1 Hikɨ mana 'uyemietɨ tewi kaniuxeiya kaheunieretɨ mutinuiwaxɨ. 2 Teyɨ'ɨkitɨwametemama mɨpaɨ mekatenita'iwawiya:

—Ti'ɨkitame, ¿kepaikɨ 'axapɨtiuyuri, 'ikɨ 'axatiuyuri, paapamama nutsu 'axamepɨte'uyuri, kaheunieretɨ mutinuiwaxɨkɨ?

3 Ketsutsi mɨpaɨ katiniwaruta'eiya:

—'Ikɨ 'axamɨtiuyurikɨ pɨka'ane, meta paapamama 'axamemɨte'uyurikɨ pɨka'ane. Matsi Kakaɨyari kemɨtiyurieni hetsiena mɨmatsiɨkɨrekɨ pɨta kani'aneni. 4 Kaneuyeweka 'iya mɨnetsiheyenɨ'a kemɨti'uximaya, yanemɨtiyurienenikɨ ne 'uhekɨakaku 'akuxi. Yɨriya 'ukanamieni kepauka xewitɨ mɨkayɨwe mɨti'uximayaka. 5 Mexi kwiepa ne'uyeikani, nekanihekɨariyatɨni kwiepa memɨtama wahetsiemieme. 6 Mɨpaɨ 'utayɨka kaniuta'aɨtsikawieni kwiepa, haxu 'uhawiyaka yu'aɨrikakɨ, hɨxitana haxu kanewiriexɨani, 7 mɨpaɨ katinitahɨawe:

—Kenemie, kene'ɨtaimamie haa mayema Tsiruhe mɨrakutewatsie (taniukikɨ Mutanɨ'arie mɨrakutewatsie).

Hikɨ mana kaneyani, kananaka'ɨtaima, heunieretɨ 'ayaka, kanakunuani.

8 Hikɨ 'aurawatari, mɨkɨri meripaitɨ memixeiyakai rimutsinawieneme, mɨpaɨ mekaniutiyuanekaitɨni: «¿'Ikɨ katihɨkɨ mana mutiyeixakai mɨtiku'iwawakai?» 9 Hipatɨta mete'utiyuanekai: «Huu, mɨkɨ pɨhɨkɨ». Hipatɨta mete'utiyuanekai: «Hawaikɨ, hepaɨna pɨtiyuxexeiya xeikɨa». Peru mɨkɨ mɨpaɨ putainekai: «Ne nepɨhɨkɨ».

10 Hikɨ mɨpaɨ mekatenita'iwawiya:

—¿Kehepaɨ petiunieritɨarie?

11 Mɨkɨ mɨpaɨ katiniwaruta'eiya:

—Mɨkɨ tewi Ketsutsi mɨtitewa haxu 'uhawiyaka nehɨxita kanenawiriexɨani, hikɨ mɨpaɨ kanetiniutahɨawe: “Tsiruhe kenemie kene'ɨtaimamie”. Neheyaka ne'anaka'ɨtaimaka nepanutanierixɨ.

12 Mɨkɨ mɨpaɨ mekatenita'iwawiya:

—¿Hakewari mɨkɨ?

Mɨkɨ mɨpaɨ katiniwaruta'eiya:

—'Atsinepɨkatimate.

13 Merikɨtsɨ paritseutsixi wahetsɨa mekaneiwitɨni mɨkaheunierekai. 14 'Uxipiya tukari kanihɨkɨtɨkaitɨni kepauka Ketsutsi haxu muhawiyaxɨ menutanieritɨa. 15 'Ayumieme tawari paritseutsixi mekanita'iwawiya kehepaɨ ranutanieritɨariekai, mɨkɨ mɨpaɨ katiniwarutahɨawe:

—Haxu pɨnetsi'awiriexɨa nehɨxita, nepanaka'ɨtaimaxɨ, hikɨ nepeuniere.

16 Paritseutsixi hipatɨ 'ayumieme mɨpaɨ mekaniutiyuanekaitɨni: «Xɨari 'iya tewi Kakaɨyari hetsɨa pɨkamieme, 'uxipiya 'inɨariyaritsie yamɨkatikamiekɨ». Hipatɨta mete'utiyuanekai: «¿Kehepaɨ tiyɨwe tewi 'axatiyurienetɨ 'inɨari 'ipaɨ 'aneneme mɨwewienenikɨ?». Hixɨata mepuyutsanaxɨ.

17 'Ayumieme tawari mɨkaheunierekai mɨpaɨ mekateniuta'iwawiya:

—¿Kepe'utaine 'ekɨ mɨkɨ hepaɨtsita mɨmatsi'anutanieritɨa?

Mɨkɨ mɨpaɨ katiniwaruta'eiya:

—Kakaɨyari niukameya kanihɨkɨtɨni.

18 Peru huriyutsixi yuri mepɨkate'eriekai kename kaheunieretɨ 'anutanieritɨariekai, hikɨri meunierekaikɨ, 'arikeke yuri mepɨte'uta'eri manutanierixɨ paapamama mewarutahɨawekake, 19 mɨpaɨ mekateniwaruta'iwawiya:

—¿'Ikɨ tixeniwe, xeme hepaɨtsitana mɨpaɨ xemutiyuane kename kaheunieretɨ 'utinuiwaxɨ? ¿Keyɨanetɨ hikɨ peuniere?

20 Paapamama mɨpaɨ mekateniwaruta'eiya:

—Tame tepɨtemate 'ikɨ taniwe pɨhɨkɨ kaheunieretɨ mutinuiwaxɨ. 21 Matsi hikɨ keyɨanetɨ meuniere 'atsitepɨkatemate, kepaikɨ menutanieritɨa 'atsitepɨkatemate. Mɨkɨ xekeneuta'iwawiya, 'ekaniyumaikari, yɨkɨmana kaniyutaxatamɨkɨ.

22 Paapamama mɨpaɨ mekaniutiyuanekaitɨni huriyutsixi memɨwamakarɨkaikɨ. Huriyutsixi meyu'enieka mɨpaɨ mekateniyɨkɨhɨawekaitɨni, kename xɨka xewitɨ yutahekɨatake Kɨritsitutsie tiwiyatɨ, tukita kapitɨarienikekai. 23 'Ayumieme paapamama mekaniutiyuani: «'Ekaniyumaikari, xekeneuta'iwawiya mɨkɨ».

24 Hikɨ hutarieka mekanitahɨawe tewi mɨkaheunierekai, mɨpaɨ mekatenitahɨawe:

—'Aixɨa keneutayɨki Kakaɨyari hepaɨtsita. Tame tepɨtemate mɨkɨ tewi 'axakatiniyuruwametɨni.

25 Mɨkɨ mɨpaɨ katiniwaruta'eiya:

—'Atsinepɨkatimate xɨka 'axatiyurieneni. 'Ikɨ xeikɨa ne nekatinimaika. Nepɨkaheunierekai, hikɨrixɨa nepeuniere.

26 Hikɨ mɨpaɨ mekatenitahɨawe:

—¿Kemetsi'uyuri, kemetiunieritɨa?

27 Mɨpaɨ katiniwaruta'eiya:

—Meripaitɨri yanepɨtixe'utahɨawixɨ, xepɨkanetsihanu'eni. ¿Ke'akuxi tawari xete'enaku? ¿Xemeta teyɨ'ɨkitɨwametemama xete'akɨniku?

28 Hikɨ mɨkɨ 'axamepɨte'itahɨawixɨ mɨpaɨ mete'ikɨhɨawetɨ:

—'Ekɨtsɨ hetsɨana mieme tiyɨ'ɨkitɨwame pepɨhɨkɨ. Tame pɨta Muitsexi hetsɨa miemete teyɨ'ɨkitɨwamete tepɨhɨkɨ. 29 Tame tekatenimaika Kakaɨyari Muitsexi mutahɨawixɨkɨ. Matsi 'ikɨ hepaɨtsita 'atsitepɨkatemate hakewa memieme.

30 Tewi mɨpaɨ katiniwaruta'eiya:

—Kamɨ, 'ikɨ pɨmariwe. Xeme 'atsixepɨkatemate hakewa memieme, peru pɨnetsi'anutanieritɨa ne. 31 Tepɨtemate Kakaɨyari mɨkawa'enie 'axamemɨteyurie. Matsi xɨka tewi Kakaɨyari 'ayexeiyani, xɨka yatikamieni tita mɨtinake Kakaɨyari, mɨkɨ kani'eniekamɨkɨ. 32 Tsutɨa paitɨ meta hikɨke pɨkahaxaxatsiwa kename xewitɨ tewi 'anutanieritɨa kemɨ'ane kaheunieretɨ mutinuiwaxɨ. 33 Xɨka 'ikɨ Kakaɨyari hetsɨa kamiemetɨnike, pɨkayɨwenikeyu 'atsimɨtiuyurieni.

34 Mɨkɨ mete'ita'ei:

—'Ekɨ 'axapetiyurienetɨ pemutinuiwaxɨ yemekɨ. ¿'Ekɨta tame petatita'ɨkitɨani?

Hikɨ takwa mekanenuyehɨani.

35 Merikɨtsɨ kaniu'ena Ketsutsi kename takwa mehenuyehɨakai. 'Itaxeiyaka mɨpaɨ katinita'iwawiya:

—'Ekɨ yuri peti'erie kemɨ'ane Yuri Tewi mɨhɨkɨtsie.

36 Mɨkɨ mɨpaɨ katinita'eiya:

—Ti'aitame, ¿kemɨ'ane pɨhɨkɨ yuri nemɨtita'erienikɨ hetsiena?

37 Ketsutsi mɨpaɨ katinitahɨawe:

—Pepixeiri, kemɨ'ane 'ahamatɨa mɨtikuxata, mɨkɨ kanihɨkɨtɨni.

38 Mɨkɨ mɨpaɨ kaniutayɨni:

—Yuri nepɨti'erie, Ti'aitame 'aku.

Hikɨ 'ukatunumakeka nenewieri kanipitɨani.

39 Hikɨ Ketsutsi mɨpaɨ kaniutayɨni:

—Ne nekaninuani 'ena kwiepa nemɨwapatakɨ, memɨkaheuneniere memanutanenierenikɨ, memeuneniere mekaheunenieretɨ memakɨnekɨ.

40 Merikɨtsɨ paritseutsixi hipatɨ hamatɨana memu'uwakai mekaniu'enanani. Mɨpaɨ mekatenitahɨawe:

—¿Tamerita tekateheuneniere?

41 Ketsutsi mɨpaɨ katiniwaruta'eiya:

—Xɨka xekaheunenierenike, mɨkɨkɨ xehetsie pɨkarahɨiwanikeyu. Matsi hikɨ mɨpaɨ xeputiyuane kename xeheuneniere. 'Ayumieme 'apuwe xehetsie kemɨrahɨiwa.