43
Tiyuwikweitsitɨwame muyuxewi 'Ixaheri hetsiemieme
1 Peru hikɨ Yawé mɨpaɨ kanaineni,
Kakuwu, mɨmatsi'unetɨa,
'Ixaheri, mɨmatsi'uta'iwewaxɨ:
«Pepɨkamaka, ne nekameniutawikweitsitɨani,
ne nekamenahɨaweni kepemɨtitewakɨ, 'ekɨ nehetsɨa mieme pekanihɨkɨtɨni.
2 Kepauka hapa pemuyani,
ne 'ahamatɨa nekaniumiemɨkɨ,
kepauka hatuxametsie pemanuyani,
haa 'aheima pɨka'uyeuriweni,
kepauka taipa pemumieni,
pepɨkakwaxe pepɨkatatani,
3 Ne Yawé nekanihɨkɨtɨni, 'akakaɨyari,
Mɨpatsie 'Ixaheri hetsiemieme, matsiwikweitsitɨwame,
ne 'Ekipitu nekaniyetuani nemɨtinetuanikɨ 'ahetsiemieme nemɨmatsitawikweitsitɨanikɨ,
Kutsi meta Tsewa mame.
4 'Ekɨ 'ahetsiemiemekɨ teɨteri nekaniwayetuamɨkɨ,
'atukari hetsiemieme hipame kiekari nekaniwayetuamɨkɨ.
Ne nemɨmatsinaki'eriekɨ, witsinemɨmatixeiyakɨ meta
'ekɨ waukawa pepɨraye'axe.
5 Pepɨkamaka, ne 'ahamatɨa nekaniuyeikani,
tau manatineika hepa meme'uwa 'anuiwarima nekaniwa'atɨamɨkɨ,
meta tau makayuyuipike hepa meme'uwa nepɨwa'atɨani nemɨxekuxeɨrienikɨ.
6 Tayeta mieme mɨpaɨ nekatinitahɨawimɨkɨ: “Keniwayetua”
meta tatsutɨa mieme mɨpaɨ nekatinitahɨawimɨkɨ: “Pepɨkawarukununuitɨwani”.
Xekeniwa'atɨa neniwema 'ateewa paitɨ memu'uwa
meta neniwema 'ukari kwie manu'axe memu'uwa.
7 Yunaime xekeniwa'atɨa kemɨ'ane nehetsiemieme mematerɨwarɨwa,
kemɨ'ane mɨnetsinɨawanikɨ nemitawewi,
kemɨ'ane nemitawewi meta nemita'iwewaxɨ”».
8 Kiekari mɨkaheuniere xekenayeweiya, tsepa netɨ mɨrekahɨxi,
kiekari mɨkaheu'ena, tsepa netɨ nakate mexeiya.
9 Meke'uyukuxeɨrieni yunaitɨ nuiwarite
meta kiekarite mekeyukuxexeuriwani.
¿Kemɨ'ane mɨkɨ watsata xewitɨ 'ikɨ niuki putaxataxɨ
meta kemɨ'ane pɨtatiutaxatɨa meripaitɨ kemɨtiɨyɨ?
Memunenierixɨ mekewaruxeɨrieni
mɨmatsiɨkɨrekɨ kename yuri me'utiyuane,
hipatɨta memɨ'enananikɨ mɨpaɨ memɨtiyuanikɨ:
«Puyuri».
10 Yawé mɨpaɨ kanaineni:
«Xeme nehetsɨa miemete xekanihɨkɨtɨni xemunenierixɨ,
nete'uximayatsiriwamete nemɨxe'anayexei,
xemɨnetsimatenikɨ meta nehetsie yuri xemɨte'eriekakɨ,
meta mɨpaɨ xemɨtemaikakɨ kename Ne nehɨkɨ.
Meripaitɨ ne 'akuxi neka'uyeikakaku xewitɨ kakaɨyaritɨtɨ 'apɨka'uyeikakai,
meta ne'utɨma xewitɨ pɨkatineni.
11 Ne, Yawé nekanihɨkɨtɨni,
tawarita xewitɨ tiyuwikweitsitɨwame kaniumaweni.
12 Ne nekatiniutaxata, nekanixe'utawikweitsitɨani meta neniuki nekaniutaxata.
Ne nekatiniuyurieni xetsata, hawaikɨ xewitɨ kakaɨyaritɨtɨ mɨpaɨ pɨkatiuyuri».
Yawé mɨpaɨ kanaineni:
«Xeme xemunenierixɨ xekanihɨkɨtɨni,
neta Kakaɨyari nekanihɨkɨtɨni.
13 Meripaitɨtɨ, Ne nekanihɨkɨtɨni.
Nixewitɨ nemamatsie muyuxɨna pɨkayɨwe.
Kenemɨtiyurieni, nixewitɨ pɨka'itatara».
Kakaɨyari kemɨtiyukanenimaya 'Ixaheri ke'axamɨtiuka'iyari
14 Yawé mɨpaɨ kanaineni,
xewikweitsitɨwame, Mɨpatsie 'Ixaheri hetsiemieme:
«Xehetsiemieme teɨteri Wawiruniya nepɨwaranɨnɨ'ani,
yunaime nepɨwataxɨriexɨani yu'unamete nepuwarayeitɨani.
Kanuwa 'amupapa hetsie kɨmana memɨyuti'ɨrekaitsie,
karireutsixi nepɨwara'iwa.
15 Ne Yawé nekanihɨkɨtɨni, mɨpatsie,
tixe'aitɨwame, 'Ixaheri nuiwariyari nemukama».
16 Yawé mɨpaɨ kanaineni,
kemɨ'ane haramaratsie huye mutawewi,
'anuyeyɨkɨme mayeitɨa haramara 'uyuanekaku,
17 kemɨ'ane kaxetate kuyaxamieme mɨwarayewitɨ meta kawayutsixi,
kuyaxi meta kuyaxa wewiwamete,
mɨkɨ 'amemukuhi tawarita memɨka'anuku'unikɨ,
kɨxeme witayari hepaɨ kaniɨtɨni:
18 «Xeketenatɨmaiya meripaitɨ timieme,
meripaitɨ hepaɨ xepɨkate'u'uwani.
19 Hekwame nekatininetɨamɨkɨ.
'Ari yakatiniyɨaneni, ¿Kari xepɨkatemate?
Makumawetsie huye nekaniwewieneni,
meta nitixaɨtɨ mɨkaranuyeikatsie haixa nekaniwewieneni.
20 Yeuta memɨte'u'uwa mekanenayexeiyani,
yawixi memayu'eririya meta 'aruxi 'amemɨnene,
haa makumawetsie nepanenetɨwa,
meta nitixaɨtɨ mɨkaranuyeika hatuxame nekananuyetu'ani,
neteɨterima nemɨwaranayexei nemɨwatiharitɨanikɨ,
21 neteɨterima nehetsiemieme nemuwarutawewi,
memɨnetsinɨawanikɨ naitsarie.
22 »Peru 'ekɨ Kakuwu, pepɨkanetsihahɨawe,
'ekɨ 'Ixaheri, peputi'uxixɨ nehetsiemieme.
23 Muxa pepɨkanetsi'atɨiriewe 'amawari taiyariyari,
nehetsiemieme yapepɨkatikamie 'amawarikɨ.
Peru nepɨkamatsi'uximatɨa hatsi mawariyari pemɨwewienikɨ,
meta 'ɨkwa witsimu'ɨa pemɨtaiyakɨ.
24 Pepɨkanetsinanairiewe 'uwá witsimu'ɨa,
meta 'amawarite wiyayarikɨ pepɨkanetsihuxaitɨa.
Matsi, 'ekɨpɨta 'axapepɨneranutahɨawe 'axakepemɨtiuyurikɨ
meta pepɨnetsiwaɨripitɨa 'axapetiyurienetɨ.
25 »Ne matsi nekɨmana nemɨnenaki'eriekɨ
'aitsikaya pemutitsanaxɨkɨ nekananuyeitɨani,
meta tawariri 'axakepemɨtiuyurikɨ nepɨkaha'eriwa.
26 Kenenaye'eritɨa kuta. Tepuyutaxaneta,
yakeneutayɨki xɨka yakɨ xeikɨa petiukwinitɨarieni.
27 'Axiɨyari mexɨakame 'axakatiniuyurieni,
'aniukamete menetsi'aye'unietɨ mekanakɨne.
28 'Ayumieme tukita memɨte'uximayakai nitixaɨtɨ nepɨkatiwarayeitɨa,
Kakuwu nepɨyetua mɨka'unarienikɨ naitɨ,
'Ixaheri nepɨyetua mɨtixani'eriwakɨ.