 'axamete'u'iyaritɨ memɨtewata'uximayatsitɨanikɨ,
ti'aitame 'axatiuka'iyaritɨ katiniwata'aitɨamɨkɨ»,
Ti'aitame mɨpaɨ kanaineni,
Yawé Naimekɨmɨtɨrɨkaɨye.
5 Niru hayari pakawani,
xiekari xeikɨa wakitɨ pahekɨare.
6 Haa muhapanekaitsie 'axapɨraye'ɨatɨkani,
meta 'Ekipitu 'akiyarite pakawaxɨani,
yemekɨ 'uwakitɨ puyuhayewa.
'Uwá meta haka hatetsita mieme kanitiyɨnarimɨkɨ.
7 Niru hatetsitayaritsie,
haa hakewa meye'akai,
naitɨ pɨkaretsiɨraɨyeniri.
Niru 'aurie naitɨ mɨti'etsiekai
'akumawetɨ puyuhayewa, pɨtikumawere.
8 Yunaitɨ ketsɨteweiyamete mepɨtitsuani mepuyutihiwerieni,
Niru hetsie kemɨ'ane kwaitsɨ memeukawiwiwa,
wipi memɨwiwietɨwe mekani'amɨxɨakuni.
9 Me'iyɨrietɨ mekanakɨnikuni memɨte'uximaya rinu 'aixɨa meyurietɨ,
kememɨteta'ikwewa rinukɨ 'itsamete mekateneuyehɨakuni.
10 Mepɨ'iyɨrienita 'ixuriki memɨwewie,
yunaitɨ te'uximayatamete mekaniyutihɨawikuni.
11 Tsuhani kiekatari memanuyetei 'atsimemɨkatemate mepɨhɨkɨ,
'ɨxatsitamete waɨkawa memɨtemaiwawe
Parahuni mepɨ'ɨxatsitɨa tixaɨtɨ 'atsimekatemaitɨ.
¿Titayari mɨpaɨ xete'ikɨhɨawe:
«Ne xewitɨ memɨtemaiwawe nekanihɨkɨtɨni,
te'aitamete meripaitɨ miemete memɨnete'uta'ɨkitɨa»?
12 ¿Kwinimieme pemɨtimaiwekai hakewa peyuhayewaxɨ?
Peketiuxeitsitɨarieni meta peketiutaxatɨarieni
Yawé Naimekɨmɨtɨrɨkaɨye
'Ekipitu hepaɨtsita kemɨtiyurimɨkɨ.
13 Tsuhani kiekatari memanuyetei 'atsimemɨkatemate mepakɨ,
Menipitsi kiekatari memanuyetei mepɨte'u'irɨwiyarie.
Teɨteri watetexi memɨhɨkɨtɨkai tsikurita mieme
'Ekipitu mepeuyehɨa kemɨtimiekai.
14 Yawé wahetsie pupitɨa
'iyari 'iyɨriwame.
'Ekipitu naimekɨ kemɨtiyuriene
kemɨtimiekai mekaneiyehɨani.
Tawekame mutahewa hepaɨ,
'Ekipitu kanitakitsarietɨyeikani.
15 'Ekipitu hetsie 'aixɨa mutiuyurieni pɨkayɨwe,
tsepa mu'uya mɨhɨkɨ yatɨni kwaxieya, yatɨni takɨ yatɨni haka.
16 'Iya tukaritsie 'ekipitutari 'ukari wahepaɨ mepɨteyuxexeiyani. Meputiyɨyɨakani marikakɨ kepauka Yawé Naimekɨmɨtɨrɨkaɨye yumamá manukuhana 'iyuitɨwatɨ yukuha'aritɨwatɨ mɨtiwakwinitɨanikɨ. 17 Kura kwieyari 'ekipitutari mepimakaxeni. Yawé Naimekɨmɨtɨrɨkaɨye kemɨtiyurimɨkɨ wahepaɨtsita mieme, Kura kwieyari xɨka haterɨwarɨwani kemɨ'ane memi'enieni me'enaname waɨkawa meputimamaweni.
18 'Iya tukaritsie 'Ekipitu kwieyaritsie 'auxɨwitɨ kiekari pukumare kananitari waniukikɨ me'utiniutɨ, Yawé Naimekɨmɨtɨrɨkaɨye hetsie memɨtewiyanikɨ yamepɨtiyuani. Mɨkɨ xewitɨ Tau Kiekariyari pɨtitewaka.
19 'Iya tukaritsie Yawé hetsiemieme mawari taiyame xewitɨ 'Ekipitu kwieyari hixɨapa pɨtakeni, metatsiere kwieyari manuye'atɨkatsie tete pɨtakerieni Yawé hetsiemieme. 20 Mɨkɨ 'inɨari pɨhɨkɨtɨni 'Ekipitutsie ma'eriwanikɨ Yawé Naimekɨmɨtɨrɨkaɨye. Kepauka mɨkɨ Yawé memɨtahɨawe waɨriyarika memɨtewa'aitɨa wahepaɨtsita, mɨkɨ wawikweitsitɨwame kaniwaranɨ'airiemɨkɨ meta wahetsie nunuwame kaniwaxɨnamɨkɨ. 21 'Ayumieme Yawé 'ekipitutari wahetsie matsiɨkɨme kanayuyeitɨamɨkɨ, 'iya tukaritsie mɨkɨ Yawé mekanetimaikuni: mawari me'iwewirietɨ mekaneyexeiyakakuni hatsite mekateniyetuiriwakuni, Yawé hetsiemieme yamekateniyɨhɨritɨakuni meta mekateneye'atɨiriekuni. 22 Yawé 'ekipitutari katiniwakwinitɨamɨkɨ, tiwakwinitɨametɨtɨ kaniwa'uayemamɨkɨ. Mɨkɨ Yawé hetsɨa mekani'axɨakuni, mɨkɨ kaniwa'enimɨkɨ kememɨte'ikɨhɨaweni meta 'aixɨa meteheu'eriekame puwarayeitɨani.
23 'Iya tukaritsie huye pɨtixuawere 'Ekipitu yehanetɨ 'Atsiriya ye'atɨ. 'Atsiriya kiekatari 'Ekipitu mepɨyehu meta 'Ekipitu kiekatarita 'Atsiriya mepɨyehu, yuxexuitɨ mɨkɨ meyunɨtɨ Kakaɨyari mepayexeiyani. 24 'Iya tukaritsie 'Ixaheri puhɨkɨtɨni, 'Ekipitu meta 'Atsiriya meyunɨtɨ, kwiepa memɨtama 'aixɨa mepɨ'itɨarieni wakɨmana. 25 Yawé Naimekɨmɨtɨrɨkaɨye 'aixɨa kaniwayurimɨkɨ, mɨpaɨ 'utaitɨ: «'Aixɨa kani'itɨarieka 'Ekipitu neteɨterima meta 'Atsiriya nemɨwarutawewi, metatsiere 'Ixaheri neteɨterima nemɨwaranayexei memɨhɨkɨ».