44
'Ixaheri manayexeiyarie
1 »Peru hikɨ, Kakuwu, neti'uximayatsiriwame,
'Ixaheri, nemɨmatsi'anayexei, keneu'ena.
2 Yawé mɨpaɨ kanaineni, kemɨ'ane mɨmatsi'unetɨa,
kemɨ'ane 'amaama hetsie mɨmatsikaye,
mɨkɨ pɨmatsiparewimɨkɨ:
“Kakuwu pepɨkamaka, neti'uximayatsiriwame,
Ketsuruni, nemenayexei,
3 kwie meuharimɨkɨ hakɨ nekanakuhatuiyamɨkɨ,
kwie mɨwaki, haixa 'akiyari nekaniuyetuaxɨamɨkɨ,
ne'iyari 'anuiwarima nekaniwapitɨamɨkɨ,
meta 'aixɨa nekaniwayurimɨkɨ kemɨ'ane memɨtiyɨrarɨme 'anuiwarima,
4 Mayeweritsie tupiriya kemɨranukɨyɨyɨra mɨpaɨ mepɨtetayɨra,
hapuri 'aki'utɨma mɨnewe hepaɨ.
5 Xewitɨ mɨpaɨ pɨtayɨni: ‘Yawé hetsɨa nepɨmieme’,
xewitɨta Kakuwu nuiwarieya payuyeitɨwani,
xewitɨta yumamatsie mɨpaɨ pɨre'utɨaka: ‘Ne Yawé hetsɨa nepɨmieme’,
meta 'Ixaheri pɨtiyuterɨwani”.
Yawé meta kakaɨyarixi memɨwewiyatɨka
6 »Yawé mɨpaɨ kanaineni, Yawé Naimekɨmɨtɨrɨkaɨye,
'Ixaheri ti'aitameya meta 'iwikweitsitɨwame:
“Ne mexɨakame nekanihɨkɨtɨni meta 'imatɨreme netɨhɨkɨ,
tawarita xewitɨ kakaɨyaritɨtɨ kaniumaweni.
7 ¿Kemɨ'ane nehapaɨ pɨ'ane?
Yake'utayɨni.
Yake'utayɨni kemɨratiyɨxime
kepauka nekiekari meripaitɨtɨ nemukamatsie,
yake'utayɨni kemɨtiyɨni 'arike,
kehepaɨ mɨtiyɨni ketikuxatani.
8 Xepɨka'uyɨyɨakatɨkani nixepɨkamamaka.
¿Xekateha'eriwa nemitahekɨataxɨ meripaitɨ?
Xeme xemunenierixɨ xekanihɨkɨtɨni.
¿Tawarita xewitɨ Kakaɨyari tiuyeika?
Hawaikɨ, tawarita xewitɨ 'Ai pumawe,
ne xeime tawarita nepɨkamate”».
9 Kakaɨyarixi memɨwatiwewiwa tixaɨtɨ mepɨkatehɨkɨ,
wawewiya kwinimieme mɨraye'axe yakɨxeikɨa pɨtihɨkɨ.
Yutewinɨarika puyuriene,
kemɨ'ane memixeiya mepɨkatemate mepɨkaneniere.
10 ¿Kemɨ'ane kakaɨyaritɨme puwewie yatɨni tepɨakɨ pitakwaxiya
nitixaɨtɨ katiyunaki'eriekame hetsiena mieme?
11 Kemɨ'ane memeyexeiya mɨkɨ mekaniyutewiyatsitɨakuni,
tewewiwamete teɨteri xeikɨa mepɨhɨkɨ.
Yunaitɨ mɨkɨ nehetsɨa mekeye'axɨani,
memamatɨ meta meyutetewiyatɨ yunaitɨ mɨkɨ mekaniyuhayewakuni.
12 Tepɨakɨ ti'uximayatame tepɨa kaniutikwekweweni,
kɨmana tɨɨpa katini'uximayaka,
titsunamekɨ kakaɨyaritɨme kaniutawewiwani,
kemɨreutɨrɨkaɨye katiniuta'uximayatani.
Heuhaakamɨtɨ, 'uxetɨ,
kaharetɨ, meta 'ari 'anutarɨwewetɨ.
13 Kɨyekɨ ti'uximayatame katiniuti'inɨnɨatani ti'inɨnɨatamekɨ,
katiniuta'utɨwani kɨyetsie,
tepɨa 'i'inemekɨ katiniuta'uximayatani,
meta xikɨraɨyeme kaniutawewiwani.
Tewi hepaɨ 'aneme kaniutawewiwani,
tewi mu'uya kaniuta'ɨkeni,
tukita mayewenikɨ.
14 Kariuxa mekanawitekeni,
huku mɨxexeurawi meta tuaxa mekaniutayayatsani,
mana mekanikuhayeikawani mɨtiwawerekɨ,
yatɨni huku mekaniukayayatsani wiyeri mitiweriyakɨ.
15 Tewi tikwaxiyamekɨ kaneiyehɨaka,
yapaɨmemekɨta kaniutikɨxeweni,
'atinaime papa kaniuta'ɨariyani.
Metatsiere kɨmana kakaɨyaritɨme kaniutawewiwani hɨxiena kaniukatunumakekani,
kakaɨyaritɨme tawewieme hɨxiena kanakatutsitani.
16 Hixɨapa 'akame kɨyexi kanititaiyani,
mɨkɨkɨ yu'ikwai kaniukawewiwani,
mana wai kaniutawarɨkani, mɨkɨkɨ kaniutahuxarɨwani.
Metatsiere kaniutikɨxeweni, mɨpaɨ 'utaitɨ:
«'Ari nepɨtaxɨrirɨmeri,
tai ne'anutaxeiyatɨ».
17 Peru yapaɨmetɨ mɨyuhayewaxɨkɨ, yukakaɨyaritɨme kaniutawewiwani,
hɨxiena kaniukatunumakekani.
Waɨkawa 'iwawirietɨ mɨpaɨ tikɨhɨawetɨ:
«Keneneutawikweitsitɨa, 'ekɨtsɨ nekakaɨyari pekanihɨkɨtɨni».
18 'Atsimepɨkatemate, tixaɨtɨ 'atsimepɨkatehetimaitɨkɨka,
wahɨxite peukutsiku, mepɨkaneniere,
mepɨkatemaiwawe, mepɨkaheiti'enietɨkɨka.
19 Memɨtemaika meta memɨtemaiwaweni pɨwareuyehɨwa,
mepɨkayu'iyaritɨa meta mɨpaɨ mɨtayɨni mepɨkayɨwawe:
«Kɨye hixɨapa 'akamekɨ nepatinai,
papa nekaniuta'ɨariya tɨɨtsie,
wai ne'utawarɨkaka nepitakwai.
¿Kamɨtsɨ netiyɨwe tixaɨtɨ tixani'eriwame nemayeitɨani kɨyexi mana mɨtihekɨ?
¿Kɨye yatewime hɨxie netititunumakeni?»
20 Naxikɨ mepɨtekwa'a,
xe'iyari kemɨtiyɨkɨhɨawe xepiweiya pɨtixe'itaiya,
yɨkɨmana xemuyutawikweitsitɨani xepɨkayɨwawe, meta mɨpaɨ xemutiyuani:
«'Ikɨ nemɨrexeiya katini'itarikatɨni».
21 «Kakuwu kena'eriwani 'ikɨ,
'ekɨ neti'uximayatsiriwame pekanihɨkɨtɨni, 'Ixaheri.
Ne nekameniunetɨani, 'ekɨ neti'uximayatsiriwame pekanihɨkɨtɨni,
'Ixaheri, ne nepɨkametsihatɨmaiya.
22 'Aitsika pemutitsanaxɨakɨ neputayeitɨa haiwitɨri ximeri mieme hepaɨ,
metatsiere ke'axapemɨtiuyuri nepekuyeitɨa haɨtsi hepaɨ.
Nehetsɨa kenenua, nekameniutawikweitsitɨani».
23 Muyuawi taheima mieme temawierikakɨ xekeneutikwikani,
Yawé 'ikɨ katiniuyurieni.
Karima xekeneutihiwani,
meukatewatsie kwieta.
Hɨrite xekenekwikani,
meta muhukuya, naitɨ yukɨyeximatɨ.
Karikɨ Yawé Kakuwu kaniutawikweitsitɨani,
Kakaɨyari kemɨtimariwe 'Ixaheri kaniuhekɨatsitɨiya.
Kerutsareme tawari kiepa kemɨratɨa
24 «Yawé mɨpaɨ kanaineni, Metsiwikweitsitɨwame,
kemɨ'ane 'amaamatsie mɨmetsikaye:
»“Ne Yawé nekanihɨkɨtɨni,
naime mɨtiutiwewi,
ne nexaɨta muyuawi 'anekaniuyemani
meta kwie 'anekanikumani.
¿Kemɨ'ane 'ana nehamatɨa puyeikakai?
25 »”Kakaɨyari niukametemama memɨte'itawa wa'inɨari yanepɨkaraye'atɨwa,
meta memɨtehetimamateke nepuwatewiyatsitɨa,
memɨtemaiwawe mekatemaiwaweme nepɨwarayeitɨwa
meta kememɨtemaiwawekɨ tixaɨtɨ katiyunaki'eriekame nepayeitɨwa.
26 Nete'uximayatsiriwamete waniuki nepaye'atɨwa
meta netupiritsixi waniuki nepaye'atɨwa.
Ne mɨpaɨ nekanaineni Kerutsareme tawarita kiepa kanayeimɨkɨ,
kiekarite Kura kwieyaritsie miemete kananukakitsiemɨkɨ,
mu'u'uni 'aixɨa kaniti'itɨariemɨkɨ.
27 Ne mɨpaɨ nekanaineni haramara mɨmariwe ke'akawani,
meta haa mana meukayuyune ke'ukawaxɨani.
28 Ne mɨpaɨ nekanaineni Tsiru nemuxatsi wahɨweme kanihɨkɨtɨni,
kemɨnetinake mɨkɨ yapɨtikayani,
yapɨtitanaki'erieni Kerutsareme manukakitɨarienikɨ,
meta tuki tenariyari manukuwewiyanikɨ”».