30
'Ekipitu hetsie memɨtewiya wahetsiemieme
1 Yawé mɨpaɨ kaniutayɨni:
«Xɨa'ui tɨɨri memɨkaheu'enana
kememɨteyurienikɨ memɨtekuxata nehetsɨa mɨkatimiemekɨ,
ne'iyari kemɨkatinake memɨtekuxata,
'axamɨti'ane waɨkawa memukuxeɨrie,
2 mekanetsi 'uta'iwawiyatɨ 'Ekipitu memeukakɨka,
Parahuni hetsɨa memekɨka wahetsie munuakakɨ,
meta 'Ekipitu 'etɨriyayatɨa memuyu'awieta.
3 Parahuni xehetsie munua xetewiyarika payani.
'Ekipitu hetɨa xemɨ'etɨpie, tixaɨtɨ xetehɨkɨtɨme pɨkaxe'ayeitɨani.
4 Tsepa Tsuhani xemɨwarexeiya paratsiyuta te'uximayatamete,
yatɨni tsepa Kanetsi paitɨ xenɨ'arima memɨte'u'axɨa,
5 yunaitɨ mepɨtewiyatsitɨarieni,
mɨkɨ teɨteri tixaɨtɨ memɨkateyunaki'erie ya'aneme meheutiwiwiexɨaku,
nitixaɨtɨkɨ memɨkatewaparewie meta memɨkawareuyehɨwa,
tewiyarika xeikɨa meta 'atsimepɨkatematé kememɨteyurienikɨ».
6 'Ikɨ kanihɨkɨtɨni kenemutayɨ tewaxi wahepaɨtsita Nekexi makumawetsie memuyekɨka:
Kwiepa kweriwa'anekɨa 'uximatɨarika tsata,
mayetsi mexuawekaku,
kuuterixi mexuawekaku meta kuuterixi memawɨwawe,
mɨkɨ mekatenetɨni puxuri wahetsie
nuiwari tixaɨtɨkɨ memɨkateyunaki'erie mana tita waɨkawa memɨtehexeiyakai,
tita waɨkawa mɨraye'atɨka memɨtehexeiyakai kameyutsixi wahetsie mekatene'ikata.
7 'Ekipitu parewiyaya nitixaɨtɨ pɨkatihɨkɨ,
'ayumieme mɨpaɨ nepɨtiterɨwa: «Xahawi, mɨkakuyuane».
8 Kamɨtsɨ, mɨkɨ wahɨxie kenemie,
meta mexatsie ketina'utɨa.
Nawi kwikwiekametsie kenaka'utɨa,
'uxa'atɨni warie
yamɨre'ukakɨ kemɨtiɨyɨ yuheyemekɨ.
9 'Ikɨ teɨteri memɨkaheu'enana memɨhɨkɨkɨ 'ayumieme,
tɨɨri memɨteyukwamana mekanihɨkɨtɨni,
tɨɨri Yawé 'ɨnɨari niukiyari memɨka'eniku.
10 Memɨtaneniere Kakaɨyari hetsie timiemekɨ,
mɨpaɨ mekateniwakɨhɨaweni:
«Kexemɨtetanenierekɨ xeketeneuhayewa»,
meta Kakaɨyari niukametemama mɨpaɨ mekateniwakɨhɨaweni:
«Tawariri tita yuri mɨraine xepɨkatatekuxaxatɨwani.
Witsimɨranuyɨtɨka pɨta xeketatenekuxaxatɨwani,
xeketenekuxatani witsiketemɨteku'eriwa.
11 Huye xekeneuku'eiri,
mɨkɨ huye xekeneuhayewa,
xeketaneuhayewa Mɨpatsie 'Ixaheri hetsiemieme
kemɨtatsiyurieneni».
12 Mɨpaɨ kanaineni 'Ixaheri hetsie Mɨpatsie:
«Xeme 'ikɨ niuki xepɨkahanu'eni,
'uximatɨarikatsie pɨta yuri xepɨte'uta'eri meta 'axamɨti'anetsie,
mɨkɨtsie pɨta xepuyutɨrɨkariya.
13 'Ayumieme 'axakexemɨte'uyuri xehɨxie pɨtakeni
kuraru 'amatitewa hepaɨ meta 'ukatsitsinitɨ,
hatiweximetɨ:
hikɨ, yapauka, kanatiwemɨkɨ.
14 'Axakexemɨye'uyuri 'etsipepetɨ kanayeimɨkɨ,
'etsipepetɨ, xari mutatare hepaɨ:
nixewitɨ tɨma 'etsiyeutɨ tiyunaki'erietɨ pɨkayuhayewa,
kɨmana tɨɨ taipa manayetɨkɨ pɨkayɨweni
meta putsuta haa muwatihana».
15 'Ayumieme mɨpaɨ kanaineni Yawé naimekɨmɨyɨwe, 'Ixaheri hetsie Mɨpatsie:
«Xɨka xete'uhayewa meta kayuwatɨ xehexeiyatɨ xe'akɨne, xekanitawikweitsitɨariekuni,
'aixɨa 'iyari xe'u'uwatɨ meta yuri xete'erietɨ xekanitɨrɨkariyariekuni,
peru xeme mɨpaɨ xemɨtehetimani xepɨkayuwaɨriya.
16 Xepɨkayɨne mɨpaɨ xeputiyuane: “Tekaniyuta'unakuni kawayutsixi wahetsie te'utetɨ”.
'Ayumieme, mɨpaɨ xekateniyuta'unakuni.
Mɨpaɨ xekaniutiyuaneni: “Kawayutsixi memanautsawawetsie tekananutiyaxikuni”.
'Ayumieme, kwinimieme mehayɨwawetɨ mepayenexɨani memɨwaraye'unie.
17 Yuxewitɨ xekwinekaku,
xeimiriyari xeme xekaniyuta'unakuni,
yu'auxɨwitɨ mexekwitɨwekaku,
xeme yunaitɨ xekaniyuta'unakuni.
Xekaniku'eiriwakuni
hɨritsie kɨye patera manuyewiwierekai hepaɨ
yemuritsie patera 'inɨari hepaɨ».
18 'Ayumieme Yawé kanixekwewieka, mɨxeparewienikɨ,
'ayumieme kanixehahɨaweni kemɨtixenenimaya xemeitimanikɨ.
Yawé Kakaɨyari heitserie mɨtiyurienekɨ.
'Aixɨa meke'itɨarieka kemɨ'ane hetsiena timieme memɨtetakwewie.
19 Teɨteri Tsiyunitari, Kerutsareme xemɨtama, tawariri xepɨkatitsuani. Kakaɨyari mɨtiyukanenimaya pɨxetinenimayata kepauka xemitahiwieni parewiya xeku'iwawatɨ. Yapauka kepauka mɨxe'enieni, pɨxeta'eiya. 20 Tsepa ti'aitame paa mɨxe'umi xemaye'uniwanikɨ meta haa xemu'uximatɨariekakɨ, xeti'ɨkitɨwame tawariri pɨkayuti'awieta, yuhɨxitekɨ xepixeiya. 21 Tsepa tatserieta pemeukuyunixɨ yatsepa ta'utata, 'anakata mɨpaɨ pepɨti'ena niuki mɨpaɨ matikɨhɨaweme: «'Ikɨ mɨkɨ huye kanihɨkɨtɨni, keneuweiyani». 22 Hikɨ memɨkakakaɨyarixi pemɨwarexeiya mekapatsiekame pekaniwarayeitɨamɨkɨ pɨratakɨ meta hurukɨ memɨkawiriyarietɨka, pekaniwarexɨrimɨkɨ tixaɨtɨ mɨkati'itiyaka hepaɨ, mɨpaɨ pekatiniwatahɨawimɨkɨ: «Xekenanuyekɨni».
23 Yawé wiyeri pɨxehanɨ'airieni 'imɨari xemɨka'eni hetsiemieme, meta 'ikwaxi waɨkawa mɨtitixuawere witsipa'aneni. 'Iya tukaritsie xetewama 'ɨxa 'eyeyeumetsie mepɨtetikwani. 24 Tuurutsixi meta puxuri memɨte'uximaya 'aixɨa 'aneneme mume 'etsime mekanitikwaikuni, nakitsaraɨkɨ meta parakɨ teikɨ mewiwiya. 25 'Imieri tukariyari maye'anitsie, kepauka tuxiyu makainariexɨani, 'ana 'akitsie haa 'uhapanetɨ kanayeimɨkɨ meta haixa kanitixuawerimɨkɨ naitsarie hɨritsie 'amutɨtɨtsie. 26 Kepauka Yawé yuteɨterima wa'umete manaku'eimaxɨanitsie meta muwa'uayemanitsie mɨtiwarukwinitɨakai, 'ana metsa tau hepaɨ tixawatɨtɨ kanayeimɨkɨ, meta tau xawatɨriyaya 'atahutamexɨa tawarita xawatɨtɨ kanayeimɨkɨ, tau 'axeikɨa 'atahutatɨ mɨkɨxeni hepaɨ.
27 Neuxei. Yawé kemɨtitewa 'ateewa kanamieni,
haxɨakɨ tatɨ waɨkawa kɨtsi 'anawietɨ,
tenieyatsie pɨhɨpɨne haxɨa,
nenieya tai mɨtiyuxɨtsitɨwa hepaɨ pɨ'ane.
28 'Iyaya haa manatiyeurieni hepaɨ kani'aneni
takɨipitɨa paitɨ pɨye'axe,
nuiwarite kaniwaranuyekatsimɨkɨ
katsemetsie wareuyehɨanike.
Teɨteri wateta kaniwarutakeitsitɨani
pirenu yeuta memeukuyunekɨ.
29 Xeme xeputikwikani patsiekamekɨ memuyukuxexeɨriwa tɨkariyaritsie hepaɨ,
xe'iyarite puyutemamawieka,
kepauka xewitɨ manutiyani pirikɨxa 'uhɨtsieximetɨ hepaɨ
Yawé hɨrieyatsie,
'Ixaheri 'Aiya hetsie.
30 Yawé katani'enitɨamɨkɨ yuniuki mɨmariwe,
yutɨrɨkariya tahɨxie kanikatetɨamɨkɨ:
haxɨaya mutarɨrɨrɨka meta taiya mɨtiyuxɨxɨtsitɨwa,
haa tsata, 'eka tsata meta tee tsata.
31 Yawé niukieya 'Atsiriya kanitimuraxɨamɨkɨ,
yu'itsɨkɨ kaniwamɨkɨ.
32 Xei'iwaɨyɨyarikɨ Yawé hetsiena kemɨranutatetɨwa
yukɨye 'iwaɨyɨpame mɨtiyukwinitɨwakɨ
tepu meta haripa hayuanekaku katiniyurimɨkɨ,
yumamá 'uyuitɨwatɨ, kaniwatakwimɨkɨ.
33 Tupeti meripaitɨri kaniyukuha'aritɨani,
ti'aitame hetsiemieme kanihɨkɨtɨni.
Teeka kaniwati'inierieni heukatewatɨ 'awatiyeutɨ,
waɨkawa tai meta kɨyexi hexeiyame,
Yawé 'ihɨtsieyu kanitaimɨkɨ,
tai hayari hatɨa muhaneni hepaɨ.