46
Wawiruniya kakaɨyariximama
1 Weri panakatutsi, Newu kwiepa kaniukaweni,
wakakaɨyarixi tetɨkɨmete wahetsie meputɨkiexime.
Wa'ɨkiyarite 'ahetetɨ naitsarie pukɨtɨkiene,
'ika mɨtiyu'uxitɨwa pɨhɨkɨ xeikɨa.
2 Mana 'axeikɨa yunaitɨ mekaniyuyetuani meta mekananakatutsireni,
'ika memukuwikweitsitɨani mepɨkayɨwawe,
mɨkɨtɨtɨ memanutaxɨriwatatsie mekanekɨkani.
3 «Kakuwu tɨɨriyamama, xeneneu'eni,
'Ixaheri niwemama yunaitɨ kexemɨyupaɨme,
huriepapaitɨ xeyeteme nemɨxe'utitɨkixɨ,
meta warɨitsie nemɨxe'utiwaweriyaxɨ.
4 Meta kepauka 'akuxi xemu'ukirawetsixitɨni meta xemumutuxatɨkanitsie,
ne mɨkɨ yaxeikɨa nekanihɨkɨtɨkamɨkɨ, ne nekanixetuikakamɨkɨ.
Ne nekaxeniutiwewieni, nepɨxe'ɨwiyani,
nepɨxeparewieka meta nepɨxewikweitsitɨaka.
5 »¿Kemɨ'ane hamatɨa pepɨnetsi'inɨata,
kemɨ'ane hepaɨ nepɨ'ane?
¿Kemɨ'ane hepaɨ nepɨtinexexeiya,
kemɨ'ane hamatɨa yaxeikɨa tepɨ'anene?
6 Hipatɨ huru yukɨtsiurita mieme mepɨxɨtɨa
meta pɨrata ti'inɨnɨatametsie mepɨku'inɨnɨata,
xeimeta tiwewiwame meputa'iniwa kakaɨyaritɨme mɨwatawewirienikɨ,
mɨkɨ kakaɨyaritɨme hɨxie panakatutsita 'itahɨaweke.
7 Yunaiparitsie me'etetɨ mekanititɨkɨni,
manuwekaitsie mekanitaketsani, mana puyukuhayeikawa.
Mukuyuaxɨani manuwetsie pɨkayɨwe.
Tsepa waɨkawa memihiwie, pɨkawata'eiya,
mɨkɨ pɨkayɨwe xe'uximatɨarikatsie mɨxe'utawikweitsitɨani.
8 »Xemɨkateheuyu'enie, 'ikɨ xekena'eriwani,
xekeneutimaixɨa, yumu'utsie xekeneye'ɨnani.
9 Meripaitɨ timieme xeketenaye'eri,
ne Kakaɨyari nepɨhɨkɨ, tawarita xewitɨ pumawe,
ne Kakaɨyari nepɨhɨkɨ, tawarita xewitɨ nehepaɨ 'anetɨ pumawe.
10 Ne yanekaniutayɨni tsutɨa paitɨ kepauka tukari maye'ani,
meripaitɨ nepɨtikuxata, kemɨtiyɨni.
Ne mɨpaɨ nepaine: Ne kenemaineni yapɨtiyɨni,
meta kemɨnetinake yanepɨtiyurieni.
11 Tau manatineika hepa paitɨ 'uyeikame
wirɨkɨ wai mukwa'a neputa'iniwa,
meta kwiepa 'aheteewametsie,
tewi kemɨ'ane kenemɨtiyurieni mɨraye'atɨani nepɨta'inieni.
Kenemutayɨ, yanepɨtiyurieni maye'anikɨ,
kenemɨtiu'iyaritaxɨ, mɨpaɨ nepɨtiyurieni.
12 Xeme xekeneneu'eni, xe'iyari mɨtsetse'i,
tita mɨtiheitserietsie 'ateewa xemu'uwa.
13 Tita mɨtiheitserie nehetsɨa mieme pɨkaheteewa,
newikweitsitɨarika kwitɨwari paye'ani pɨkareutere.
'Ari nekani'atɨamɨkɨ.
Tsiyuni wikweitsitɨarika nekanipitɨamɨkɨ,
meta 'Ixaheri kenemɨtimariwe nepɨxeitsitɨani.