7
1 »Teyunaitɨ waɨriyarika tepɨte'uximaya 'ena kwiepa.
Tukari mɨyehane xeime hetsɨa temɨte'uximayaka hepaɨ pɨtimatsiɨkɨ.
2 Waɨriyaka ti'uximayatame tukarikɨ taikai mayanikɨ kemɨtitakwewie hepaɨ,
ti'iwame hepaɨ kemɨtita'ikwewa mɨtipitɨarienikɨ yu'uximayatsikakɨ,
3 yakɨxeikɨa waɨkawa metseriyariri nepuyeika mɨpaɨ netiuka'eniwatɨ,
tɨkarikɨ netiuka'eniwatɨ nepuyeika nehetsie tiunakeku.
4 Ne'ukaitɨ mɨpaɨ nepɨtiku'eriwani:
“¿Kepaukari pɨkahekɨare?”
Yɨriya hawaikɨ mɨkaheu'aka hepaɨ nepɨtimate,
ne'itaritsie ta'aurie xeikɨa nekanawautseni kepaukake mɨkahekɨare.
5 Newaiyaritsie kwitsiterikɨ nepeɨnɨtsa meta nepaukarani,
nenawiyari kananukutsanikeni meta pɨniya kaniuhaneni.
6 »Netukari xeiya kaniuhuni tepɨa kemɨrehuiwa reuyeta,
kata'ikwewatɨ xeikɨa kanaka'iyuniwani.
7 Kakaɨyari kenaye'eri, netukari xei'itukariyari kanihɨkɨtɨni,
hatsuakuri neyutemawietɨ nepɨka'ayani.
8 Hikɨ memɨnetsixeiya, matsi 'uxa'a mepɨkanetsixeiyaniri,
tsepa pemɨnetsixeiyamɨkɨ, matsi nepɨka'uyeikaniri.
9 Haiwitɨri ta'eketɨ kemɨtiukumamawere hepaɨ,
mɨkite wateukiyata memeukakɨka tawariri mepɨkawatikɨka.
10 Hatsuakuri yukie mepɨka'axe,
memakuteitsie mekanakumamawereni.
11 »'Ayumieme nepɨkayɨwe nemɨtinewieni ne'utaniutɨ,
ne'iyaritsie kenemɨtiuka'eniwakɨ nekaniutaineni,
meta mɨyamɨnetiyurie waɨriyarika kanenipitɨaka 'axa'anemekɨ nemɨtaniunikɨ.
12 ¿Kamɨtsɨ ne haramara netihɨkɨ meta mumariwe maukatewatsie kiekame,
xemɨnetsitaxeiyanikɨ xeikɨa?
13 Kepauka 'ipaɨ nemɨtiku'eriwa kename ne'itaritsie nenɨtɨarieni
yatɨni ne'aiwarika heunuani ne'uximatɨarietɨ,
14 matsi mana neheinɨtsita pekanenimariutani,
'axakenemɨtiniere neheinɨtsita waɨkawa pekaneniutimariutani.
15 Yanepɨra'eriwakaku nekɨipitɨa ne'ahuiyame
nemɨmɨnikɨ, newaiyaritsieri nemɨka'uyeikanikɨ.
16 Nepɨkaheunierimɨkɨri, yuheyemekɨri nemuyeikani yanepɨkara'eriwa.
Keneneuhayewari, netukariri tixaɨtɨ pɨkatihɨkɨ.
17 »¿Tewi ketita tihɨkɨ, waɨkawa meuyewetse pemeyeitɨwa,
meta hetsiena mieme pemɨ'ahɨawenikɨ,
18 ximeri paitɨ pepitaxexeiya
meta tsiere naime hurayaritsie yapemɨti'inɨatanenikɨ?
19 'Ariri pepɨkanetsitaxeiyani,
tsikere 'etsiwa 'aɨrika nemaxɨnikɨ kenenepitɨaka.
20 Xɨka 'axanetiuyurieni, 'ekɨ 'ahetsie nitixaɨtɨ 'atsipɨkati'ane,
teɨteri wa'ɨwiyame pehɨkɨtɨtɨ.
¿Ketitayari nehetsie petituaxane?
¿Nutsɨ waɨkawa nepɨmatsi'uximatɨa?
21 ¿Ketitayari 'axakenemɨtiuyuri pekanereuyehɨwirie?
¿Ketitayari 'axakenemɨtiuyurikɨ pekaratɨmai?
kwitɨwa matsi, tumuanaritsata nekanihuimɨkɨ,
pekanenitiwaɨmɨkɨ, matsi nepuka'uyeikaniri».