57
1 Heitseriemekɨ 'amuyeika kanimɨmɨkɨ, xewitɨ hetsiena mieme pɨkayu'iyaritɨa,
te'a'uximayatsiriwamete yamemɨtekahu mekanitakukuweni xewitɨ 'atsipɨkaretimamateke,
heitseriemekɨ memu'uwa mekanitakukuweni 'axamɨti'anekɨ memɨkatekwinenikɨ.
2 Kemɨ'ane huye mɨheitserie 'utɨa memuhu kayuwatɨ mehexeiyatɨ mepɨtakukuwe,
'aixɨa 'iyari mepuka'uxipiwe mɨki 'itarieyatsie.
3 «Xeme, 'ukaratsi mutiyukewaiya niwemama,
'uki 'ukaratsi tuminikɨ muyumayɨinɨa mukumaɨwa niwemama,
'ahurawa xekenakɨni.
4 ¿Kemɨ'ane xeme xepɨtehayuriya?
¿Kemɨ'ane hepaɨtsita xepu'uxiwa'a
xe'ikuneniwiyatɨ?
¿Xeme xekatehɨkɨ 'axaxemɨte'u'iyari,
te'itawamete nuiwariyari xekatehɨkɨ?
5 Tuaxatsata, meta kɨyexi mɨ'e'etɨtɨa,
ketita xemɨtehiwe'eriekɨ xepɨkayupirenutɨa,
'aki'utɨa meta 'ai mukatataritsie,
tɨɨri mepɨwamawatɨwe.
6 Tetexi ha'ute 'aki'utɨa mieme
pemɨtiukuhayewiyarie pɨrayani,
yurikɨ, mɨkɨ 'ahetsiemieme pɨrayani.
Mɨkɨ wahetsie hatseiti peputiyeuri,
hatsi mawariyari pepɨyetua.
Mɨkɨ naime mɨyapemɨtiuyurikɨ, ¿'atsinekatitayɨni?
7 Hɨri 'a'utewimetsie manutimɨtsɨtsie,
mana paitɨ pepuyuka'utatɨa,
mana paitɨ pekananutiyani
pemɨtitimawakɨ.
8 'A'itupari warita meta muka'utɨkatsie
pekatina'utɨani memɨkakaɨyarixi wa'ɨkiyakɨ.
Pekaneniuku'eirieni, pekaniyutikemaripieni,
'a'utá pemikawitsie pekananutiyani,
tɨratu pekaniuwewieni teɨteri wahamatɨa
kemɨ'ane pemeuhiwe'eriekai hamatɨana pemɨkahunikɨ,
meta pepixei maweme.
9 Muruki hetsɨa pepanɨtɨa, huriwa hatseitiyari pepeihaniri,
witsimu'ɨatɨka 'ahetsiemieme peputimɨiriyaxɨ.
'Ateewa pepɨwarenɨ'a 'anɨ'arima,
meta mɨki teukiyata pepuwareukanɨ'a.
10 Waɨkawa pekuyeikatɨ peputi'uxixɨ,
peru mɨpaɨ pepɨka'utayɨ: “'Ena xeikɨa nepɨye'ani”.
Pepuyɨwekaxɨa tɨrɨkariya waɨkawa pepukaxei,
'ayumieme pepɨka'u'amɨ.
11 »¿Kemɨ'ane pɨmatsi'utimariu,
kemɨ'ane marika pɨmatsi'upitɨa, titayari penetiu'itai?
Pepɨkanetsihaye'eri,
nitixaɨtɨ pepɨkanerayeitɨa.
¿Xɨari pepɨkanetsimakaxe,
mɨixa 'atsinemɨka'utayɨkɨ?
12 Ne nepɨmatsitaxaneta 'aixɨa kepemɨtiyuriene peti'uximayatɨ,
nitixaɨtɨ pɨkarayani 'ahetsiemieme.
13 Kepauka pemutahiwani parewiya pehawawatɨ,
'akakaɨyarixi mekematsi'utawikweitsitɨani kemɨ'ane yemekɨ pemɨwaranayexei.
Mɨkɨ yunaime 'eka kaniwaranu'enitsitɨamɨkɨ,
xeihɨtsieriyarikɨ mekanikumawerikuni.
Peru kemɨ'ane nehetsie muyu'awieta
kwie pɨyetuiriyarieni hetsiena mieme mɨhɨkɨtɨnikɨ
meta yukwie kanayeitɨamɨkɨ nehɨrɨ mɨpatsie».
Kememɨtenɨtɨarieni
14 Mɨpaɨ pɨtitaniukieni:
«Xekeneutiwewi, xekeneutiwewi, huye xekeneukuha'arita.
Xeketenanutaxɨriexɨa neteɨterima wahuyeta mɨtiu'utɨka».
15 Mɨpaɨ mainekɨ 'amutewi meta mumariwe,
yuheyemekɨ 'amuyeika, mɨpatsie mɨtitewa:
«Ne meutitewatsie nekanikiekametɨni mɨpatsietsie,
Peru yaxeikɨata yu'iyaritsie muyuhiwerie meta tixaɨtɨ mɨkarayuyeitɨa hamatɨa nepuyeika,
nemɨwatɨrɨkariyanikɨ yu'iyaritsie memɨwerarani
kemɨ'ane yu'iyaritsie memɨyuhiwerie nepɨwatɨrɨkariya.
16 Yuheheyemekɨ nepɨkamatsixanetani,
meta yuheyemekɨ nepɨkaha'aka,
xɨka mɨpaɨ 'anenike nehɨxie yunaitɨ
memɨte'u'uwa nemuwarutiwewi mekaniukwiwaweni.
17 Neteɨterima memɨteyukahiwe'eriekɨ nepuyeha'a,
'axamemɨteyuriekaikɨ,
ne'uyeha'aka nepɨwaru'uximatɨa,
nepuwaruku'eiri,
peru matsi mɨkɨ mepenukuwei
huye 'axamɨ'anene.
18 Wahuye nepɨxeiya, peru ne 'aixɨa meteheu'eriekame nekaniwarayeitɨamɨkɨ,
'aixɨa 'anemekɨ nepuwaranuwitɨni, yemekɨ nepuwanɨtɨani.
Meta memutitsuana wahetsiemieme,
19 mɨpaɨ mete'ukwikame nekaniwarayeitɨamɨkɨ:
Kayuwatɨ mepɨpitɨarieni 'ateewa memu'uwa,
meta 'ahurawa memu'uwa.
Ne 'aixɨa meteheu'eriekame nekaniwarayeitɨamɨkɨ ―Yawé mɨpaɨ kanaineni―,
20 peru 'axateyuruwamete haramara muyuane hepaɨ mekani'aneneni,
kayuwatɨ mutamare mɨkayɨwe,
hamewarieya haxu mɨ'atɨwa meta tɨniriya.
21 'Axateyuruwamete kayuwatɨ memu'uwani mepɨkayɨwawe ―nekakaɨyari mɨpaɨ kanaineni―.