4
1 Yawé mɨpaɨ kanaineni:
«'Ixaheri, xɨka penuamɨkɨ nehetsɨa,
kenenua nehetsɨa.
Xɨka nehɨxie kakaɨyarixi pewarexɨrieni memɨxani'eriwa
meta xɨka pekanetsi'uku'eirieni,
2 xɨka yurikɨ, 'aixɨa 'anemekɨ meta heitseriemekɨ,
yape'utayɨni: “Yurikɨ Yawé 'amuyeikakɨ”,
hikɨ, “hetsiena mieme nuiwarite 'aixɨa me'itɨarietɨ mepakɨne,
meta me'inɨawatɨ mepakɨne”».
3 Yawé mɨpaɨ kanaineni
Kura meta Kerutsareme kiekatari wahetsiemieme:
«Xekenekwietsanatɨweni hakewa mɨkareka'etsitɨwetsie,
meta xuyatsata xepɨka'etɨweni.
4 Kura kwieyaritsie kiekatari meta Kerutsareme,
yu'iyaritsie xeketeneu'utɨa tɨratu 'inɨariyarikɨ:
xitekiya 'inɨariyari xekeneuyuwewiri Yawé xemayexeiyanikɨ,
nɨkahɨrixɨa 'axaxemɨte'uyurikɨ
nehaxɨa 'utani tai hepaɨ
kayutɨnɨatɨ xe'utitaiya.
Kura kemɨtika'unarienikekai
5 »'Ikɨ xeketenetaxata Kura kwieyaritsie,
meta xeketenetaxata Kerutsareme kiekariyaritsie.
'Awa xekeneutahɨtsi naitsarie 'ikɨ kwieyaritsie.
Kwi mɨpaɨ xeketeneuhiwa:
“Xekeneuyukuxeɨri meta tekaneutahaxɨakuni
kiekarite yukuraru 'ahatitetewame mexeiyatɨkata”.
6 Tsiyuni xekeneutamawiya paterakɨ memuyuta'unakɨ,
hakewa xemeyuti'awieta xekeneutiwawa, kayuwatɨ xepɨkate'uka.
Ne xeyetatsie nekanekanetɨamɨkɨ
'uximatɨarika meta tiyu'uname mariweme.
7 Maye yuterɨta kanewayeyaniri,
xewitɨ nuiwarite 'uname kanayeyaniri,
yukie kanayeyaniri
'akwie 'akumaweme mɨhayewakɨ,
'akiekarite 'u'unitɨ kaniyuhayewamɨkɨ
meta yemekɨ kiɨripa kanayeimɨkɨ.
8 'Ayumieme, hiwerika kamixayari xekenanakatɨxɨa,
xekeneutitsuanani xeyu'iyaritɨatɨ,
karikɨ Yawé haxɨaya mɨtiyukwaxiya
'akuxi tahetsie pɨkahayeyeiwe.
9 »'Iya tukaritsie ti'aitame peuyuyehɨani
meta teɨteri wahetsiemieme memanuyetei mepeuyuyexɨrieni,
mawari wewiwamete waɨkawa mepɨtimamani
meta Kakaɨyari niukametetemama mepɨkatexatawaweni»,
Yawé mɨpaɨ kanaineni.
10 Ne mɨpaɨ nekaniutayɨni: «Neuxei, Yawé nekakaɨyari,
pepɨwakwamanane 'ikɨ teɨteri meta Kerutsaremetari.
Mɨpaɨ peputayɨ: “Kayuwatɨ mepexeiyani”,
peru xɨari 'ixipara wakɨipitɨa peuwe».
11 'Iya tukaritsie mɨpaɨ mepɨtetahɨawarieni
'ikɨ teɨteri meta Kerutsaremetari:
«Hɨrite mɨmeetse makumawetsie mɨtiteitsie paitɨ
'eka xɨkatɨ pataneika
neteɨterima wakiekari nemɨnaki'erie makuma hepa 'erietɨ.
Mɨkɨ 'eka tihename pɨkahɨkɨ
meta tɨriku hename pɨkahɨkɨ,
12 'eka nemanɨ'ani mɨpaɨ pɨka'ayumieme
mɨkɨ matsi waɨkawa pɨtɨrɨkaɨye,
karikɨ ne yanekanitayɨmɨkɨ
wahetsie nekatiniɨhɨamɨkɨ».
13 Xekeneuxeiya hai hepaɨ 'a'ahume.
Kaxetamama wiyeri mɨtɨrɨkaɨye hepaɨ pɨtiyuxexeiya.
Kawayutsiximama kwinimieme matsi mepayɨwawe kwixɨtsi kememɨkahayɨwawe.
Xɨa'ui tame. Tame tepeuyexɨri.
14 Kerutsareme, 'a'iyaritsie keneu'a'iti 'axamɨti'anekɨ,
pemɨtawikweitsitɨarienikɨ.
¿Kepaukake pepɨtihayewa
'iyaritɨarika kemɨmatikuyuitɨwa?
15 Xewitɨ pahiwa 'uximatɨarika haxaxatatɨ
Rani kwieyaritsie paitɨ meta 'Epɨrahini hɨriyaritetsie paitɨ.
16 «Xekeniwarayehɨtɨa nuiwarite,
xeketeneutaxata Kerutsareme kiekariyaritsie:
“'Ateewa kiekatari mepɨ'axɨani memɨtatsi'anutinanikɨ
kuyaxa hepaɨ mete'uhiwatɨ
Kura kiekariteya hepaɨtsita”.
17 Mepaketɨkɨ waritana 'etsiya mɨhɨrieka hepaɨ,
netsi'aye'unietɨ matɨakɨ
—Yawé mɨpaɨ kanaineni—.
18 Kepemɨtiuka'iyari kepemɨtiyuriene
'ayumieme 'ikɨ mɨya pepɨranuyemie.
'Ikɨ 'a'uximatɨarika kanihɨkɨtɨni. Kwinimieme pɨratsiwi.
Pɨmatikwinitɨa 'a'iyaritsie».
19 Waɨkawa nepɨnehiwerie, nepɨtiuka'eniwa.
Kukuiniya pɨnetsi'uta'ɨimura.
Ne 'iyari puwatayuane. Xɨa'ui ne'iyari.
Kayuwatɨ nemɨtiuyerɨni nepɨkayɨwe.
Nepi'enie 'awa metahɨtsieriwa
meta hiwari mɨrayukwine mieme.
20 Xɨka tiuyutakwini tawarita pɨtiyutakwini,
naitɨ 'ikɨ kwieyari pɨka'unariexime.
Yapauka puka'unarie
ne'ixuriki kiiyari hakewa nemayekatei.
21 ¿Kepaukari tamɨ patera kayuwatɨ pɨtamare
meta 'awa hetahɨtsieriwatɨ?
22 «Neteɨterima mepɨka'u'iyari,
mepɨkanetsimate,
tɨɨri 'atsimemɨkatemate mepɨhɨkɨ
memɨkatemaiwawe.
Kwinimieme mepanayeyɨne 'axamemɨteyurienikɨ,
'aixɨa memɨteyurienikɨ mepɨkamate».
23 Kwiepa nepeukanierixɨ, kwie pɨkamatsiɨkɨkai puyuxamuriekai,
muyuawitsie nepeutinierixɨ, manatatsiere naitɨ pɨyɨwikai.
24 Hɨrite nepuxei, puyɨyɨakatɨkatei,
naitɨ yemurite pɨti'unikekai.
25 Nemunierixɨ, xewitɨ tɨma pɨkayuhayewanekai,
yunaitɨ wikixi mepeuyuta'unaxɨakai.
26 Nemunierixɨ, kwie 'aixɨa mɨ'ane makumawe pɨhɨkɨtɨkai,
naitɨ kiekarite 'u'unitɨ puyuhayewanekai,
Yawé mɨyamɨtiuyuriekaikɨ,
haxɨaya mɨtiyukwaxiyakɨ.
27 Yawé mɨpaɨ kanaineni:
«Naitɨ 'ikɨ kwieyari 'akumawetɨ kanayeimɨkɨ,
peru naimeta nepɨkaka'una.
28 'Ayumieme 'ikɨ kwieyari puyuhiwerieka,
meta muyuawi meutitewatsie pɨkɨyɨre,
'ari mɨpaɨ nekaniutayɨni, nepɨkatihayewa,
'ari mɨpaɨ nepɨtiu'eri, ne'ɨtɨa nepɨkatayani».
29 Tupikɨ temɨmɨmete meta kawayutsixi wahetsie memutei wayuariya me'enietɨ
yunaitɨ kiekatari mepɨtananautsa.
Hipatɨ 'ɨtsita mepɨtahake,
hipatɨta 'aitsie mepeutiwɨwɨre.
Naitɨ kiekari puku'eiriwaxɨ,
xewitɨ tɨma kiekame pɨka'uyuhayewaxɨ.
30 ¿Kepetiyurimɨkɨ, kiekari pemuka'unarie?
¿Titayari 'ixuriki witsimɨtixeta peranakatɨkɨ?
¿Titayari huru pereukapine?
¿Titayari 'ahɨxita perayu'utɨwa?
Yakɨ xeikɨa witsipepɨ'akuyuruwa,
karikɨ 'atuxexerima mekamenixani'erieka,
mepiwautɨwe xeikɨa kememɨmetemienikɨ.
31 Hiwari nepɨ'enie, niweyame hiwarieya hepaɨ 'anɨyɨneme,
'aiwarika matɨari mɨniweneni 'aiwarikaya hepaɨ 'anɨyɨneme.
Tsiyuni witsimɨti'ɨimari 'aiwarieya kanihɨkɨtɨni,
waɨriyarika meka'ietɨyeika,
yumamá 'utatsetseratɨ mɨpaɨ mutaine:
«Xɨa'ui ne, nepɨmɨximeri.
Teyumiekate 'ari mepɨnetsiwiya».