58
Hakiya yuri mɨhɨkɨ
1 »Keneutahiwa karima, pepɨka'utimamaweni.
Kwi keneutahiwa kuxineta hepaɨ.
Neteɨterima keniwarutaxaneta memɨnetsi'aye'uniekɨ,
'axamemɨte'uyurikɨ, Kakuwu nuiwarimama.
2 Tukarikɨ mekaneniwautɨweni,
nehuye mepɨmaiku,
wa'atɨtɨ nuiwari
heitserie memu'u'uwa mepɨtehɨkɨ,
wa'atɨtɨ ne'inɨari niukiyari
mepɨkate'uku'eiri.
Mepɨnetsiwawirie heitseriemekɨ yanemɨtiyurienikɨ wahetsiemieme,
puwanake nehepa 'ahurawa memakɨne,
3 meta mɨpaɨ xepɨnete'anutahɨawe:
“¿Titayari teteyuhakie, panatsi 'ekɨ yapera'eriwa?
¿Titayari teteyuhiwerieka, panatsi 'ekɨ petatsixeiya?”
»Peru kepauka xeme xemuyuhakie,
xepuyuharerutatɨwe xeikɨa meta yuhetsɨa miemete kwinimieme xepɨtewa'uximayatsitɨa.
4 Xeme xeikɨa xepuyuhakie xeyutikwinike meta xeyutitienike,
xeyutihutsunike.
Xɨka xenakeni Kakaɨyari mɨxeta'eiyakɨ,
xekeneyuhakieka, peru hikɨ xemɨyɨa hepaɨ hawaikɨ.
5 Mɨkɨ hakiya ne nemenayexei xeitukari xeikɨa pɨkamieme para tewi mɨtiuka'eniwanikɨ yuwaiyaritsie,
manakatutsirekɨ xeikɨa haka hatɨa mieme hepaɨ,
hiwerika kamixayari manakatɨnikɨ
meta naxi muyukawirienikɨ.
Xeme mɨkɨ hakiya xepɨte'uterɨwa,
meta Yawé tukari minake.
6 »Hakiya nemanayexei,
nemuwaxɨnakɨ pɨ'ayumieme kemɨkatiheitserietsie tepɨakɨ memɨhɨatɨka,
yuku kwitaxiyari nemɨxɨnakɨ,
kemɨ'ane waɨriyarika memɨte'aitɨarie nemɨwaxɨnakɨ,
meta tinaimekɨ memɨtehɨatɨka nemɨwaxɨnakɨ.
7 Hakiya kani'ayumiemetɨni meuhakamɨkɨ hamatɨa pemɨtikwanikɨ,
meta 'aixɨa pemɨtiwakiitɨanikɨ memɨka'ukii,
mɨkarekakemari pemɨtikemaritɨanikɨ,
meta kemɨ'ane 'ahepaɨ memɨ'anene hupemɨkawaraxɨrɨwanikɨ.
8 Xɨka mɨpaɨ petikamieni,
'ahekɨariya panatineni tau 'ɨrɨya hepaɨ 'anetɨ,
'ana yapauka 'aixɨa pekatinika'erimɨkɨ,
tita mɨtiheitserie 'ahuye kananutayepimɨkɨ,
meta Yawé xawatɨriyaya kamenanukuweiyamɨkɨ.
9 Pepitahɨawe, Yawé pɨmatsita'eiya,
parewiya pepɨtawauni, mɨkɨ mɨpaɨ pɨtayɨni: “'Ena nekaniuweni”.
»Xɨka yuku mahete pehehɨani,
meta xanetsika metatsiere 'axaniuki,
10 xɨka memeuhakakwiku pewaparewieka,
meta kemɨ'ane tiuka'eniwatɨ mɨreuyehɨwa xɨka petikumikwani,
'ana yɨwipa 'ahekɨariya kanitaimɨkɨ,
'atɨkari tuka hepaɨ 'anetɨ kanayeimɨkɨ.
11 Yawé yuheyemekɨ kamenikuwitɨnemɨkɨ,
pɨmatsihuxaitɨaka kwie makuwakitsie,
meta 'a'umeyarite kanititɨrɨkariyamɨkɨ.
Haraweri 'aixɨa mɨtihatuiyarie pekanayeimɨkɨ,
haixa pekanayeimɨkɨ mɨka'ukawauke.
12 'Ateɨterima kiekari meripaitɨ mieme mu'u'uni 'aixɨa mepɨtiyurieni,
tenari meripaitɨ mieme mepanukuketɨani,
“kurarute mu'u'uni 'aixɨa mɨtiyuruwa” pepɨtitewaka,
meta “huye mɨtikɨnetɨne 'aixɨa yuruwame”.
13 »Xɨka xawati tukariyari kapatsiekame pe'ayeitɨatɨ petiuhayewa,
meta pekayuharerutaneni netukari mɨpatsietsie,
xɨka xawati “tukari witsimɨ'ane” petiuterɨwani,
meta xɨka Yawé tukarieya mɨpatsie, “mɨmariwe” petiuterɨwani,
xɨka kapatsiekame pe'ayeitɨatɨ petiuhayewa,
meta xɨka pe'eyexeiyani pekayuharerutatɨ,
meta niuki tixaɨtɨ mɨkatiyunaki'eriekɨ peka'utaniutɨ,
14 hikɨ 'ana Yawé hetsie temawierika pekanikaxeiyamɨkɨ,
hɨritsie pe'uyeikame kawayutsie pe'anakaime nepɨmatsi'ayeitɨani,
meta peyutemawiekame nepɨmatsi'ayeitɨani
'apaapa Kakuwu kwie nemɨyetuiritsie».
Yawé yɨkɨmana mɨpaɨ kanaineni.