14
1 »Tukari 'etsipɨpaɨme, timɨireta 'uximatɨarika,
tewi 'ukaratsitsie mɨyenuiwaxɨ meixeiya.
2 Tuturite hepaɨ kani'aneni, mɨkɨ mɨtineika kwitɨwata kanitiwaukeni,
'etɨriya 'akareuteteretɨ kemɨtiyukupata hepaɨ pɨ'ane.
3 ¿Xeime mɨpaɨ 'aneme hetsieta pereutaniere?
¿Xeimeta nehepaɨ petiuta'iwawiyawe?
4 ¿Kemɨ'ane pɨyɨwe mɨkati'itiya ti'itiyakame mɨrayeitɨani?
xewitɨ pumawe mɨpaɨ mɨtiyurieni.
5 Tewi tukarieya 'ari puti'inɨatsie,
'ekɨ 'ari yapeputayɨ kepaɨmeme metseriyari 'amuyeikani,
'inɨariyari 'apepuyete mana manutiyani pɨkayɨwe.
6 Keneuhayewa pe'ixeiyatɨ, keneuhayewa kayuwatɨ 'amuyeikanikɨ,
yutukaritsie yutitemawieyuke yu'iwarikakɨ.
7 »Xɨka kɨye hawitekieni,
pɨyɨwe mayɨraxɨanikɨ
meta mayɨraxɨani pɨkatiyɨnare.
8 Xɨka mɨkɨ nanayarieya 'ukirawetsixi 'akɨne kwiepa
meta mɨkɨ kɨtsunuyari 'umɨni yukwiepa,
9 matsi kepauka haa hetsiena mɨye'ani kanitaxutuimɨkɨ,
'iteɨri hekwamekɨ muka'iteɨtsie hepaɨ kanikayɨramɨkɨ.
10 Matsi tewi, pɨmɨwe meta yɨtɨrɨkariya peuyehɨpa,
yu'iiya 'imatɨrieka mieme panatituaya, hikɨ 'ana pukumamawere.
11 Haramaratsie haa kemɨranati'eke hepaɨ,
meta haa 'aki 'amupapatsie kemɨrakawauke hepaɨ,
12 mɨpaɨta teɨteri, kepauka kayuwatɨ memɨte'uhipite,
tawariri mepɨka'anuku'uwe.
Mexi muyuawi 'atsikayɨweni,
memukwi mepɨka'anuku'uni
meta mepɨka'anutaneniere mekutsutɨ.
13 »Xɨka yɨwenike mɨkite wateukiyapa pemɨneniuti'awieta
kepauka 'ahaxɨa manuyeyanike.
Tsikere yapaɨmexɨa xɨka penetsi'utipinirienike,
'ariketa xɨka penetsi haye'erienike.
14 Xɨka tewi 'umɨni, tawariri 'ayeyuritɨ pɨka'ayani.
Kenemɨreutere netiuka'eniwatɨ ne'uyeikatɨ
nepɨta'ikwewani kepaukake nemɨxɨnarieni.
15 'Ekɨ pepɨnetsitahɨawe, neta nepɨmatsita'eiya,
pepɨnetsi xeiyamɨkɨni pemɨnetsi'utawewikɨ.
16 Meta pepi'inɨatamɨkɨni kenemɨtiuyeika,
matsi ke'axanemɨtiuyurikɨ pepɨkahe'eriwaniri.
17 Kuxitari 'anutawipemeta 'inɨari kenemɨreutitsanaxɨakɨ pepika'uta,
meta naime ke'axanemɨtuiyuri pepɨnereuyehɨwirieni.
18 »Matsi hɨri kemɨtika'unike yapapaɨmetɨ,
tetexi kemɨtiyukupata makainiketsie,
19 haa 'ayepari kemɨtixɨtɨa
meta haa mɨtɨrɨkaɨye kwie kemɨretutuwe,
mɨpaɨta 'ekɨ tewi ketita mɨtitakwewie pepɨreutiparitɨwa.
20 'Ekɨ naimekɨ mɨkɨ tewi pepa'iwa, mɨkɨ pukumamawere,
yɨkɨtiyuxexeiyame pepayeitɨwa, hikɨ 'ana pepeinɨ'awa.
21 Xɨka niwemama 'aixɨa metehahɨawaruwani, mɨkɨ pɨkaremaika,
xɨka mehenanaimarieka, mɨkɨ 'atsipɨkaretimani.
22 Yuxaɨta xeikɨa kukwiniya pe'enie yuwaiyaritsie,
yuxaɨta xeikɨa peyuhiwerie».