51
Wikweitsitɨarika yuheyemekɨ mieme Tsiyuni hetsiemieme
1 «Xeme, mɨtiheitserie xemɨtekuwautɨwe,
meta Yawé xemukuwautɨwe, xekeneneu'eni.
'Ai xekeneuxeiya kemɨ'ane hetsie xemɨyekɨ,
tetexi mɨxixiyatɨka muwati'inieriwa hetsie pemaye'inierie.
2 'Apɨrahami xekeneuxeiya, yupaapa,
meta Tsara, mɨxe'utiniwexɨ.
Kepauka ne nemenayexei, puyuxaɨtatɨkai,
peru ne 'aixɨa nepiyuri, mɨtamɨirekɨ.
3 Yurikɨ, Yawé Tsiyuni kaninɨtɨamɨkɨ,
mɨti'u'uni naime katininɨtɨamɨkɨ.
Makumawe 'Ereni kanayeitɨamɨkɨ,
Yawé yuharaweri pɨtawewieni kwie makuwakitsie.
Mana temawierika pɨtixuawere,
pamɨpariyutsi meta kwikari nɨawari.
4 »Xekeneneu'eni, neteɨterima,
xekeneneu'eni, nuiwari nehetsɨa mieme:
nehetsie kaniyeyeimɨkɨ 'ɨkitɨarika,
meta 'aixɨa mɨti'ane hekɨariya kanihɨkɨtɨkamɨkɨ nuiwarite wahetsiemieme.
5 'Ari kanehurani tita mɨtiheitserie,
newikweitsitɨarika 'ari 'ukanamieni,
netɨrɨkariya 'aixɨa puwayurieni nuiwarite.
Hatetsita 'ateewa memukutetɨka nehetsie yuri mepɨte'erie,
netɨrɨkariyatsie mepɨta'ikwewa.
6 Teikɨ muyuawitsie xekeneutinenieri,
meta kwie xekeneuxeiya:
muyuawi kɨtsi hepaɨ pukumawere,
kwie 'ixuriki hepaɨ pɨtaxɨni,
meta xaipɨtsi wahepaɨ mana kiekatari meputekwini.
Peru newikweitsitɨarika yuheyemekɨ puxuaweni,
peru mɨtiheitserie nehetsɨa mieme hatsuaku pɨkaheuyeweni.
7 »Xekeneneu'eni, xeme tita mɨtiheitserie xemɨtemate,
teɨteri ne'inɨari niukiyari yu'iyaritsie xemɨye'ɨna:
Teɨteri 'axametexekɨhɨawekaku xepɨkamamaka,
meta xepɨka'utiweranareni mexe'anutate'akaku,
8 Kɨpi kaniwatikwaimɨkɨ 'ixuriki mɨtikwa'a hepaɨ,
kwitsi kaniwatikwaimɨkɨ muxa huxarieya kemɨtikwa'a hepaɨ.
Peru tita mɨtiheitserie nehetsɨa mieme yuheyemekɨ puxuaweni,
newikweitsitɨarika, yuheyemekɨ pɨka'uye'atɨkani».
9 Kenanutanieri, Yawé tɨrɨkariyaya.
Kenanutanieri, tɨrɨkariya kamixayari kenanakatɨki.
Kenanutanieri meripaitɨ hepaɨ,
meripaitɨ memu'uwakai wahepaɨ.
¿'Ekɨ pekatiuyuri Xahawi pemutaxite,
meta hapa kiekame pemanuyetse?
10 ¿'Ekɨ pekatiuyuri haramara pemakawatsiɨxaxɨ,
haramara 'amatiyewa?
¿Haramara tetɨata huye pemutawewi
mana memɨkɨnekɨ pemɨwarutawikweitsitɨa?
11 Yawé kemɨ'ane wahetsiemieme mɨrayukatua mepɨ'axɨani,
Tsiyuni mepeutahaxɨani me'utikwitɨ,
temawierika yuheyeme mieme mepɨpitɨarieni.
Temawierika waɨkawa mepexeiyani,
kukuiniya mepɨkahexeiyani meta 'ukai.
12 «Ne nekanihɨkɨtɨni kemɨ'ane nemɨwanɨtɨa.
¿Kemɨ'aneta 'ekɨ pepɨhɨkɨ, teɨteri pemɨwarayemakaxe,
memɨkwiwawe, tupiriya mehɨkɨtɨme?
13 ¿Yawé pepatɨmai, mɨmatsi'utawewi,
muyuawi mutaweraxɨ meta kwie mukama?
¿Pematɨ tukarikɨ 'apetiuyeikani
mɨmatsi'aye'unie haxɨayakɨ
muyuwaɨriya mɨraka'unakɨ?
Peru, ¿hakewa peyuhayewaxɨ mɨkɨ haxɨaya?
14 Kwitɨwa mepɨtixɨnarieni pɨretsutsixi,
kiita me'aye'utɨ mepɨkakwini,
meta paa meheuyehɨatɨ mepɨkahakɨne.
15 Ne Yawé nemɨhɨkɨkɨ 'akakaɨyari,
ne haramara neputayuitɨwa, hamewarieya putixiuwarɨka,
Yawé Naimekɨmɨtɨrɨkaɨye nekatinitewaka.
16 Neniuki 'ateta nekameniupitɨani
meta nemamá 'etɨrieyatsie pekaniyeweni,
muyuawi 'anepuyema meta kwie nepukama,
meta Tsiyuni mɨpaɨ nepɨrahɨawe: “'Ekɨ nekiekari pepɨhɨkɨ”».
Kakaɨyari haxɨaya tekɨxiyari
17 Kenanutanieri, Kerutsareme, kenanutanieri.
'Ekɨ kenanukukexi, Yawé mamayatsie
haxɨa tekɨxiyari pemanu'i,
'ekɨ, tekɨxieya naime pemanɨxɨ
'iya tekɨxi teɨteri muwaratixɨrɨwa.
18 Yunaitɨ tɨɨri pemɨwarayexei,
nixewitɨ mɨkɨ pɨkamatsi'anukuwitɨ,
tɨɨri pemɨwarutiwaweriyaxɨ,
nixewitɨ mɨkɨ pɨkamatsi'anukuha.
19 'Ikɨ tihutatɨ 'axamɨmetiyurie 'ahetsie katiniu'axɨani:
pemakumaweriyarienikɨ meta pemɨka'unarienikɨ, haaka meta 'ixipara.
¿Kemɨ'ane pɨmatsitinenimayata?
¿Kemɨ'ane pumatsinɨtɨani?
20 'Aniwema mekaniukwinitɨma,
tsipuri yeutari wahepaɨ winiyaritsie,
kaye'utɨma 'itsikina mekaniukaxɨrieni.
Yawé haxɨaya wahetsie katininakeni,
meta Kakaɨyari kemɨtiwaraye'uxiwe'erie.
21 'Ayumieme 'ikɨ ketineu'eni, 'ekɨ pemɨyuhiwerie,
pemɨtawe, winu peka'ietɨ.
22 Yawé 'ahetsɨa mumieme 'ipaɨ kanaineni meta 'akakaɨyari,
'akakaɨyari, maniuka yuteɨterima wahetsiemieme:
«'Amamatsie nekamaniunawairieni,
tekɨxi mɨmatsi'anutawaitɨakai.
Mɨkɨ tekɨxita nehaxɨa muyema,
hawaikɨ tawarita pepɨka'enu'ieni.
23 Kemɨ'ane memɨmatsi'uximatɨa wamamatsie nepekeni,
'iya mɨpaɨ memɨmate'utahɨawixɨ wahetsie:
“Kwiepa keneuhu'i
'ahetsie temuyekɨnekɨ”.
Hikɨ kwiepa peheumu'utɨ pekatiniuhuni,
yunaitɨ kwiepa memɨtama memɨmatsitaketsinikɨ».