1 'Arike 'Ahuri 'umɨku, 'ixaheritsixi 'axamekateniuyurieni, Yawé kemɨkatinake. 2 Hikɨ Yawé kaniwayetuani Kawini hetsɨa, Kanani kwieyaritsie ti'aitame hetsɨa, Katsuxi 'ukaitɨ pɨti'aitakai. Kuyaximama wa'ukiyari kanihɨkɨtɨkaitɨni Tsitsara, Karutseti-Kuhimi mukatei. 3 'Ixaheritsixi Yawé mekaniutahiwieni me'utitsuatɨ Yawini tepɨa kaxetayari 'atanauka tsienituyari mɨwarexeiyakaikɨ, xeitewiyari wiyari waɨkawa 'ixaheritsixi mekaniwa'uximatɨakaitɨni.

4 Mɨkɨ tukaritsie katiniwa'aitɨakaitɨni 'ixaheritsixi tixaxatame 'ukatɨtɨ Rewura titewatɨ, Rapiruti kani'ɨyayatɨkaitɨni. 5 Rewura Takɨya hetɨa putayeixakai mana pɨtitixanetɨariwakai, Xama mɨrakutewatsie meta Weteri wahixɨapa, 'Epɨrahini muhɨriyatsie, mana mekaneta'axekaitɨni 'ixaheritsixi 'aixɨa meteyurienike tita memɨte'ayuyexeirietɨkatei. 6 Rewura Waraki katiniutanɨ'airieni, 'Awinuhani nu'aya, Tseretsi mukatei Nepɨtahari kwieyaritsie, mɨpaɨ katinitahɨawe:

―Yawé, 'ixaheritsixi takakaɨyari mɨpaɨ pɨmati'aitɨa: “Kenemie Tawuxi hɨriyaritsie mana keniwarekuxeɨri tamamata miriyari teɨteri, Nepɨtahari xiɨyarimama meta Tsawuruni xiɨyarimama. 7 Ne Tsitsara nepɨta'inieni Kawini kuyaximama wa'ukiyari, yumɨireme meta kaxetate mewaruhapatɨ, 'akitsie Kitsuni paitɨ. Mana nekaniwayetuamɨkɨ xemɨwara'iwakɨ”.

8 Waraki mɨpaɨ katinitahɨawe:

―Xɨkatsɨ 'ekɨ penetsi'anuweiyamɨkɨ nekanimieni, yapɨtikatixaɨ nekatimie.

9 Rewura mɨpaɨ kaniutayɨni:

―'Aixɨa kani'aneni nekamenanuweiyamɨkɨ, peru waɨriyarika pemɨyɨanekɨ, 'ekɨ 'aixɨa petikuxaxatsiwatɨ pepɨka'ayani, Yawé Tsitsara kaniyetuamɨkɨ 'ukaratsitɨme hetsɨa pɨta.

Rewura kaneyani Waraki hamatɨa Tseretsi paitɨ, 10 mana kaniwaruta'inieni Tsawuruni nuiwarimama meta Nepɨtahari nuiwarimama. Tamamata miriyari 'ukitsi mekaniuyuwaɨriya kemɨtiwarahɨawekai, meta Rewura kaneiweiya.

11 Hewexi Keni tewiyari yuxaɨta kananayeyakaitɨni hipame kenitsixi wahamatɨa, Huwawi memɨxiɨyarieyatɨkai Muitsexi munieya, Tseretsi 'aurie Tsanahini kaninuani, xiu manuwe kaniuyutaxamarutɨani.

12 Kepauka Tsitsara mɨtiutaxatɨarie kename Waraki 'Awinuhani niweya Tawuxi hɨriyaritsie heutimiekai, 13 Tsitsara kaniwaruta'inieni 'atanauka tsienituyari tepɨa kaxetayari, meta yunaime yukuyaxima, Karutseti-Kuhimi 'aki manuyekatsie Kitsuni paitɨ.

14 Hikɨ Rewura Waraki mɨpaɨ katiniutahɨawe.

―Kenewatɨkari, 'ikɨ tukaritsie Yawé Tsitsara 'ahetsɨa kaniyetuamɨkɨ. Kaniyuritɨni Yawé 'akuyaxima wahɨxie kaniumiemɨkɨ.

Waraki kananakayani Tawuxi hɨriyaritsie, tamamata miriyari teɨteri warawitɨtɨ. 15 Waraki kemɨtiyemiekai yumienetɨ, Yawé kaniparewiekaitɨni, kaxetate kaniutimure kuyaxi mekana'iwariekaitɨni, hikɨ Tsitsara kananakatsuna yukaxetatsie kaniyuta'una kaniutanautsa. 16 Waraki kaxetatetsie mekaniwaranukuweiya meta kuyaximama Karutseti-Kuhimi paitɨ. Yunaitɨ Tsitsara kuyaximama mekaniukwi'iwa, nixewitɨ 'ayenieretɨ pɨka'uyuhayewaxɨ.

17 Tsitsara kaniuyuta'unakaitɨni yu'ɨkama Kaheri xamaruya manuwekai paitɨ, Hewexi Keni tewiyari 'ɨyaya. Mɨkɨ 'aixɨa mekateniyuxeiyakaitɨni ti'aitame Kawini Katsuxi mɨti'aitakai, Hewexi Keni tewiyari xiɨyarimama wahamatɨa.

18 Kaheri kanayeyani Tsitsara heunakimieka, mɨpaɨ katinitahɨawe:

―Xeiya ti'aitame, muwa keneutahaki. Pepɨkamaka.

Tsitsara xamaruta kaneutahani, mɨkɨ 'ukaratsi mata 'ixurikiyarikɨ kanenukanani.

19 Mɨkɨ mɨpaɨ kaniutayɨni:

―Ne nepeuharimɨkɨ, ha'etsiwa pemɨnetsi'umini katiyɨwe.

'Ukaratsi retsi kananutiyepieni nawita mɨyema kani'itɨani, hutarieka kanenukanani.

20 Mɨkɨ mɨpaɨ kaniutayɨni:

―Kitenie keneuweni, xɨka xewitɨ muwa hamieni xɨka ha'iwawani: “¿Kemɨ'ane muwa payeka?”, hawaikɨ pepaineni.

21 Kepauka mukutsukai Tsitsara 'uxiyakɨ, Kaheri Hewexi 'ɨyaya kɨye manuyemɨtsɨ xamarutsiemieme 'akwetɨ meta titsuname kayuwatɨ hepana kaniuyani. Hikɨ mu'uyatsie kaneitsuna kɨye kananuyeneni kwiepapaitɨ kaneukeni. Mɨpaɨ Tsitsara katiniumɨni.

22 Waraki mana kaniuyeyani Tsitsara 'uweiyatɨ, Kaheri 'ixeiyaka hepana kaniutanautsa. Mɨpaɨ katinitahɨawe: «Neuxei kenaye'a, nematsixeitsitɨani tewi pemuweiya». Waraki hamatɨana kaneutahani xamaruta, muwa kaniukateitɨni Tsitsara mɨkitɨ kɨye haketɨ yumu'utsie.

23 Mɨpaɨ Kakaɨyari, ti'aitame Kawini Kanani kiekame tixaɨtɨ pɨkarayeitɨa 'ixaheritsixi wahɨxie. 24 'Ixaheritsixi matsi waɨkawa mekanitɨrɨkariyariekaitɨni Kawini memɨmietɨwekaitsie, mɨya me'iyurietɨ mekanika'una.