13
1 »Naime mɨkɨ nehɨxikɨ nekatiniuxeiya,
nekatiniu'enieni meta nekatinetimaitɨyani.
2 Neta waɨkawa nekatiniuyemaika xehepaɨ,
xeme xeikɨa waɨkawa xete'uyemaikame xepuyu'erie.
3 Matsi yemekɨ nepɨtixatamɨkɨ pɨta Naimekɨmɨtɨrɨkaɨye hamatɨa,
pɨnetsinake nemɨtitixatakɨ Kakaɨyari hamatɨa ketitayari nemɨti'ane.
4 Xeme matsi netsikwamanamete xekaniyɨaka,
teyu'uayemawamete tixaɨtɨ memɨkateyunaki'erie xepɨhɨkɨ.
5 Xɨka xetehayewanike xe'utiniutɨ.
Mɨkɨri mɨpaɨ pɨtimatsiɨkɨnikeyu kename xetemaiwawe.
6 Hikɨta ne xepɨnetsi'enieni,
kwi xekeneu'eni kenemɨtayɨni.
7 ¿Kakaɨyari hepaɨtsita xemɨte'u'itani xeteyuwaɨririya?
¿Hetsienamieme kwamanarikakɨ xetekuxatatɨ?
8 ¿Xe'iparewiekame xeteyu'erie?
¿Xemeri hetsiena miemete niukametemama xete'ayuyeitɨwa?
9 ¿Xɨka mɨkɨ xeheutixeiyaxɨani ketiɨyɨwe?
¿Xete'ikwamanawawe teɨteri kememɨte'ayukwamana wahepaɨ?
10 Kanahekɨaka matsi mɨkɨ pɨta kanixe'utatieweni
xɨka xeme xete'itawatɨ hetsiena mieme xeyuhekɨatani.
11 ¿Kamɨtsɨ xekate'itimakawawe xawatɨriyaya?
¿Xehetsie katiukawewe mariutsikaya?
12 Yakɨ xeikɨa kememɨtekuxatakɨ naxi hepaɨ pɨtiyumatsiɨkɨ,
yuheima nunuwame haxukɨ muwewiya mɨtariwe hepaɨ.
13 »Xeketeneuhayewa xe'utiniutɨ xekeneneupitɨa nemɨtaniunikɨ,
yaketiuyɨni kenemɨyɨ.
14 ¿Titayari kwinie 'anekɨa netiyukakeka,
meta netukari netitatuaka?
15 Tsepa mɨnetiumi. Ne hetsiena nepɨtitakwewie.*13:15 Yatɨni: Kenetsi'umieni. Tixaɨtɨri nepɨkatitakwewie.
Matsi hɨxiena kenemɨtiuyeikakɨ yanepɨtayɨni.
16 Mɨkɨ pɨhɨkɨ mɨnetsitawikweitsitɨani:
metsɨ xewitɨ Kayaɨyari mɨka'ayexeiya pɨkayɨwe hɨxiena mɨtakeni.
17 »Neniuki xekeneu'eni,
kenemɨtayɨni xekeneu'enana:
18 Neuxei neheima kenemɨtitanuani 'aixɨa nekatiniuyurieniri,
mɨpaɨ nepɨtimateri nehetsie pɨkarahɨiyani.
19 ¿Xewitɨ nehetsie mɨrahɨani tiyɨwe?
Xɨka xewitɨ yɨweni, tawariri nepɨkataniuni kepaukakeri nemɨmɨni.
20 »Kakaɨyari, tihutame xeikɨa nemumatiwawirie kenetineupitɨa,
hikɨ 'ana 'ahɨxie nepɨkaneti'awieta:
21 'Ariri pepɨkanetikwinitɨaka
meta keneneuhayewa penetsimariutatɨ.
22 Nemɨnetahekɨatakɨ keneneutahɨawi, nepɨmatsita'eiya,
yatɨni keneneupitɨa nemɨtaniunikɨ, 'ekɨta keneneuta'eiya.
23 Kepaɨmexɨa 'axanemɨtiuyuri keneuti'inɨata,
yakenetineuxeitsitɨa 'inɨari kenemɨreutitsanaxɨa meta ke'axanemutayɨkɨ.
24 ¿Ketitayari pekanetixeiyamɨkɨ?
¿Ketitayari nemɨmatsi'aye'unieka hepaɨ petiyɨane?
25 ¿Xatsi 'u'enirɨmeme pe'utimariutame petitatemɨxikita?
¿Kuxari peranukuweiya?
26 Nehetsiemieme pepɨraka'utɨa hatsiwimekɨ,
temaikɨyari paitɨ ke'axanemɨtiuyurikɨ, mɨkɨkɨ pepɨnetiuka'enitsitɨwa.
27 Ne'ɨkatetsie tepɨa karenayarikɨ pepɨnetsi'akuwie,
kenemɨtiuyeikakɨ pepɨnetsikuxeiyane xeikɨa,
neketa xeikɨa pepu'iyeikene kenemɨtikuyeika.
28 »Nawi winu makatuarike mɨtaxɨxime hepaɨ tewi pɨ'ane,
kamixa tepaxi memitakwai hepaɨ pɨ'ane.