5
Kerutsareme meta Kura ke'axamemɨteyuriekai
1 «Kerutsareme kayeyaritetsie xekeneutikɨni,
'anɨkai xekunieretɨwetɨ,
teɨteri memayukuxexeɨriwatsie xekeneutinieri.
Xɨka xeime xehetaxeiya
heitseriemekɨ yatiyurieneme, tita yuri mɨraine tikuwauneme,
ne nepɨreiyehɨwirieni 'ikɨ kiekari.
2 Tsepa mɨpaɨ memɨteyuhɨritɨa: “Yurikɨ Yawé mayeyurikɨ”,
yakɨ xeikɨa mekateniyuhɨritɨaka».
3 Yawé, 'ekɨ pepɨtikuwaune 'ateɨterima yamemɨtekahunikɨ.
Pepɨtiwarukwinitɨa mɨkɨ teɨteri, matsi pɨkawarekwinixɨ,
pepɨwarutayuniyaxɨ, matsi mepɨka'uyuwaɨri 'aixɨa memuyuyurienikɨ.
Yunierika meputseiriyaxɨ 'ai hepaɨ,
mepɨka'uyuwaɨri memɨtehayewakɨ.
4 Hikɨ mɨpaɨ nepɨtiu'eri: «Mɨpaɨ pɨ'ane hawerimɨ'ane,
memɨka'u'iyarini wahepaɨ mepɨte'u'uwa,
memɨka'imatekɨ Yawé huyeya
meta yukakaɨyari 'aitsikateya.
5 Memanuyetei wahetsɨa nepumie
hikɨ nepɨtiwaretaxatɨani,
mɨkɨ hɨrixɨa mepimate Yawé huyeya
meta kemɨti'aita wakakaɨyari».
Peru mɨkɨta yuyuku mepanumuraxɨ
meta kaunari kɨmana memɨhɨatɨkatei xekananutekixɨani.
6 'Ayumieme maye yeutanaka pɨtiwakwinitɨani
meta puwatikwani 'ɨrawe makumawetsie kiekame,
wakiekarite hɨxie tɨwe puhupa wahupietɨ,
kemɨ'ane muwayeyani pɨtatsanarieni,
waɨkawa 'axamemɨte'uyurikɨ
meta mɨiremekɨ yamemɨkatekakɨkɨ.
7 «¿Titayari nemereuyehɨwirieka?
'Aniwema mepɨnetsi'uku'eiri,
memɨkakakaɨyarixi wahetsɨa mepɨteyuhɨritɨa.
Kepauka nemɨtiwakupiniriekai tita memɨteheuyehɨakai,
mɨkɨ memɨkayɨ'ɨitama mepɨwarukumayɨa
'ukarawetsixi yuwaɨkawatɨ memɨwakumaɨwa wakiita mepuyukuxexeɨriwakai.
8 Kawayutsixi 'aixɨa memɨtemikie meta waɨkawa memɨtɨrɨkawi wahepaɨ mepɨ'anene,
yunaitɨ 'ukarawetsixi memɨkawa'ɨitama wahekɨ mekaniutitsuanani».
9 Yawé mɨpaɨ kanaineni:
«¿Kareuyewetse mɨkɨkɨ nemɨtiwakwinitɨani?
¿Kareuyewetse mɨkɨ nuiwari mɨya memɨte'u'iyari nemɨtiwarakapitɨanikɨ mɨkɨ kememɨnetsi'uyuri?
10 »Xuruku 'utɨa xekeneutayeixɨa 'ikɨ kaxie mayematsie,
xekenayehuna, peru hipame xekeneuhayewa.
Xekenamuraxɨa yɨrariyarite,
karikɨ mɨkɨ Yawé hetsɨa pɨkamiemete.
11 Teɨteri 'Ixaheri hetsiemiemete meta Kura
kwinimieme yemekɨ yamepɨkatehu»,
Yawé mɨpaɨ kanaineni.
12 Mɨkɨ Yawé hepaɨtsita mekateniu'itani,
mɨpaɨ paitɨ matsi mekaniutiyuaneni: «Kakaɨyari pɨka'uyeika.
Tahetsie 'axati'anetɨ pɨkatinuani,
kuyaxa tahetsie pɨkanuani meta haakaxa».
13 Kakaɨyari niukametemama 'eka hepaɨ mepɨ'anene:
Yawé niukieya wahetsie pumawe.
Mɨpaɨ ketiwaruyurieni kememutiyuane.
14 'Ayumieme, Yawé mɨpaɨ paine,
Kakaɨyari Naimekɨmɨtɨrɨkaɨye:
«Mɨpaɨ memutiyuanekɨ teɨteri,
neniuki 'atenie tai hepaɨ kani'anemɨkɨ,
meta 'ikɨ teɨteri, kɨyexi kwinimieme netɨ muwe hepaɨ.
Mɨkɨ tai kaniwatixɨtsitɨamɨkɨ.
15 »Teɨteri 'ixaheritsixi,
xehetsɨa neni'atɨamɨkɨ xeime nuiwari teewatanaka,
xeime nuiwari mɨtɨrɨkaɨye meta meripaitɨ mɨmieme,
xeime nuiwari waniuki xemɨkamate,
waniuki xemɨka'enie
—Yawé mɨpaɨ kanaineni—.
16 Mɨkɨ yunaitɨ kuyaxi mepɨka'ukamama,
wa'ɨrɨ mɨki peutiwie.
17 Tita pemɨti'etsa meta 'a'ikwai naime mepɨtekaxɨni,
'aniwema 'ukitsi meta 'ukari yunaime mepɨwakwini,
'amuxatsi meta 'awakaitsixi mepɨwakwini,
'akaxie meta piní mepɨkaxɨni.
'Akiekarite kuraruyari 'amatitetewa,
wahetsie pemeuwaɨrekai,
naitɨ pɨka'unarieni».
18 Yawé mɨpaɨ kanaineni: «Peru mɨkɨ tukaritsie, 'akuxi yunaime nepɨkaxeka'una. 19 Kepauka mɨpaɨ pemɨtita'iwawiyarieni: “¿Titayari Yawé takakaɨyari mɨya tatiuyuri?”, 'ekɨ mɨpaɨ pekatiniwata'eiyamɨkɨ: “Xeme kexemɨnete'uku'eiri meta yukwietsietɨtɨ hipame kakaɨyarixi xemuwarayexeiyakaikɨ, mɨpaɨta xeime kwieyaritsie hipame teɨteri xepɨtewarayexeiyani”.
20 »'Ikɨ Kakuwu xiɨyarimama xeketeniwarutaxatɨa
meta yaxeikɨa Kura kwieyaritsie:
21 'Ikɨ ketineu'eni, kiekari pemɨka'uka'iyari meta pemɨka'awaɨriya yapemɨtikamienikɨ,
hɨxi pehexeiyatɨ peru pemɨkaheuniere,
naka pehexeiyatɨ peru pemɨkaheu'ena».
22 Yawé mɨpaɨ kanaineni:
«¿Kamɨtsɨ petiuhayewaxɨ penetsi'ayemakatɨ?
¿Kareuyewetse pemɨnetsi'ayemakaka?
Ne xiekari 'anekanitiyeni haramara mata'atɨka 'inɨarieya mɨhɨkɨtɨnikɨ,
mana muye'atɨyeikanikɨ yuheyemekɨ.
Tsepa hamewari mana mɨreutiwaya,
mana pɨka'anutitsuna,
tsepa kwinimieme mutaine,
mɨkɨ 'inɨari heima pɨka'anutiyani.
23 Peru 'ikɨ teɨteri 'iyari tse'ime mepexeiya kaheu'ename,
mepɨnetsi'uku'eiri, 'axamete'u'iyaritɨ mepakɨ.
24 Mepɨkayu'iyaritɨa tɨma meta mɨpaɨ mepɨka'utiyuane:
“Yawé tepayemakaxeni, takakaɨyari,
wiyeri meyenɨ'awa tukarieya 'aye'axekaku,
wiyeri witaritari mieme meta taxarita mieme,
meta tsemana temɨ'inɨatatsie pɨtatsi'inɨaritɨa
mɨkɨ tsemanayaritsie temɨka'itsanakɨ”.
25 Ke'axaxemɨte'uyuri xeme
naime 'ikɨ pɨtixe'unawairi,
'axamɨti'ane xemɨtehexeiya pɨxekunamirie
ke'aixɨa xemɨ'itɨariekakeyu.
26 Kanahekɨaka nekiekaritsie mekanixuaweni 'axamemɨte'u'iyari,
mehupatɨ xeikɨa wikixi wahupiwamete wahepaɨ,
winiyari memuwɨwɨtɨwa teɨteri memɨwawiniyakɨ.
27 Wikixi wakiite hepaɨ waɨkawa mehɨpɨnetɨ,
wakiite 'irɨmarikɨ xeikɨa pɨtihɨpɨne,
'ayumieme kwinie metehexeiyatɨ mepayuyeitɨa meta mamariwawemete mepakɨ,
28 kwinimieme metewaiyatɨkaitɨ meta meyuti'ɨretɨ.
Ke'axamemɨteyurie hawaikɨ pɨkaheu'axe:
nutui hetsiemieme 'aixɨa mepɨkate'akayuruwa,
'aixɨa 'anemekɨ 'amuyeikanikɨ,
metatsiere tixaɨtɨ memɨkateheuxeiya
heitserie kememɨtehexeiyakɨ yamepɨkateyurie».
29 Mɨpaɨ kanaineni Yawé:
«¿Kareuyewetse mɨkɨkɨ nemɨtiwakwinitɨani?
¿Kareuyewetse mɨkɨ nuiwari mɨya memɨte'u'iyari
neta nemɨtiwarakapitɨanikɨ mɨkɨ kememɨnetsi'uyuri?
30 »Yemekɨ mariwemekɨ meta mariutsika
pɨtiutine 'ikɨ kwieyaritsie.
31 Kakaɨyari niukametemama 'itarikakɨ mepɨtekuxata,
mawari wewiwamete mepɨte'aita kemɨtiwanake,
meta neteɨterima mɨpaɨ pɨtiwanake.
Peru, ¿Kexeteyurieni xeme
kepauka naitɨ mɨtinɨretsie?