1 Kepauka kuyaxi tiwa'aitɨwame menɨ'arie 'Atsiriyatsie ti'aitame Tsarikuni meinɨ'a, 'Atsiruri kiekariyaritsie mekaniu'axɨani, 'ana mɨkɨ mekaniwarutakwini meta mekaniwara'iwa. 2 Mɨkɨ tukaritsie Yawé Kitsariyaxi hetsie kaniutaniuni 'Amuxi nu'aya. Mɨpaɨ katinitahɨawe: «Neuxei, hiwerika kamixayari pemanakatɨkɨ kenanutihɨna meta 'akakai». Mɨpaɨ Kitsariyaxi katiniuyurieni, heumawetɨ 'akaniuyeikakaitɨni meta heumamawetɨ.

3 Hikɨ Yawé mɨpaɨ kaniutayɨni: «Mɨpaɨ kemɨtiuyeikakai nenɨ'ari Kitsariyaxi haika wiyari heumawetɨ meta kaheukakaitɨ, pɨ'inɨari 'Ekipitu meta Kutsi wahetsiemieme, 4 mɨpaɨta, 'ekipitutari memuyutetewiyanikɨ, ti'aitame 'Atsiriya kiekame kaniwaranuhapamɨkɨ memamaweme meta meka'ukakaikame, me'anamamaweme, 'ekipitutari mepanuhapanieni meta Kutsi kemɨ'ane memanutaxɨriyani, yaxeikɨa temari tsepa 'ukirawetsixi. 5 Kemɨ'ane 'Etihupiya hetsie memɨtewiya meta kemɨ'ane 'Ekipitu hetsiemieme memuyuti'ɨre mɨkɨ mepɨtimamani meta mepuyutitetewiya. 6 'Iya tukaritsie haramara tetsita kiekatari mɨpaɨ mepɨtiyuani: “Neuxei, mɨya mepɨte'anuyehu wahetsie temɨtetakwewiekai, wahetsɨa temeta'axekai parewiya teheuyehɨatɨ, ti'aitame 'Atsiriya tatsi'uweiyakaku tahetsie memɨtanuanikɨ. Hikɨtari, ¿hakewa tepeyuta'una?”»