1 Hikɨ Ketsutsi yemuritsie kaneyani Huriwa Mati'u mɨrakutewatsie. 2 Ximerita tawari tukipa kaninuani. Yunaitɨ teɨteri hetsɨana mekani'axekaitɨni, mana 'ayerɨka katiniwa'ɨkitɨakaitɨni. 3 Hikɨ 'inɨarikɨ te'ɨkitamete meta paritseutsixi mekani'atɨirieni 'ukaratsi muwiyarie xeime kɨnaya hamatɨa meyukumaɨwakaku, hixɨapa me'itakeka 4 mɨpaɨ mekatenitahɨawe:

—Ti'ɨkitame, 'ikɨ 'ukaratsi kaniuwiyarieni xeime kɨnaya hamatɨa meyukumaɨwatɨ. 5 'Inɨari niukiyaritsie Muitsexi mɨpaɨ katatiniu'aitɨani tetexikɨ temɨwatituaxanikɨ mɨkɨ 'ukarawetsixi mɨya memɨyɨa. ¿Kamɨtsɨ kepetayɨni 'ekɨ?

6 Mɨpaɨ mekaniutiyuani me'i'inɨatatɨwetɨ memitaxanetakɨ. Peru Ketsutsi 'anakatutsireka, kwiepa katiniuta'utɨani yu'itɨwamekɨ. 7 Mɨkɨ 'ameteheutewitɨ me'iku'iwawiyatɨ, Ketsutsi kananukukeni, mɨpaɨ katiniwarutahɨawe:

—Kemɨ'ane xeme 'axamɨkatiyuriwe, mɨkɨ meri pitatuaxa tetekɨ.

8 Tawari 'anakatutsireka, kwiepa katiniuta'utɨani. 9 Hikɨ mɨkɨ memu'enana, wa'iyari warutate'akaku, mekaneutayeixɨani yuxexuitɨ me'ayekɨkatɨ, 'ukirawetsixi meri. Ketsutsi yuxaɨtame kaniuyuhayewa, 'ukaratsi hixɨapa muwekai kaniuyuhayewata hamatɨana. 10 Hikɨ 'anukukeka Ketsutsi, 'ukaratsi mɨpaɨ katiniuta'iwawiya:

—Neuxei, 'ukaratsi, ¿hakewari mɨkɨ metsixanetamete? ¿Xewitɨ 'ahetsie karahɨa?

11 Mɨkɨ mɨpaɨ kaniutayɨni:

—Ti'aitame, hawaikɨ.

Ketsutsi mɨpaɨta katinitahɨawe:

—Neta 'ahetsie nepɨkatiuhɨani. Kenemie, tawari 'axapepɨkareyurieneni.

12 Merikɨtsɨ Ketsutsi tawari teɨteri katiniwarutixatɨani mɨpaɨ 'utaitɨ:

—Ne kwiepa memɨtama wahekɨariwiwame nekanihɨkɨtɨni. Kemɨ'ane mɨnetsi'anuweiya yɨwipa pɨka'uyeikani, matsi hekɨariya kanexeiyakamɨkɨ tukaritɨme.

13 Paritseutsixi 'ayumieme mɨpaɨ mekatenitahɨawe:

—'Ekɨ 'ahepaɨtsita xeikɨa pekatinihekɨatani. Tita pemɨtihekɨata pɨkayuri.

14 Ketsutsi mɨpaɨ katiniwaruta'eiya:

—Tsepatsɨ nehepaɨtsita nemɨtihekɨata, tita nemɨtihekɨata puyuri nemɨtimatekɨ hakewa nemeyetɨa meta hakewa nemeyemie. Peru xeme 'atsixepɨkatemate hakewa nemeyetɨa meta hakewa nemeyemie. 15 Xeme teɨteri wahepaɨ xepɨteyu'inɨata. Nepɨta tewi nepɨka'inɨata. 16 Matsitsɨ xɨka ne'ita'inɨatake, nepihekɨatɨanikeyu tita yurikɨ mɨti'inɨari nehexeiyatɨ, nexaɨta nemɨka'uyeikakɨ, 'iya mɨnetsiheyenɨ'a nehamatɨa muyeikakɨ. 17 Mɨkɨ meta, xe'inɨari niukiyaritsie mɨpaɨ katine'uxani: Yuhutatɨ teɨteri tita memɨtetahekɨata puyuri. 18 Merikɨte, ne nekanihɨkɨtɨni kemɨ'ane nehepaɨtsita nemɨtihekɨata, ne'ukiyari mɨnetsiheyenɨ'a nehepaɨtsita katinihekɨatanita.

19 Mɨkɨ mɨpaɨ mekatenitahɨawe:

—¿Hakewari 'a'ukiyari?

Ketsutsi mɨpaɨ katiniwaruta'eiya:

—Xeme xepɨkanetsimate, ne'ukiyari meta xepɨkamate. Xɨka xenetsimatenike, ne'ukiyarita xepɨmatenikeyu.

20 'Ikɨ niukikɨ katinikuxatakaitɨni Ketsutsi tumini makamanarɨwatsie tuki kuraruyarita ti'ɨkitatɨ. Xewitɨ pɨka'iwi tukarieya mɨka'aye'awekaikɨ 'akuxi.

21 Hikɨ tawari mɨpaɨ katiniwarutahɨawe:

—Netsɨ nepɨyemie, xeme xepɨnetsikuwautɨweni, tita 'axaxemɨteyurietsie xetewiyatɨ xekanikwikuni. Hakewa ne nemeyemie xeme xepɨkayɨwawe mana xemɨyehukɨ.

22 Huriyutsixi 'ayumieme mɨpaɨ mekatenikuxatakaitɨni: «¿Yɨkɨmana katiyumieni?, mɨpaɨ mutayɨkɨ: “Hakewa ne nemeyemie xeme xepɨkayɨwawe mana xemɨyehukɨ”».

23 Ketsutsi mɨpaɨ katiniwarutahɨawe:

—Xeme 'ena xepɨmiemete. Nepɨta taheima nekanimiemetɨni. Xeme 'ena kwiepa xepɨmiemete. Ne 'ena kwiepa nepɨkamieme. 24 'Ayumieme yanepɨtixe'utahɨawixɨ xemɨkwinikɨ tita 'axaxemɨteyurietsie xetewiyatɨ. Xɨka yuri xekate'uta'erieni kename ne nehɨkɨ, xekanikwikuni tita 'axaxemɨteyurietsie xetewiyatɨ.

25 Mɨkɨ mɨpaɨ mekatenita'iwawiya:

—¿'Ekɨ kemɨ'ane pepɨyɨane?

Ketsutsi mɨpaɨ katiniwaruta'eiya:

—Yemekɨ nepɨhɨkɨ tita tsutɨapai nemɨtixekuxaxatɨwa. 26 Waɨkawa nekatinexeiyani xehepaɨtsita nemɨtikuxatanikɨ, xehetsie nemɨtiuhɨpanikɨ. 'Iya mɨnetsiheyenɨ'a matsi yuri kanaineni. Tita nemɨtiu'eni 'iya yahainekaku, mɨkɨ nepɨtiwataxatɨani kwiepa memɨtama.

27 Mɨkɨ 'atsimepɨkatehetima yu'ukiyari mɨwakuxaxatɨwakaikɨ. 28 Hikɨ Ketsutsi 'ayumieme mɨpaɨ kaniutayɨni:

—Kepauka xemenutihana Yuri Tewi, 'anari xepɨtehetimani ne nemɨhɨkɨkɨ, nekɨmana 'atsinemɨkatiyurienekɨ. Ne'ukiyari mɨnetiu'ɨkitɨa hepaɨ, mɨpaɨ xeikɨa nepɨtikuxata. 29 Mɨkɨ meta, 'iya mɨnetsiheyenɨ'a nehamatɨa kaniuyeikani. Pɨkanetsi'uku'eiri nexaɨtame, neheyemekɨ yanemɨtiyurienekɨ tita mɨtinake.

30 'Ipaɨ tikuxatakaku yumɨiretɨ yuri mekateniuta'erieni hetsiena.

31 Ketsutsi 'ayumieme mɨpaɨ katiniwarutahɨawe mɨkɨ yuri memɨte'ita'eriri huriyutsixi:

—Xeme neniukitsie xetewiyatɨ xɨka xeyuhayewa, yurikɨ nehetsɨa miemete teyɨ'ɨkitɨwamete xekanakɨnikuni. 32 Tita yuri mɨraine xekanetimaikuni. Mɨkɨ yuri maine kanixetixɨnamɨkɨ.

33 Mɨkɨ mɨpaɨ mekatenita'eiya:

—Tame 'Apɨrahami tekanixiɨyarimamatɨni. Xeimetsie mieme waɨriyarika tepɨkate'uti'uximayataxɨ hatsuaku. ¿Kehepaɨtɨtɨ pehaine, xexɨxɨnitɨ xepakɨne pemaine?

34 Ketsutsi mɨpaɨ katiniwaruta'eiya:

—Yurikɨ mɨpaɨ nekanaineni, yunaitɨ 'axamemɨteyurie waɨriyarika mekateni'uximayaka tita 'axamɨti'anetsie mieme. 35 Merikɨte, waɨriyarika mɨti'uximaya yuheyemekɨ 'apɨka'uka kiekame hepaɨ. Kiekame nu'aya pɨta 'apuka yuheyemekɨ. 36 'Ayumieme xɨka nu'aya xe'utixɨna, xeme yurikɨ xexɨxɨnitɨ xekanakɨnikuni. 37 Ne nepɨtimate 'Apɨrahami xemɨxiɨyarimama. Peru xekanenikuwautɨweni xenetsimienike neniuki yuhetsie xemɨkapitɨakɨ. 38 Tita nemɨtiuxei ne'ukiyari hetsɨa yanepɨtikuxata. Xemetsɨari tita xemɨte'u'eni yu'ukiyari hetsɨa yaxepɨtekahu.

39 Mɨkɨ mɨpaɨ mekatenita'eiya:

—Tame ta'ukiyari 'Apɨrahami kanihɨkɨtɨni.

Ketsutsi mɨpaɨ katiniwarutahɨawe:

—'Apɨrahami xɨka xexiɨyarimamatɨnike, 'Apɨrahami kemɨtiyurienekai mɨpaɨ xepɨteyuriekakeyu. 40 Matsi hikɨ xepɨnetsikuwautɨwe xenetsimienike. Ne tewitɨtɨ tita yuri mɨraine nemɨxekuxaxatɨwa kenemɨtiu'enaxɨ Kakaɨyari hetsɨa. 'Apɨrahami mɨpaɨ pɨkatiuyuri. 41 Xeme xepaapa kemɨtiyuriene mɨpaɨ xekateniyurieka.

Mɨkɨ mɨpaɨ mekatenitahɨawe:

—Tame tamaama kemɨ'ane mɨkakɨnayatɨkai, mɨkɨ pɨkatapaapa. Xeime ta'ukiyari xeikɨa tekanexeiyani Kakaɨyaritɨme.

42 Ketsutsi mɨpaɨ katiniwarutahɨawe:

—Xɨka Kakaɨyari xe'ukiyaritɨnike, ne xekaneninaki'eriekakeyu. Ne Kakaɨyari hetsɨa nekaneyeyani nekaninuaniri. Mɨkɨ meta, nekɨmana nepɨkanua. 'Iya pɨta kaneneyenɨ'ani. 43 ¿Titayari xekateheitimaiwawe tita nemɨtixata? Xemɨkayuwaɨriyakɨ neniuki xemɨ'enieni. 44 Xeme yu'ukiyari hetsɨa xekanimiemetetɨni Kauyumarie hetsɨa. Xekaniyuwaɨriyani yaxemɨteyuriekakɨ tita mɨtiheiwe'erie xe'ukiyari. Mɨkɨ meripaitɨ katiniyumemiwani. Tita yuri mɨrainetsie tiwiyatɨ 'apɨka'uwe, tita yuri mɨraine mumawekɨ hetsiena. Kepauka 'itarikakɨ mɨtikuxata, yɨkɨmana katinikuxatani mɨti'itawakɨ, memɨte'itawa mɨwa'ukiyarikɨ. 45 Ne pɨta yuri nemainekɨ, yuri xepɨkanete'eririe. 46 ¿Kemɨ'ane xeme nehetsie pɨrahɨani, kename 'axanetiuyuri 'utaitɨ? Mexɨka yuri nehaineni, ¿titayari yuri xekanete'eririe? 47 Kemɨ'ane Kakaɨyari hetsɨa mɨmieme kani'enani tita Kakaɨyari mɨtikuxata. 'Ayumieme xepɨkaheu'enana, Kakaɨyari hetsɨa xemɨkamiemetekɨ.

48 Huriyutsixi mɨpaɨ mekatenita'eiya:

—'Aixɨa tekaniutiyuaneni kename 'ekɨ tsamariyatanaka pehɨkɨ, kename kakaɨyari 'axamɨ'ane metsinɨ'ɨ.

49 Ketsutsi mɨpaɨ katiniwaruta'eiya:

—Ne kakaɨyari 'axamɨ'ane pɨkanetsinɨ'ɨ. Matsi ne'ukiyari 'aixɨa mɨrahɨawarɨwanikɨ neputaine, xemetsɨ pɨta 'axanemɨrahɨawarɨwanikɨ xeputiyuane. 50 Ne tixaɨtɨ nepɨkatikuwaune witsinemɨtikɨhɨawarɨwanikɨ. Xewitɨ pɨta 'akaniuyeikani mɨtikuwaune witsinemɨtikɨhɨawarɨwanikɨ, kemɨ'ane 'itsɨkame hepaɨ mɨwa'inɨata, mɨkɨ xeikɨa kanihɨkɨtɨni. 51 Yurikɨ mɨpaɨ nekanaineni, xɨka tewi neniukitsie yatikamieni, hatsuaku pɨkamɨni.

52 Huriyutsixi mɨpaɨ mekatenitahɨawe:

—Hikɨrixɨa tepɨtehetima kakaɨyari 'axamɨ'ane mɨmetsinɨ'ɨ. Kamɨ 'Apɨrahami kaniumɨni, meta Kakaɨyari niukametemama mekaniukwini. 'Ekɨtsɨ mɨpaɨ pekanaineni, xɨka tewi neniukitsie yatikamieni, hatsuaku pɨkamɨni. 53 ¿Kamɨtsɨ 'ekɨ matsi waɨkawa petimariwe keyuri tapaapa 'Apɨrahami? Mɨkɨ kaniumɨni, meta Kakaɨyari niukametemama mekaniukwini. ¿Ketita 'ekɨ peti'a'erie?

54 Ketsutsi mɨpaɨ katiniwaruta'eiya:

—Xɨka ne witsinehainenike nehepaɨtsita, tixaɨtɨ pɨkatihɨkɨtɨnikeyu witsinetikɨhɨawarɨwatɨ. Ne'ukiyari kanihɨkɨtɨni kemɨ'ane witsimaine nehepaɨtsita. Xeme yaxemutiyuane kename xekakaɨyari. 55 Matsi xepɨkaheitimaiwawe. Netsɨ pɨta nekanimaika. Xɨka nehainenike kename neka'imate, xehepaɨ neti'itawatɨ nepayanikeyu. Peru matsi nekanimaika, niukieyatsie yanepɨtikamie. 56 Xepaapa 'Apɨrahami kwinimieme katiniyutemawiekaitɨni netukari ha'eriwatɨ mixeiyakɨ. 'Ixeiyaka, kaniyukatemawieni.

57 Huriyutsixi 'ayumieme mɨpaɨ mekatenitahɨawe:

—'Ekɨ huta tewiyari heimana tamamata wiyari 'akuxi pepɨkahexeiya. ¿Kepetixei 'Apɨrahami?

58 Ketsutsi mɨpaɨ katiniwarutahɨawe:

—Yurikɨ mɨpaɨ nekanaineni, 'Apɨrahami katinuiwawekaku 'akuxi, 'anekaniuyeikani ne.

59 Hikɨ 'ayumieme tetexi mekaniutitɨkɨ me'ituaxake. Ketsutsi kaniyuti'awieta, tuki kuraruyarita kaniwayeyani watsata 'umietɨ.