52
1 Kenanutanieri, Tsiyuni, kenanutanieri.
Tɨrɨkariya kenanakatɨki.
Kerutsareme, kiekariyari pemɨpatsie,
'akamixa witsimɨ'ane kenanakatɨki,
kemɨ'ane xitekiya 'inɨariyari memɨkahexeiya meta kemɨ'ane memɨka'itiyatɨka,
'ahetsie tawari mepɨkaheutahaxɨani.
2 Kerutsareme keneuyutakwiepi.
Kenanukukexi, 'a'uwenitsie kenenua.
'Akɨipitɨa tepɨa kaunariyari maka kenewaxɨna,
tsiyuni niweya 'uka pemanutahɨiya.
3 Yawé mɨpaɨ kanaineni:
«Xeme nitixaɨtɨkɨ xepɨkate'utuiya,
'ayumieme tuminikɨ xepɨkaxɨnarieni».
4 Yawé naimekɨmɨyɨwe mɨpaɨ kanaineni:
«Meripaitɨ manuyetɨatsie,
neteɨterima 'Ekipitu mepekɨ mana mepɨtitekai,
'imatɨrieka 'ikɨ tukaritsie,
'Atsiriya pɨtiwa'uximayatsitɨa yakɨ xeikɨa».
5 Yawé mɨpaɨ kanaineni:
«¿'Ena ne kenetiyuriene?
Neteɨterima yakɨ mepɨwarehapa,
tewa'aitɨwamete mepɨwananaima.
Meta tukarikɨ
nehetsiemieme 'axameputiyuane.
6 'Ayumieme neteɨterima kenemɨtitewa mepɨnetsihetimani,
'iya tukaritsie mɨpaɨ mepɨtehetimani
ne nemɨhɨkɨkɨ mɨpaɨ nemutaine: “'Ena nepuwe”».
7 Witsipɨ'anene 'ɨkateya kemɨ'ane
niuki 'aixɨa manuyɨne mukuxata hɨritsie,
kemɨ'ane “kayuwatɨ mumakakɨ” mukuxata,
kemɨ'ane niuki 'aixɨa manɨyɨne mukuxata,
kemɨ'ane wikweitsitɨarika mukuxata,
kemɨ'ane Tsiyuni mɨpaɨ mɨrahɨawe: «'Akakaɨyari pɨti'aita».
8 Keneu'ena. Matsihɨwemete meputihiwa,
yunaitɨ temawierikakɨ meputihiwa,
yɨhɨxikɨ memixeiyakɨ
Yawé Tsiyuni kaniye'amɨkɨ.
9 Kerutsareme mu'uni,
xekenekwikani temawierika kwikariyari.
Yawé yuteɨterima muwarɨnɨtɨakɨ,
Kerutsareme mutawikweitsitɨakɨ.
10 Yawé yutɨrɨkariya matsiɨkɨme kanayeitɨamɨkɨ
yunaime nuiwarite wahɨxie,
meta yunaitɨ kwie manu'axe kiekatari
takakaɨyari wikweitsitɨarikaya mepɨxeiya.
11 Xeme, Yawé tipiiniteya xemɨte'u'ikata,
xekenewayekɨni.
Xeketeneuku'eiri, xekeneuyu'iti.
Tixaɨtɨ mɨkati'itiya xepɨkatekumaɨwani.
12 Perutsɨ mexɨima xepɨkawayekɨkani, xepɨkawayenanautsani,
Yawé pɨxe'uwitɨxime,
'Ixaheri Kakaɨyarieya xehetsie pɨtanuani.
Kemɨtiuka'eniwa meta kemɨra'iwa ti'uximayatame
13 Neuxei, neti'uximayatsiriwame pɨra'iwa,
'aixɨa pɨtitamatiwa, mariweme payeitɨarieni 'aheutitewametsie payerieni.
14 Yumɨiretɨ mepɨhɨxiyani me'ixeiyatɨ,
'axamɨraka'eriekaikɨ,
tewi hepaɨ mɨkatiyuxexeiyakaikɨ.
15 Yaxeikɨata, yumɨiretɨ nuiwarite mepɨhɨxiyani,
hɨxiena te'aitamete memɨtiniuni mepɨkayɨwekaxɨani,
tita memɨkate'utaxatɨarie memɨtexeiyakɨ,
meta mepɨtehetimani tita memɨkate'eniwawekai.