42
Yawé ti'uximayatsiriwame
1 »'Ikɨ neti'uximayatsiriwame kanihɨkɨtɨni, nemiparewie,
nemenayexei, hetsiena mieme nemɨnetemawie,
ne'iyari hetsiena nekaniupitɨani,
kemɨtiheitserie nuiwarite watsata yakatiniyurimɨkɨ.
2 Pɨkatahiwa, pɨka'enierieni 'utahiwatɨ,
kaye 'utɨma pɨkatahiwa.
3 Haka mutapɨnarie pɨka'anumura,
kɨxeme witayari tsepa mɨkwauniya pɨka'ikutɨtsani.
Kemɨtiheitserie yuheyemekɨ yapɨtiyurieni,
4 pɨkatirukuniuni meta pɨkatiwaɨripieni
kepaukake kemɨtiheitserie mitatse'iriya.
'Ateewa haramara tetsita kiekatari 'inɨari niukiyarieya mepɨtakwewie».
5 Kakaɨyari mɨpaɨ kanaineni, Yawé,
kemɨ'ane muyuawi mutawewi meta mitaweraxɨ,
kemɨ'ane kwie mukama,
meta tita mana mɨtixuawe,
mana kiekatari teɨteri wa'iiya muwapitɨa,
tukari muwapitɨa mana memu'uwa:
6 «Ne, Yawé, heitseriemekɨ nepɨmatsi'anayexei,
'amamatsie nepɨkawierixɨ.
Ne nepɨmatsi'utawewi,
ne tɨratu nepɨmatsi'ayeitɨa teɨteri wahetsiemieme,
hekɨariya pemɨhɨkɨtɨnikɨ nuiwarite wahetsiemieme,
7 memɨkaheuneniere pemɨwaranutanieritɨanikɨ,
pɨretsutsixi pemɨwarayehapanikɨ,
meta kemɨ'ane yɨriya tsata memu'uwa pemɨwarayehapanikɨ.
8 »Ne Yawé nekanihɨkɨtɨni, mɨpaɨ nekatinitewaka.
Hipame kenemɨtimariwe nepɨkawapitɨa,
meta nenɨawari kakaɨyarixi nepɨkawapitɨa.
9 Meripaitɨtimieme pɨraye'atɨarieri,
hikɨta hekwame nepɨtikuxata,
mɨpaɨ katiyɨwekaku 'akuxi nepɨtikuxata».
Kwikari nɨawari Yawé hetsiemieme
10 Yawé hetsiemieme xeime kwikari hekwame xekeneutakwika,
xeme, haramaratsie xematineika,
meta yunaitɨ mana xemɨye'uwa,
xekeneutikwikani kwie manu'axe xemɨtitei,
xeme, 'ateewa haramara tetsita xemɨtitei.
11 Xeme makumawetsie meta kiekarite mana mukumane xekeneutihiwani,
meta kiekarite hakewa Tseraxi meyeika.
Tsera kiekatari temawierikakɨ meke'utikwikani,
meta meke'utihiwani hɨri 'amanutitɨtɨtsie paitɨ.
12 Yawé mariwemekɨ xekenekuxatani
kwikarieya xekeneutikwikani 'ateewa paitɨ haramara tetsita.
13 Yawé kanayeyeimɨkɨ kuya yumemiwame hepaɨ,
tewi yumemiwame hepaɨ 'ɨtetsatɨ.
Hiwaritsata kaniyutamiemɨkɨ,
memeye'unie kaniwara'iwamɨkɨ.
14 «Mɨixa tukari kayuwatɨ neputamarixɨ,
nepɨka'utaniuka meta nepɨtinewie.
Peru hikɨ nepɨtahiwa niweyame hepaɨ,
nekanitatsuamɨkɨ ne'uta'aiwatɨ kukuiniyakɨ.
15 Hɨrite yemurite nekaniti'unamɨkɨ,
naime mana mɨtixuawe nekatinitiwatsiɨxamɨkɨ,
haa manuyehapane nekanikawatsiɨxamɨkɨ,
meta haa muyemanetsie,
16 memɨkaheuneniere nekaniwaranuwitɨmɨkɨ huyeta memɨkahemaririetsie,
huyeta nepɨwaranuwitɨni xewitɨ mɨkahemarietsie,
wahetsiemieme yɨriya hekɨariya nepayeitɨani,
nepakuweririta mɨkahakuweweritsie.
Mɨpaɨ nekatiniyurimɨkɨ,
meta nepɨkawaku'eirieni.
17 Peru kakaɨyarixi wahetsie memɨtewiya mepeuyexɨrieni meta tewiyarika mehexeiyatɨ mepakɨne,
kemɨ'ane wewiyakate mɨpaɨ memɨtewakɨhɨawe:
“Xeme takakaɨyarixi xekanihɨkɨtɨni”.
'Ixaheri mɨkaheuniere meta mɨkaheu'ena
18 »Xemɨkaheu'enana, xekeneu'enana.
Xemɨkaheuneniere, xekeneɨyɨ'ɨwiya.
19 ¿Kemɨ'ane matsi waɨkawa pɨkaheuniere keyuri neti'uximayatsiriwame,
meta kemɨ'ane matsi waɨkawa pɨkaheu'ena keyuri neniuki tuayame?
¿Kemɨ'ane matsi waɨkawa pɨkaheuniere keyuri nenɨ'ari,
meta kemɨ'ane matsi waɨkawa pɨkaheuniere keyuri Yawé ti'uximayatsiriwame?
20 'Ekɨ pepɨtiuxei waɨkawa,
peru 'atsipepɨkaretimaiwe,
pepɨwatixaxawa 'anakata,
peru nitixaɨtɨ pepɨkati'enie».
21 Yawé puyukatemawi,
kemɨtiheitserie tinaki'erietɨ,
'aitsikaya mɨmariwenikɨ witsi'anetɨ.
22 Peru 'ikɨ teɨteri mepɨte'unawatsiyarie meta mepɨte'unawaiyarie yupiinite,
yunaitɨ terɨta meputiwiyarie
yatɨni mepanutaxɨriya xaɨtsie paitɨ.
Mepɨte'unawatsiyarie,
nixewitɨ wahetsie pɨkanua,
mepɨte'unawaiyarie yupiinite,
nixewitɨ wahetsiemieme pɨkahaniuka.
23 ¿Kemɨ'ane xeme 'ikɨ pɨti'enieni,
'arikeketa kemɨ'ane 'ikɨ pɨtitaxata?
24 ¿Kemɨ'ane Kakuwu pɨyetua mɨtinawaiyarienikɨ yupiinite
yatɨni kemɨ'ane 'Ixaheri pɨyetua mɨtinawatsiyarienikɨ?
Yawé kanihɨkɨtɨni kemɨ'ane
hetsiena mieme teɨterimama 'axamemɨte'uyuri.
Huyeya mepɨka'anukuwei
meta 'aitsikaya mepɨka'anu'eni.
25 'Ayumieme Yawé hetsiena
yuhaxɨa pukawiwi, haxɨa kuyaxa mieme pipitɨa.
Taikɨ penukana, peru 'atsipɨkaretima,
pitaxɨtsitɨa, matsi mɨkɨ yakɨ yɨaneme puta'eri.