8
Wirirari matɨari kemutayɨ
1 'Ikɨkɨ Wirirari Tsuha kiekame 'ipaɨ katinita'eiya:
2 «¿Kepaɨmexɨa yape'utaitɨ 'apepuyeikani?
'aniuki 'eka waɨkawa mɨtɨrɨkaɨye hepaɨ mɨ'anekɨ.
3 ¿Kamɨtsɨ Kakaɨyari tita mɨtiheitserie 'axatiyurie?
¿Kamɨtsɨ Naimekɨmɨtɨrɨkaɨye titituna tita mɨtiheitserie?
4 Xɨka 'aniwema Kakaɨyari hepaɨtsita 'axamete'uyurieni,
mɨkɨ mɨyakatiniwarakapitɨani 'axakememɨte'uyurikɨ.
5 Matsi xɨka 'ekɨ Kakaɨyari pe'ayexeiyatɨ pe'ayani,
Naimekɨmɨtɨrɨkaɨye xɨka pe'utawawirieni mɨmareuyehɨwirienikɨ,
6 xɨka pe'itiyaka meta heitseriemekɨ yapetikamieni,
mɨkɨ 'ahetsie kanitanuamɨkɨ
meta hutarieka hakewa pemetayerɨnitsie kamaniyetuiriemɨkɨ.
7 Matɨari tita pemɨrexeiyakai mɨkɨ 'etsiwa xeikɨa mɨhɨkɨ pɨtihɨkɨtɨkai,
'uxa'atɨni warie waɨkawa kepemɨrexeiyani hepaɨtsita.
8 »Meripaitɨ kiekatari keniwaruta'iwawiya,
keneuti'iwau wapaapama tita memɨte'ukaxei hepaɨtsita.
9 Tame takaike tekaniutinunuiwa, 'atsitepɨkatemate,
'etɨriya hepaɨ tatukari kani'aneni 'ena temanu'uwa.
10 Peru mɨkɨ mepɨmatsitaxatɨani, 'ana yapepɨretimani,
kememɨtehetima 'ahetsɨa yamepɨtetaxata.
11 ¿Tiyɨwe papiru 'iteɨriyari haa mɨka'ayemanetsie mɨtawere?
¿Tiyɨwe mɨtiwawere haka hakewa haa mumawetsie?
12 Tsepanetɨ muxutu meta xewitɨ ka'enuwiteke,
mɨkɨmeri kanitiwaukeni hipatɨ tupiriya katiwawekaku.
13 Kemɨ'ane Kakaɨyari mematɨmai mɨpaɨ katiniwayurieka,
mɨpaɨ katineutiparikeni ketita memɨtetakwewie Kakaɨyari memɨka'ayexeiya.
14 Katɨrɨkaɨyemekɨ mekanita'ikwewani,
yuri mekateni'erieka tuká winiyarieyatsie.
15 Kepauka mɨkɨ hetsie mɨrawiya pɨkayɨwe mana mɨyɨtɨrɨkariya,
mepatixɨrieni kepauka mɨkɨ hirutsie memɨte'awiya.
16 'Iteɨri waɨkawa yuxawari mexeiya xɨripa muwe hepaɨ mekani'aneneni,
yumamatekɨ harawerita naitsarie mɨ'etɨriwie:
17 Tetetsata yunanarikɨ kwi katineukawiwiyani
kanikuwauneni kwimɨrawiyakɨ.
18 Peru xɨka manuwetsie hahunarieni,
hakewa mewekaitsie 'atsipɨkatimatsiɨkɨre.
19 Mɨpaɨ temawierikaya katineutiparikeni,
meta mana kwiepa hipatɨ pɨtata 'iteɨri kanitineikani.
20 »Kakaɨyari 'aixɨa mɨtiuka'iyari pɨnaki'erie,
kemɨ'ane 'axamɨtiyuriene pɨkaparewie.
21 Hekwamekɨ pemutanawenikɨ pɨmatsipitɨani,
meta pe'atemawietɨ pemutahiwanikɨ.
22 Memɨmatsi'aye'unie mepuyutewiyatsitɨani,
meta 'axamemɨteyurie wakii pukumaweriya».