29
Xɨa'ui Rawiri kiekariena
1 Xɨa'ui, 'Ariheri, 'Ariheri,
kiekari hakewa Rawiri metayatsie.
Tawarita xeiwiyari xekenanutiyetsa meta tawarita xeiwiyari,
'ixɨarari tukariyari yakereuyuweiyani.
2 Peru 'Ariheri hetsɨa nekaninuamɨkɨ nemɨtika'enitsitɨanikɨ,
tsuari kanitixuawerimɨkɨ meta hiwerika,
nehetsiemieme tɨɨ yayatsame pɨhɨkɨtɨni mawari matitaiyarɨwatsie.
3 'A'aurie nekanitayerɨmɨkɨ nemetsitamienieke,
kɨyexikɨ nekamanakurarutɨiyatɨyeimɨkɨ,
'akurarutsie temeukatsunaxɨani tekanitiwewiekuni.
4 Nitixaɨtɨ pekatihɨkɨtɨtɨ, kwiepa pe'ukaitɨ pekanitahiwamɨkɨ,
tumuanaripa 'aniuki waɨriyarika xeikɨa kani'eniɨriɨkɨkamɨkɨ.
'Aniuki kwieta kanatinemɨkɨ
tiyumariutame niukieya hepaɨ,
'aniuki tumuanari tsatapaitɨ,
waɨriyarika kaniyu'eniɨriɨkɨkamɨkɨ.
5 Peru memɨyumɨire memɨmetsi'aye'unie
kwie waɨkawa mutumuani mekanakɨnikuni,
meta yumɨiretɨ memɨkateyukanenimaya
kuxari mekanakɨnikuni 'eka mei'enitsitɨwa.
Yapauka, kwitɨwa,
6 Yawé Naimekɨmɨtɨrɨkaɨye 'ahetsɨa kaninuamɨkɨ,
mimierɨkarikɨ kaninuamɨkɨ, kwie watayuitɨwatɨ,
meta waɨkawa tɨranari xuawitɨatɨ,
kaninuamɨkɨ haikɨri 'amɨpa mɨtɨrɨkɨye 'ayu'eriyame hamatɨa
meta tai tiyutaiyame hamatɨa.
7 Memɨyɨmɨire nuiwarite
'Ariheri memɨmietɨwe,
yunaitɨ kemɨ'ane memimietɨwe
meta titatsie mɨtiyutɨrɨkariya,
kemɨ'ane memenutinama,
heinɨtsi hepaɨ mekaniyɨkuni,
heiwa yɨwikɨta mɨtiuniere hepaɨ.
8 Haakamɨkame rekwatɨ mɨtiyuheinɨtsa hepaɨ,
peru manutanieretsie reuhaakamɨkɨni,
harimɨkame heharetɨ mɨtiyuheinɨtsa hepaɨ,
matsi manutanieretsie ranatiwakini.
Nuiwarite mɨpaɨ mekaniyɨkuni yunaitɨ memɨyuwaɨkawa
Tsiyuni hɨriyari memɨmietɨwe.
9 'Atsixekatemaitɨ xekenakɨni, xemamatɨ xekaniuwawetɨ xekeneti'uti,
xekaheunenieretɨ xekenakɨni, tixaɨtɨ tɨma xekatexeiyatɨ,
xekenetarɨweka, peru winukɨ hawaikɨ,
xekenekeitsarietɨweni, peru winukɨ hawaikɨ.
10 Yawé xehetsie kanikawiwieni
'iyari waɨkawa xemeukutsukɨ,
Kakaɨyari niukametemama mekaneniereme puwarayeitɨa,
Kakaɨyari hetsie timiemekɨ memɨtaneniere wahɨxie pɨwareutinaxɨa.
11 Xehetsiemieme, naitɨ 'ikɨ kexemɨteneniere xekanixeiyani xeikɨa nawi kwikwiekametsie 'anukanakame. Xɨka mɨkɨ mukwikwiya xeime xeyetuirieni mɨreutaterɨwawe, mɨpaɨ xɨka xete'itahɨawe: «Pamɨpariyutsi xɨa'ui, 'ikɨ kenakaterɨwa», mɨkɨ mɨpaɨ kanitayɨmɨkɨ: «Nepɨkayɨwe, kananukanaka». 12 Xɨka xeimeta mɨkɨ mukwikwiya xeyetuirieni mɨkatiterɨwawe, xɨka mɨpaɨ xete'itahɨawe: «Pamɨpariyutsi xɨa, 'ikɨ kenakaterɨwa», mɨkɨ mɨpaɨ kanitayɨmɨkɨ: «Matsi nepɨkatiterɨwawe».
13 Ti'aitame mɨpaɨ kanaineni:
«'Ikɨ teɨteri mepɨnetsinɨawa yutenikɨ
meta 'aixɨa mepɨnetehahɨawe,
peru wa'iyari 'ateewa puyeika.
Memɨnetsihayexeiya 'aitsikakɨ xeikɨa mekaniyɨaka
teɨteri yametewa'aitɨakaku.
14 'Ayumieme, tawarita 'ikɨ teɨteri nekaniwahɨxiyatsitɨamɨkɨ
mariwemekɨ netiyurienetɨ,
temaiwawemete kememɨtemaiwawe mekaneiyehɨakuni
kememɨteheutamaiwawekai metematetɨri mepɨka'akɨne».
15 Xɨa'ui kemɨ'ane, kememɨteyuriku me'awietakutɨ,
Yawé hɨxie memuyu'awieta meukatetewatsie,
'axamepɨteyurie yɨwikɨta, meta mɨpaɨ mepɨteku'eriwa:
«¿Kemɨ'ane kuta pɨtatsixeiya? ¿Kemɨ'ane pɨtatsimate?»
16 Keri titayari mɨya meteyɨa.
¿Kamɨtsɨ 'iwewame haxu hamatɨa yaxeikɨa mete'anene?
¿Kamɨtsɨ mutawewiya kemɨ'ane mitawewi mɨpaɨ titahɨawe:
«Mɨkɨ pɨkanetsi'utawewi»?
¿Kamɨtsɨ xari yu'iwewame mɨpaɨ tiutahɨawiwe:
«Mɨkɨ 'atsipɨkatimate»?
17 Riwanu kwitɨwa
kwie 'aixɨa mɨ'ane mɨraku'etsitɨre kanayeimɨkɨ,
meta mɨraku'etsitɨrekaitsie makukariuxaya kanayeimɨkɨ.
18 'Iya tukaritsie memɨkaheu'enana mepɨyɨwaweni
nawi kwikwiyaritsie terɨwarika mayemie memɨ'enienikɨ,
meta memɨkaheuneniere wahɨxite pɨneniereni
muyɨwitsie meta 'etɨriyaritsie me'u'uwatɨ.
19 Tixaɨtɨ memɨkateheuxeiya meyutemamawietɨ Yawé hetsiemieme mekanakɨnikuni,
yemekɨ waɨkawa memɨteheuyehɨwa mekaniyukatemamawikuni Mɨpatsie 'Ixaheri hetsiemieme.
20 Memɨteyukananaima mepɨka'u'uwaniri,
memɨteyukatawe'erie mekanikumawerikuni,
Meta yunaitɨ kemɨ'ane memɨkakutsu 'axameteyurietɨ
mekaneuyehɨiyakuni.
21 Kemɨ'ane niukikɨ xeime hetsie mɨtiɨhɨpa,
kemɨ'ane tixanetɨariwame memɨwiniya,
meta 'itarikakɨ 'aixɨa mɨtiuyeika memɨnanaima.
22 'Ayumieme, Yawé, 'Apɨrahami hetsie nunuwame, mɨpaɨ katiniwarahɨaweni Kakuwu nuiwarimama:
«Kakuwu pɨkayutewiyaniri,
meta yuhɨxie pɨka'ayexetare.
23 Kepauka mɨkɨ yuniwema muwaxeiya,
meta neti'uximayakame mɨkɨ watsata,
mɨkɨ yunaitɨ nepatsiekame mepayeitɨaka kenemɨtitewa,
patsiekame mepayeitɨaka Kakuwu hetsie Mɨpatsie,
meta 'Ixaheri Kakaɨyarieya mepayemakaxeni.
24 Kemɨ'ane 'iyari heuyexɨriekame memexeiyakai yamepɨtehetimani,
meta 'axamemɨteniniukikai yamepɨtetanaki'erieni memɨta'ɨxatsitɨarienikɨ».