50
Niuki Wawiruniya hetsiemieme
(Ker 51:15-19 – Ker 10:12-16)
1 Yawé yuniukame Keremiyaxi kemɨtiutaxatɨa wawiruniyutsixi wahepaɨtsita meta wakwieyari hepaɨtsita mieme:
2 «Xeketeniwarutaxatɨa yunaime nuiwarite kwiepa memɨtama.
Xekeneutihiwani xe'ikuxatatɨ, patera xe'anuwietɨ.
Tixaɨtɨ xepɨkate'anukanaka, matsi mɨpaɨ xekeneutiyuaneni:
“Wawiruniya kana'iwarieni.
Weri kaniyutitewiyamɨkɨ.
Maxiruki kanitimurariexɨamɨkɨ 'etsipepetɨ.
Kakaɨyarixi memɨwewiyatɨka meta wa'ɨkiyarite
mekaniutimurarieni tixaɨtɨ mepɨkatehayeitɨarie”.
3 Xewitɨ nuiwari mimienekɨ tayeta mieme,
'akumaweme mayeitɨanikɨ kwieya.
Teɨteri meta tewaxi mekanayekɨnikuni meyu'unarɨmetɨ,
xewitɨtɨma mana kapɨtayerɨni.
4 »'Iya tukaritsie, 'iya wiyaritsie
'ixaheritsixi meta Kura teɨteriyari
mekaniyehuni me'utitsuatɨ Yawé mekuwautɨwetɨ, yukakaɨyari
—Yawé mɨpaɨ kanaineni—.
5 Mekanita'iwaukuni Tsiyuni huyeyari kemɨreuyune,
hikɨ mɨkɨ huye 'utɨa mekaniyehuni.
Me'axɨame Yawé hetsie yemekɨ mekateniwiyakuni
tɨratu mekaniwewikuni yuheyemekɨ, hatsuakuri memɨkahetɨmaiya.
6 »Neteɨterima muxatsi xeikuraruyari memeuyexɨri hepaɨ mepɨ'ane,
wahɨwemete mepɨwarutayutsitɨa,
hɨritsie yuxaɨta me'u'uwame mepɨwarayeitɨa.
Xeime hɨriyaritsie me'u'uwatɨ xeime hɨriyaritsieta mepekɨka,
yukuraru mehatɨmaiyaka.
7 Kemɨ'ane memɨwarukaxexeiya, mepɨwatikwa'a,
memɨwaraye'unie mɨpaɨ meputiyuane: “Tame tahetsie pɨkarahɨiwa,
mɨkɨ pɨta Yawé hepaɨtsita 'axamepɨte'uyuri,
wakuraru mɨheitserie kanihɨkɨtɨni,
meripaitɨ xetutsima memitakwewiekai”.
8 »Xekeneuyuta'una Wawiruniya xe'u'uwatɨ,
mɨkɨ kwieyari xekeneuku'eiri.
Tsipuri 'ukitsi xekenehɨkɨtɨni
muxatsi memɨwaruwitɨxime.
9 Karikɨ ne Wawiruniya hepaɨtsita nekaniwaha'aritɨaka
yumɨireme teɨteri tayeta miemete memuyutaxewirekɨ.
Mekaniyukuha'aritɨakuni memitamienikɨ,
tayeta kiekatari mekanika'unakuni.
'Ɨrɨkɨ kwinimieme mepɨteheutamɨiwawe
yu'iwarika mete'apitɨ mepakununuwa.
10 Wawiruniya naime katininawatsiyariemɨkɨ,
kemɨ'ane memɨte'inawatsirieni mekanitihuxaikuni
—Yawé mɨpaɨ kanaineni—.
11 »Xeme, neteɨterima xemɨtewarunawatsiri,
xekeneyutemamawieka xekeneutinaweni.
Tsikerutsixi wahepaɨ xekenetsunatɨweni tupiriya tsata,
kawayutsixi wahepaɨ xekeneutiyuaneni.
12 Peru xekwieyari
tixaɨtɨ pɨkarayeitɨarieni,
kemɨ'ane tukari mɨxe'upitɨa tewiyarika kanipitɨariemɨkɨ.
Wawiruniya 'imatɨreme kanayeimɨkɨ,
makuwaki, makumawe meta maku'ayepariya kanayeimɨkɨ.
13 Yawé hetsiena mieme muyeha'akɨ
kiepa mana pɨka'ayaniri,
matsi yeuta mana kanayeimɨkɨ.
Kemɨ'ane Wawiruniya 'aurie muyeyani
kanitimamɨkɨ nieretɨ kemu'itɨariekɨ.
14 »Wawiruniya warita xekenaketɨkɨni,
yunaitɨ tupikɨ temɨmɨmete.
Xekeneutamɨ'i, naime yu'ɨrɨkɨ,
Yawé hepaɨtsita 'axakatiniuyurieni.
15 Waritana xekenaketɨkɨneka xekeneutihiwa, mɨpaɨ xe'utiyuatɨ:
Wawiruniya puyuyetuari.
Tuxiyuya patixɨri,
kuraruya pa'unetɨya.
Hikɨri Yawé katinekapitɨamɨkɨ.
Xemeta meripaitɨ kemɨxe'uyuri,
yaxeikɨata xeme xekeneuyuri.
16 Wawiruniya kwieyaritsie memuka'etsa yunaime xekeniwarukuya,
meta memɨ'itsanatɨwe.
'Ixiparakɨ memɨtakwikwiwakɨ 'ayumieme,
yuxexuitɨ yukiekaritsie mepɨtakɨka,
meta yukwieyaritsie mepuyuta'una.
17 »'Ixaheritsixi muxatsi xaɨtsie memeukuyunixɨa mepɨhɨkɨ,
mayetsi mekaniwareutaxɨriexɨani.
Matɨari 'Atsiriyatsie ti'aitame kaniwarutikwani,
hutarieka Nawukurunutsuxi, Wawiruniyatsie ti'aitame,
naime 'umeteya peutimuraxɨa».
18 'Ayumieme mɨpaɨ kanaineni Yawé Naimekɨmɨtɨrɨkaɨye, 'Ixaheri Kakaɨyarieya:
«Wawiruniyatsie ti'aitame nekatinikwinitɨamɨkɨ metatsiere kwieya
'Atsiriya kwieyaritsie ti'aitame kenemɨtiukwinitɨa hepaɨ.
19 Yanepɨtiyurieni 'ixaheritsixi memakunuaxɨanikɨ makɨ'ɨxayatsie
Kaximeru hɨriyaritsie meta Watsani kwieyaritsie memɨtekwatɨwenikɨ.
Kememɨteheukwaikukai mepɨtihuxani
'Epɨrahini meta Karaha hɨriyaritetsie.
20 'Iya tukaritsie 'Ixaheri ke'axamɨtiuyuri pɨtiwawiyarieni,
peru pɨkakaxeiriyarieni.
'Iya tukaritsie Kura hetsie 'axamɨti'ane pɨtiwawieni,
peru hetsiena pɨkakaxeiyarieni,
karikɨ ne nekatiniwareuyehɨwiriemɨkɨ kemɨ'ane memuyuhayewa
—Yawé mɨpaɨ kanaineni—.
21 »Xekeneutami'a Meratahini kwieyari
meta Pekuri memɨkiekatari.
Xekeniwarukuya, xekeniwaruka'una yunaime.
Xeketenaye'atɨa naime kenemɨti'aita
—Yawé mɨpaɨ kanaineni—.
22 Mɨkɨ kwieyaritsie kuyaxa yuariyaya payu'eniɨriɨkɨ
yemekɨ mariwemekɨ mepekumaweriyarɨwa.
23 Ketiumurarie meta keratihɨiya tepɨa titsuname
kwiepa memɨtama yunaime muwatitsunakai.
Wawiruniya makumawe kanayani
yunaime nuiwarite wahixɨapa.
24 Winiyari nekaniuwieni 'ahetsiemieme,
hikɨ mɨkɨtsie pekaniuwiere ni'atsipekatimaitɨ.
Pepɨkatiumaritɨarie yapauka pepuwiyarie,
Yawé pe'aye'unietɨ pematɨakɨ.
25 Yawé katineuyepieniri piinite kuyaxa timieme mɨtiuyepinetsie,
katinewayepini muyutamienikɨ yuhaxɨa maye'atɨanikɨ,
Yawé naimekɨmɨyɨwe, meta Naimekɨmɨtɨrɨkaɨye,
mɨkɨ yu'uximayatsika pexeiya 'eye'atɨanike
wawiruniyutsixi wakwieyaritsie.
26 Xekeneutami'a naitsarie kwiepa xemutetɨka.
Wa'iku muye'ɨnetɨkatsie xeketeneuyepiexɨa.
Xekeneukuxeɨri 'iku kwauyari hepaɨ,
xekeniwarukuya yunaime.
Xewitɨ tɨma pɨkayukuhayeikawani.
27 Watsikerutsixi yunaime xekeniwarukuya.
Hakewa memetikwikwiwa mana xekeniwaranuhapani.
Xɨa'ui nepaine wahetsiemieme, watukari maye'akɨ,
kepauka memɨtekwinitɨarienitsie.
28 Yu'unamete wahiwari pa'eniuriukɨ,
Wawiruniyatsie memayuye'unaxɨa,
Tsiyuni mekatenikuxatatɨweni
Yawé kemɨtiwarakapitɨa, takakaɨyari,
tukieya memuka'unaxɨkɨ.
29 »Tupikɨ temɨmɨmete xekeniwarukuxeɨri Wawiruniya memɨtamienikɨ,
yunaime kemɨ'ane memɨteheutamɨiwawe,
waritana xekenayaxetɨkɨni,
nixeime xepɨkatayutsitɨwani.
Kememɨte'uyuri mɨpaɨ xekeniwaruyuri,
yaxeikɨa xeketeniwarakapitɨa kememɨxe'uyuri.
Mɨkɨ Yawé muta'iwaxɨkɨ,
Mɨpatsie 'Ixaheri hetsiemieme.
30 'Ayumieme 'iya tukaritsie
temari mana kiekatari kaye 'utɨma mekanikaxɨrikuni
meta yunaitɨ kuyaximama menikwikuni
—Yawé mɨpaɨ kanaineni—.
31 »Nekamenaye'unieka 'ekɨ, kiekari pemɨ'ata'ɨre
—Ti'aitame mɨpaɨ kanaineni, Yawé Naimekɨmɨtɨrɨkaɨye—,
'ari 'atukari kanaye'ani,
kepauka pemɨtikwinitɨarienitsie.
32 Muyuta'ɨre kanekawitseimɨkɨ, kanekawemɨkɨ,
pumaweni kemɨ'ane menukuhana.
Nekanititaiyamɨkɨ naime kiekariteya,
tai naime katinititaiyamɨkɨ wa'aurie mɨrahane».
33 Mɨpaɨ kanaineni Yawé Naimekɨmɨtɨrɨkaɨye:
«'Ixaheritsixi meta Kura kiekatari memu'uximatɨarie mekanihɨkɨtɨni,
memɨwaraye'unie mepɨwaranutaxɨri,
mepɨkawapitɨa mexɨxɨnitɨ memu'uwanikɨ.
34 Peru waxɨname kanitɨrɨkaɨyeni,
Yawé Naimekɨmɨtɨrɨkaɨye katinitewaka.
Yutɨrɨkariyakɨ wahetsie kanitanuamɨkɨ,
'aixɨa 'iyari kwiepa memu'uwanikɨ kaniwapitɨamɨkɨ,
peru Wawiruniya hetsiemieme, marika kanipitɨamɨkɨ.
35 »Wawiruniyutsixi mɨɨya pɨwapitɨani.
Memanuyetei meta memɨtemaiwawe mana kiekatari puwakwini
—Yawé mɨpaɨ kanaineni—.
36 Kakaɨyari niukametemama memɨte'itawa puwakwini.
Meka'u'iyarime pɨwarayeitɨani.
Wakuyaxima memɨyɨwawe puwakwini.
Memamakame puwarayeitɨani.
37 Wakawayutsixima meta wakaxetate meke'ukwi'iwa.
Yunaitɨ 'inierimama meke'ukwi'iwa.
'Ukarawetsixi wahepaɨ meke'utimamani.
Tita memɨtehexeiyakai mɨraye'atɨka kereuyehɨiyani.
Mekete'unawatsiyarieni.
38 Haa mana mieme ke'ukumaweriyarieni.
Ke'ukawatsiɨxarieni.
Wawiruniya kakaɨyarixi wa'ɨkiyari kwieyari mɨhɨkɨkɨ,
kakaɨyarixi 'axamemɨ'anene teɨteri rukutsixi mekaniwarayeitɨwani.
39 »'Ayumieme teyukwa'amete makumawetsie miemete
tsɨikɨri yeutari wahamatɨa mana mepu'uwani,
metatsiere 'aruxi 'amemɨnene wakie kanayeimɨkɨ.
Tawariri kiepa pɨkahayani,
'akumawetɨ kanayeimɨkɨ yuheyemekɨ.
40 Kepauka Tsuruma meta Kumuxa Kakaɨyari mika'unaxɨ hepaɨ raku'anetɨ payani,
meta kiekarite 'auriena mamanetɨkatei,
Mana nixewitɨ pɨkayutakiitɨani,
nixewitɨ tewi mana pɨkatayerɨni
—Yawé mɨpaɨ kanaineni—.
41 »Tayeta kuyaxi mekanayehuni,
kwie manuye'atɨkatsie paitɨ kiekatari
kaniyuha'aritɨaka xewitɨ kiekari mariwetɨ meta te'aitamete meyumɨiretɨ.
42 'Umekanahuni tupi me'u'ɨtɨ meta pitsika 'amɨtɨtɨ,
mɨkɨ 'axamekateniu'iyarini mepɨkate'uyukanenimaya.
Kawayutsixi wahetsie me'utetɨ mekanahuni,
wayuarika haramara kemutaine mɨpaɨ katini'eniɨriɨkɨni.
Kiekari Wawiruniya witsimɨraye'ane, mematsika'unake,
'ahepa 'umekanahuni xuruku mehewetɨkaitɨ,
muyuxewini hepaɨ meteyuxexeiyatɨ.
43 Ti'aitame Wawiruniya kiekame katiniutamarieniri,
katɨrɨkaɨyetɨri kanayani,
hiwerika hexeiyatɨ patɨa,
meta kukuiniya hexeiyatɨ kanayani hukame mɨtiniwerɨmeni hepaɨ.
44 Kurutani mɨ'ɨtsiyata maye mayeneika
makutsiɨraɨye 'ɨxapa yapauka mɨ'axe hepaɨ,
'ɨxapa makutsiɨraɨyetsie,
yapauka neniwatimariutamɨkɨ Wawiruniya kiekatari,
wahetsiemieme ne xeime nekananayexeiyamɨkɨ.
Tawari Kakaɨyari pumawe nehepaɨ 'anetɨ.
Xewitɨ mɨnetsita'iwa pɨkayɨwe.
Nixewitɨ muxatsi wahɨweme netsi'aye'unietɨ pɨka'ayeiwe».
45 'Ayumieme xekeneu'eni Yawé kemɨtiyurimɨkɨ
Wawiruniya hepaɨtsita,
xekeneu'eni kemɨtiyɨkɨhɨawe,
wawiruniyutsixi wakwieyari hepaɨtsita:
Mekananayehapanietɨkɨnikuni
muxatsi 'etsimemupepe,
mɨkɨ mɨyamemɨte'uyurikɨ,
memɨtehatikwa'akaitsie 'akumawetɨ kanayeimɨkɨ.
46 Kwie kanitayuamɨkɨ
Wawiruniya matiwenitsie mɨka'unarienitsie,
watsuari kani'enieriekamɨkɨ
nuiwarite watsata.