45
1 Yawé mɨpaɨ Tsiru katinahɨaweni, menayexei,
kemɨ'ane mamaya tserietanatsie mɨtiwierixɨ
nuiwarite mɨtiwata'aitɨanikɨ,
meta te'aitamete watepɨate mɨwanawairienikɨ,
memanutakɨnetsie kiteniete mɨreuyepiexɨanikɨ,
meta kiteniete reuyepietɨkaime mɨhayewaxɨanikɨ:
2 «'Ahɨxie nepumieni,
hɨri meutiteitsie nepɨrakuweririta,
wurunitse 'itupariyarite nepɨtitara,
meta tepɨa meuku'uwetɨka nepanuxitexɨani.
3 Yɨwita timieme mɨraye'axe nepɨmatipitɨani,
meta piinitɨarika 'awie mɨti'utsie,
ne Yawé nemɨhɨkɨ mɨpaɨ pemɨtimaikakɨ,
'Ixaheri Kakaɨyarieya, kepemɨtitewakɨ mɨmatsihaterɨwa.
4 Kakuwu neti'uximayatsiriwame hetsiemieme,
'Ixaheri nemenayexei,
nepɨmetsihahɨawe kepemɨtitewakɨ,
meta 'aixɨa pemɨtixeiyariekakɨ mɨpaɨ nepumatiuterɨwaxɨ,
tsepa 'ekɨ pemɨkanetsimate.
5 Ne Yawé nekanihɨkɨtɨni, tawarita xewitɨ pumawe,
tawari xewitɨ Kakaɨyaritɨtɨ pumawe.
Tsepa 'ekɨ pemɨkanetsimate,
ne nepɨmatsitɨrɨkariyani,
6 mɨpaɨ xemɨtemaikakɨ tau manatineika hepatsie meta makayuyuipiketsie
tawarita xewitɨ Kakaɨyari kaniumaweni.
Ne Yawé nekanihɨkɨtɨni, tawarita xewitɨ kaniumaweni.
7 Ne hekɨariya nekaniunenetɨwani meta yɨriya,
'aixɨa mɨti'ane nekatini'atɨwani meta 'uximatɨarika,
ne, Yawé, naime 'ikɨ nekatiniunenetɨwani.
8 »Wiyeri keneukaxɨrɨwani muyuawi meutitewatsie,
haiwitɨri, tita mɨtiheitseriekɨ keneukawiwiyeni.
Kwie huhutakatɨ ke'anutayepierixɨani.
Wikweitsitɨarika ke'utineni.
Hamatɨana ke'utawere tita mɨtiheitserie.
Ne, Yawé, nekaninetɨani».
9 Xɨa'ui kemɨ'ane mɨniukixie mitawewi hepaɨtsita.
Xɨa'ui kemɨ'ane mɨtari
mɨtitariwe kwiepa timieme tsata.
¿Kamɨtsɨ tiyɨwe haxu kemɨ'ane mipɨna mɨpaɨ mɨtiutahɨawe:
«Kepemɨtiyuriene kene'a'ɨwiya.
'Aye'ɨ pɨkahawiwietɨkari.»?
10 Xɨa'ui kemɨ'ane yupaapa mɨpaɨ mɨranutahɨawe:
«Neuxei ketitayari penetiutinuiwitɨa».
Xɨa'ui yumaama mɨpaɨ mɨranutate'a:
«Neuxei ketitayari penetiutiniwexɨ».
11 Yawé mɨpaɨ kanaineni,
Mɨpatsie 'Ixaheri hetsiemieme, mitawewi:
«Xeme neniwema wahetsiemieme xemɨnetsi'uta'iwawiya 'uxa'atɨni kemɨtiwayurieni pɨkayɨwe,
yatɨni yaxemɨnetetahɨawekɨ kenemɨtiyurienikɨ.
12 Ne kwie nekaniutawewieni,
hetsiena teɨteri nekaniwarunetɨani.
Nemamate katiniuyurieni muyuawi 'amuyemanaxɨ,
meta mana xurawetsixi memuyeyaxekɨ nekaniwaruta'aitɨani.
13 Tsiru hetsiemieme kemɨtiheitseriekɨ nekatiniyurimɨkɨ,
huyeya heitserie nekaniuyetemɨkɨ.
Mɨkɨ nekiekari kananukuketɨamɨkɨ,
meta kemɨ'ane memanutaxɨriya kaniwatixɨnamɨkɨ,
peru tixaɨtɨ tuminikɨ meta 'axamɨtayɨnikɨ xɨka xewitɨ tumini 'i'ɨitɨaka.
Ne mɨpaɨ nekanaineni, Yawé Naimekɨnemɨtɨrɨkaɨye».
14 Yawé mɨpaɨ kanaineni:
«'Ekipitu mɨtiwewiya meta piinitɨarika Kutsi timieme,
naitɨ 'apiinite katinayeimɨkɨ,
tsaweutsixi, teɨteri kwinimieme memɨtɨtɨ,
'a'utɨa mepuhuni tepɨakɨ mehɨatɨkaitɨ.
'Ahɨxie mepɨtitunuma'uni,
waɨkawa memetsiwawirietɨ mɨpaɨ mepɨtiyuani:
“Yuxewitɨ xeikɨa Kakaɨyari 'apuyeika tawarita xewitɨ pumawe,
mɨkɨ Kakaɨyari 'ahamatɨa puyeika”».
15 'Ekɨ, Kakaɨyari meta 'Ixaheri wikweitsitɨwame,
'ekɨ Kakaɨyari pemɨkahekɨa pepɨhɨkɨ.
16 Yunaitɨ kemɨ'ane kakaɨyarixi memɨwawewie
mepɨtewiyatsitɨarieni meta nitixaɨtɨ mepɨkatehayeitɨarieni,
nitixaɨtɨ mekatehɨkɨtɨtɨ mepɨyehu.
17 Peru 'Ixaheri Yawé pitawikweitsitɨani,
yuheyeme wikweitsitɨarikakɨ,
tawarita hatsuaku pɨkatewiyatsitɨarieni
meta tawariri tixaɨtɨ pekatihɨkɨtɨtɨ pepɨka'ayeitɨarieni.
18 Karikɨ Yawé mɨpaɨ kanaineni,
kemɨ'ane muyuawi 'amuyema,
Kakaɨyari kwie mutawewi,
minetɨa meta 'amiyeye,
makumawenikɨ mɨka'itawewi,
mitawewi mana mɨkiepatɨnikɨ:
«Ne Yawé nekanihɨkɨtɨni,
tawarita xewitɨ kaniumaweni.
19 Hawaikɨ 'ikɨ kwieyari mɨyɨwitsie
'awiekamekɨ nepɨkaxetahɨawiwe.
Meta Kakuwu nuiwarimama mɨpaɨ nepɨkatiwatahɨawiwe:
“Xekeneneutiwawa peru xepɨkanetsitaxeiya”.
Ne, Yawé, nepɨtikuxata tita mɨtiheitserie,
meta yanepaine tita 'aixɨa mɨti'anekɨ.
20 »Xekeneuyukuxeɨri xemeyuta'unaxɨa nuiwarite watsata,
xekeneuyukuxeɨri, xekenakɨni.
'Atsimemɨkatemate mekanihɨkɨtɨni kemɨ'ane kɨye kakaɨyarixiyari memɨwarɨ'ɨ,
meta kakaɨyarixi wahɨxie memuyunenewixime memɨkateyuwikweitsitɨwa.
21 Yaxekeneutiyua,
xeketeneutahekɨata.
¿Kemɨ'ane 'ipaɨ putayɨ meripaitɨ,
kemɨ'ane yaputayɨ meripaitɨ?
¿Kamɨtsɨ ne, Yawé, yanekatiutayɨ?
Tawarita xewitɨ Kakaɨyari kaniumaweni,
Kakaɨyari heitserie hexeiyatɨ meta tiyuwikweitsitɨwatɨ,
tawarita xewitɨ kaniumaweni.
22 »Nehetsɨa tawarita xekeneu'axɨa, xemɨtawikweitsitɨarienikɨ,
yunaitɨ kwie manu'axetsie paitɨ xemu'uwa,
karikɨ ne nekanikakaɨyaritɨni, tawarita xewitɨ kaniumaweni.
23 Ne mɨpaɨ yurikɨ nekaniuyuhɨritɨani nehetsiemieme,
heitseriekamekɨ yanekaniutayɨni
niuki nemɨka'ipatakɨ:
Nehɨxie yunaitɨ mepɨkatunuma'uni,
nehetsiemieme yamepɨteyuhɨritɨani yunaitɨ teɨteri.
24 Mɨkɨ mɨpaɨ mepɨtiyuani nehetsiemieme: “Yawé hetsie xeikɨa kanixuaweni
tita mɨtiheitserie meta tɨrɨkariya”».
Yunaitɨ kemɨ'ane memiyehekaxɨ
mɨkɨ hɨxie mekaniti'uikuni,
mekanitewiyatsitɨariekuni.
25 Matsi yunaitɨ 'Ixaheri nuiwarimama
Yawé katinehekɨatamɨkɨ heitserie kememɨtehexeiyakɨ meta 'aixɨa kememɨtexeiyarie.