1 Mɨkɨ nuiwarite mekanihɨkɨtɨni Yawé mɨwaruhayewaxɨ 'ixaheritsixi memɨwata'inɨatakɨ, memɨkayutakwiwawekai nihatsuaku Kanani kwieyaritsie. 2 Mɨpaɨ katiniuyurieni para 'ixaheritsixi wanuiwarima memɨkayutakwiwawekai nihatsuaku, memuyuta'inɨatakɨ memɨtehetimanikɨ. 3 Mekaniuyuhayewa yu'auxɨwitɨ piritsiteutsixi tewa'aitɨwamete, yunaitɨ Kananeutsixi, yunaitɨ tsiruniyutsixi meta heweutsixi Riwanu hɨriyaritsie memɨtitekai, Wahari-Heximuni hɨriyaritsie metsutɨtɨ, meye'atɨkaitɨ Rewu-Kamati. 4 Mana Yawé kaniwarutixɨrieni 'ixaheritsixi memɨwata'inɨatakɨ, xɨka'aku 'inɨari niukiyari mehaye'atɨaka, mɨkɨ mɨwayetuiri Muitsexi tixaxatameyatɨkaku.

5 'Ixaheritsixi kananeutsixi wahamatɨa mekaniu'uwakaitɨni meta hetitsixi, 'amuxeutsixi, peretseutsixi, heweutsixi, meta kewutseutsixi. 6 Mɨkɨ teɨteri waniwema mekaniwarutiwitɨni, manata yuniwema mekaniwaruyewikitɨani meta wakakaɨyarixima mewarayexeiyatɨ mekanakɨne.

7 'Ixaheritsixi Yawé wakakaɨyari kemɨkatinake mekateniuyurieni, kakaɨyarixi Wahari hetsɨa miemete wahɨxie mekanikatunuma'uwekaitɨni meta 'Atserá hetsɨa miemete. 8 Yawé waɨkawa kaniuyeha'ani 'ixaheritsixi wahekɨ, kaniwayetuani ti'aitame Kutsani-Xitsatahini hetsɨa, Metsuputamiya*3:8 'Arami-Nakarahini tatsɨaritɨtɨ. mɨti'aitakai, 'atahaika wiyari mekateniuta'uximayatsitɨarieni. 9 Peru Yawé me'utitsuatɨ mekaniutahiwieni meyunenewietɨ, mɨkɨ xeime wawikweitsitɨwame kaniutinetɨani, 'Utunieri Kenatsi nu'aya, Karewi taruya. 'Utunieri 'ixaheritsixi kaniwaruxɨna. 10 Yawé 'iyarieya 'Utunieri hetsie kaninuani, mɨpaɨ 'ayumieme 'ixaheritsixi wa'itsɨkame kanayani, kanayeyani Kutsani-Xitsatahini hetamienike 'Arami mɨti'aitametɨkai, hikɨ Yawé 'Utunieri kaniupitɨani me'iwakɨ. 11 'Ana 'ixaheritsixi meka'uximatɨarietɨ mekanakɨne huta tewiyari wiyari, 'Utunieri Kenatsi nu'aya 'ukumawerekuke.

12 Tawarita 'ixaheritsixi Yawé kemɨkatinake mekateniuyurieni, 'axakememɨte'uyuriekaikɨ 'Ekuruni tɨrɨkariya kaniupitɨani, Muhawi ti'aitame mɨtiwata'aitɨanikɨ. 13 Me'uyunɨka 'amunitsixi, 'amarekitsixi, hikɨ 'Ekuruni kaneyani 'ixaheritsixi kaniwarutakwini, Makutakɨya kiekariyari naitɨ tipiinieya katinayani. 14 'Ixaheritsixi 'Ekuruni katiniwa'uximayatsitɨakaitɨni, ti'aitame Muhawi kiekame, tamamata heimana 'atahaika wiyari.

15 'Ixaheritsixi hutarieka Yawé me'utitsuatɨ mekaniutahiwieni, xeime wahetsie nunuwame kaniutakeni, 'Ahuri Kera nu'aya, mɨkɨ mu'utakai Wenikamini xiɨyarieyatɨtɨ. 'Ixaheritsixi mɨkɨ mekanenɨ'ani memɨteyukutuaya me'i'ɨitɨaka ti'aitame 'Ekuruni hetsɨa, Muhawi ti'aitame. 16 'Ahuri kaniuyutawewiriekaitɨni nawaxa naitsata heutixikakaunime xeitsikuriyari tewime, yuteuri tserieta 'utɨa kaniteni yu'ixuriki hetɨa. 17 'Ekuruni ti'aitame Muhawi kiekame, kaniyetuirieni tumini, mɨkɨ waɨkawa pɨwaiyakai. 18 Kepauka 'Ahuni mɨtiyetua, kaniwarutateutɨani yunaime tumini 'ɨwemete muwa memayetekai. 19 Peru hutarieka kaninuani tetexi kakaɨyarixiyari memati'u yenuaka Kirikari 'aurie, mɨpaɨ kaniutayɨni:

―Ti'aitame, xapa nepahurie 'ahetsiemieme 'awiekamekɨ.

Ti'aitame mɨpaɨ kaniutayɨni:

―Kayuwatɨ xekeneumaka.

Yunaitɨ hetsɨana memɨte'uximaya mekaniwayekɨne.

20 Hikɨ 'Ahuri 'ahurawa kaniuyani ti'aitame hɨxie, yuxaɨta kiita kanayekateitɨni muxɨkanitsiemiemeta ki'amutewita paratsiyu heima manuti'ekatsie, mɨpaɨ katinitahɨawe:

―Kakaɨyari pɨnetsiheyenɨ'a nemɨmatitaxatɨanikɨ.

Kepauka ti'aitame manukuke yu'uwenitsie, 21 'Ahuri yunawaxa kaniwatihana yuteuritsie mikakekai ti'aitame hukayatsie kaniutatseni. 22 Nawaxa 'utɨa mamaya naitɨ kaneuhani, 'ana kwinuriteya kanawiwieni. 'Ahuri pɨkaheha yunawaxa mɨkɨ hukayatsie paitɨ kaniyuhayewa waiyarieya kaneinakaitɨni. 23 Kitenie reunaxɨaka reutuikaxɨaka mɨkɨ kii 'amutewita, 'Ahuri 'etsimayewatsie kanatsuna.†3:23 Teiwarikɨ la ventana. Pukwaniwe 'ikɨ wixarikakɨ mitaterɨwa.

24 Kepauka 'Ahuri meyakairi, ti'aitame parewiwamete mekaniu'axɨani, metehetimaika kename reunatɨkatei kii 'amutewita mɨpaɨ mekaniutiyuani: «Xɨari kanekwitaneni kiita 'etsimuyeyewata». 25 Kwinie meteneutere me'ikwewietɨ mekaniuti'uxe. Ti'aitame kareuyepiwekaku kiita, yawikɨ mekateneuyepieni. Muwa mekanitaxeiya kwiepa 'ukaime mɨkime ti'aitame.

26 Mexi me'ikwewiekai 'Ahuri kaniuyuta'una. Tetexi kakaɨyarixiyari memati'u kaniuyeyani Tsehirati kaneyani. 27 Kepauka mana munua 'awa kaniutahɨtsieni 'Epɨrahini hɨriyaritsie, 'ixaheritsixi memuyukuxeɨrienikɨ, hamatɨana mekanekɨne, 'Ahuri 'anuyehaitɨatɨ. 28 Mɨpaɨ katiniwarutahɨawe: «Kɨmɨtɨka, Yawé kanixeyetuirieni muhawitsixi». Hikɨ hamatɨana mekanekɨ Kurutani mayekunitsie manuyeyɨkɨtsie mekaniuyuhayewa, Muhawitsixi mana memakɨkani mepɨkawapitɨakai. 29 'Ana mekaniwarukwini tamamata miriyari muhawitsixi, tsepa memɨtɨrɨkawikai memeuyutakwiwawekai. Nixewitɨ pɨka'utawikwei. 30 Mɨkɨ tukaritsie 'ixaheritsixi muhawitsixi mekaniwara'iwa, mana mɨtiyehane kayuwatɨ mekanexeiyakaitɨni nauka tewiyari wiyari.

31 Hutarieka Tsamɨkaxi manuyeka kanayani 'Anati nu'aya, mɨkɨ 'ataxewi tsienituyari kaniwarukwini piritsiteutsixi xeime kɨyekɨ tuurutsixi wa'arɨwamekɨ. Mɨkɨtatsiere kaniwaruxɨna 'ixaheritsixi.