9
Hairieka Kuwi kemutayɨ
1 Kuwi mɨpaɨ tiniwaruta'eiya:
2 «Tsepa yemekɨ nemɨtimate kename mɨpaɨ tiɨyɨ,
pɨkayɨwe tewi mumɨwe Kakaɨyari hɨxie 'aixɨa muyuyurienikɨ.
3 Xɨka xewitɨ mɨkɨ 'axatihɨawimɨkɨni,
'iwaurikaya xeimiriyaritsie timieme pɨkayɨwe xeimetɨma muta'eiya.
4 Mɨkɨ waɨkawa katinimaiweni tɨrɨkariyaya kanimariweni.
¿Kemɨ'ane pɨyɨwe 'itamieme 'aixɨa 'iyari mɨyɨxɨna?
5 Hɨri kanikuyuitɨwani mɨkɨ mɨpaɨ katimaikaku,
meta yuhaxɨakɨ kaniwakupatani xaɨtsie.
6 Mɨkɨ kwie tsutɨmeyari naime kanikuyuitɨwani
meta 'ikitsaraɨte kwie mutuikatɨka kaniwatayuitɨwani.
7 Tau kaniutate'ani, hikɨ 'ɨrɨya kanikɨtɨtɨtseni,
xurawetsixi waxawatɨriya kaneukunarɨmani.
8 Mɨkɨ yuxaɨta muyuawi kaniutawerani,
meta haramara hamewarieya maunuitɨanikɨ kaniyɨweni.
9 Mɨkɨ Hararu meta Terɨka kaniwarunetɨani,
meta Tsimanixi metatsiere xurawetsixi memɨyuwaɨkawa tatsutɨa memuyetei.
10 Mɨkɨ mamariwaweme witsi'aneneme pɨtiyuriene 'atsikatiyumainɨakame,
tɨrɨkaɨyemekɨ kemɨtiyuriene pɨkayu'inɨatsinɨa.
11 Xɨka nehɨxie 'uyeyanike, nepɨka'ixeiyakeyu,
xɨka nehetsɨa hayeyanike, nepɨkayuwe nemixeiyakɨ.
12 Xɨka tixaɨtɨ yupiini rayeitɨani, ¿kepaikɨ pɨyɨwe mita'imaiyakɨ?
¿Kepaikɨ pɨyɨwe mita'iwawiyakɨ kemɨtiuyurikɨ?
13 Kakaɨyari yuhaxɨa pɨkakununuitɨwa,
Xahawi meta 'iparewiwametemama 'ɨkatɨana mekanikatunuma'uweni.
14 »¿Kamɨtsɨ ne kenetita'eiyakeyu?
¿Niukikɨ 'axanemɨti'eiyakɨ hakewa nepeitaxeiya?
15 Tsepa 'axanemɨkatiyuruwame, nepɨkayɨwe nehetsie nemɨtanuanikɨ,
nenimayatsika nemuta'iwauni xeikɨa nepɨyɨwe ne'itsɨkame hɨxie.
16 Tsepa ne'itahɨaweyu mɨkɨ mɨnetsi'uta'ei,
peru mɨnetsi'enieni nepɨkara'eriwa,
17 'Eka naime mɨti'unawekɨ pɨnetsi'umiewe,
'etsitipemekɨtɨtɨ waɨkawa mɨnetiuka'enitsitɨiya pɨyɨwe.
18 Pɨkanetsi'upitɨawe nemɨta'ienikɨ,
matsi pɨta, waɨkawa hiwerika pɨnetsi'upitɨawe.
19 Tɨrɨkariyakɨ xɨka ti'aneni, Mɨkɨ matsi kanitɨrɨkaɨyeni.
Xɨka 'itaxaneta, ¿kemɨ'ane pɨyɨwe mi'atɨanikɨ?
20 Tsepa 'aixɨa 'anemekɨ nemuyeika, neneni kanenanutahɨamɨkɨ,
tsepa 'atsinemɨka'utaine, nehetsie katinahɨiyamɨkɨ.
21 »'Aixɨa 'anemekɨ nepuyeika, matsi mɨkɨ tixaɨtɨ pɨkatiyunaki'erie,
netukari waɨkawa nepɨkanaki'erie.
22 Tinaitɨ yaxeikɨa katini'aneni, 'ayumieme nekanaineni:
“'Aixɨa memɨte'u'iyari meta 'axamemɨte'u'iyari yunaime yaxeikɨa katiniwareuyehɨpani”.
23 Xɨka kwiniya 'utaweni hipame wahetsie yapauka me'ukwini,
'axamɨkatiyuriene kaninanaimaka tiuka'eniwakaku.
24 Xɨka xewitɨ kwietsie 'ɨyɨkɨtɨrɨkariyani 'axatiuka'iyaritɨ,
mɨkɨ 'itsɨkate wahɨxi kanautinarɨmani.
¿Kemɨ'ane yapɨtiyurieni? mɨkɨri xɨka yakatiuyurieni.
25 »Nanautsame kemɨkahayɨwe netukari mɨpaɨ kaniyeyɨximeni,
kaniumieni tixaɨtɨ 'aixɨa mɨti'ane nepɨkaretimaiwe.
26 Kanuwa ha'exanitɨ muhauximeni hepaɨ kani'aneni,
kwixɨ hepaɨ kanayɨweni kepauka yu'ikwai mɨtitɨximeni hepaɨ.
27 Xɨka 'ipaɨ ne'utayɨni: “Ne'uximatɨarika nepatɨmaiya, 'aixɨa ne'utaitɨ nepayani,
nepɨnepatari kenemɨraka'erie, ne'utanawetɨ nepayani”,
28 kenemɨtiuka'eniwa waɨkawa mɨkɨkɨri nepuma,
mɨpaɨ nepɨtimate kename heitserie nehexeiyame meka'erie.
29 'Ariri nehetsie mɨrahɨiwakɨ,
¿titayari waɨriyarika netinepitɨaka yakɨxeikɨa?
30 Tsepa xapunikɨ nemuti'ɨwaxɨ
naime ne'uyutaxapunimawatɨ meta nemamatsie xapuni mutumuanikɨ,
31 haa 'ukuri'ɨatɨ muhanetsie 'ekɨ pekaneneukahɨamɨkɨ,
hikɨ nekamixatetɨtɨ kanenitixani'erimɨkɨ.
32 »Kakaɨyari tewi hepaɨ pɨka'ane,
teyunaitɨ tahamatɨa 'itsɨkame hɨxie temuti'unikɨ.
33 Tatsata 'itsɨkame kaniumaweni
teyuhutame tahetsiemieme yamɨtayɨnikɨ.
34 Xewitɨ pumawe neheima nunuwame Kakaɨyari 'iwaɨyɨya
'ateewa mehɨanikɨ nemɨka'imakaxenikɨ kemɨnetimariutakɨ.
35 Nekaheumatɨ neputaniukanikeyu,
matsi mɨpaɨ nemɨyɨni nepɨkayɨwe.