21
'Atahutarieka Kuwi kemutayɨ
1 Mɨkɨ hepaɨtsita Kuwi mɨpaɨ katinita'eiya:
2 «Neniuki yemekɨ xekeneu'eni,
mɨkɨkɨ nɨtɨarika xekanenipitɨakuni.
3 Kayuwatɨ xeketeneteni mexi netikuxata,
xekenenenanaimaka 'arike netitahayewayuke.
4 »¿Tewi mɨmɨwe kuta hetsiemieme netikuxata?
¿Kexeteku'eriwa ketitayari nemɨtinewieka nekatiyɨwe?
5 Xekeneneuxeiya, meta xekenehɨxiyaka,
yumamakɨ yutenitsie xekeneuwɨka.
6 Xɨka mɨpaɨ netiku'eriwani, waɨkawa nepekamatɨyeika,
netaɨta pɨnetsi'utanɨtsa neheuxerimɨtɨ.
7 ¿Titayari 'axamemɨte'u'iyari mete'u'uwa,
'ukirawetsixitɨtɨri meta waɨkawa matsi meteheuxeiyatɨri?
8 Memakuteitsie mekutekame mekaniwaxeiyakuni
yuniwema meta yuxiɨyarima.
9 'Aixɨa 'iyari mepu'uwa yukie, meta mepɨkamariutsie,
Kakaɨyari 'iwaɨyɨya pɨkatiwakwinitɨa.
10 Watúrutsixi yemekɨ 'aixɨa me'aneneme memuwatinuariwa mepɨhɨkɨ,
wawakaitsixima mepɨtiniweya meta mepɨka'anuye'iwetsiwa.
11 Yutɨɨriyama memɨnautsatɨwenikɨ mepɨwapitɨa muxatsi memɨhɨkɨtɨni wahepaɨ,
tɨɨri tsimemupepe me'utitsukwakatɨ mepuyutemamawie.
12 Xekeneutikwikani teputsie meta kanaritsie kemekɨyɨnekɨ,
pirikɨxakɨ xeketeneukayuitɨwani kemekɨyɨnekɨ.
13 'Aixɨa tiwayuriekaku mepu'uwa,
meta yu'iyarikɨ mɨki teukiyapa mepɨ'axe.
14 Kakaɨyari mɨpaɨ mekatenikɨhɨaweni: “Kayuwatɨ ketaneuhayewa.
Kemɨmatinake yatemɨtekahunikɨ tepɨkaheumaiku.
15 ¿Kemɨ'ane Naimekɨmɨtɨrɨkaɨye pɨhɨkɨ, tame temeyexeiyanikɨ?
¿Ketita teteha'iwa xɨka xeikɨa tame nenewieri te'iyetuirieka?”
16 Matsi ke'aixɨa memɨteheuxeiya yɨtɨrɨkariyakɨ mepɨkate'ukaxei.
'Axamemɨteyurieri wa'ɨxatsi ne nepɨka'enieka.
17 »¿Kepauka 'axamemɨte'u'iyari wakɨxeme pɨtɨxɨa?
¿Kepauka 'axamɨtiwayurie wahetsie pɨye'axe?
¿Kepauka Kakaɨyari, yuhaxɨakɨ, pɨtiwakwinitɨa
18 'eka 'uwakaxa kemɨre'enitsitɨwa hepaɨ,
kuxari 'eka mɨtɨrɨkaɨye mei'enitsitɨwa hepaɨ?
19 Mɨpaɨ xepɨnetetahɨawe kename Kakaɨyari tiuti'utaxɨ yamɨtiwarakapitɨanikɨ
'axamemɨteyurie waniwema wahetsiemieme.
Matsi kemɨ'ane 'axamɨtiuyuri kerakapitɨani,
mɨkɨ yamɨretimanikɨ.
20 'Axatiyuruwame ketiuka'eniexɨani yuxaɨta muyutatɨmaiyakɨ.
Naimekɨmɨtɨrɨkaɨye haxɨaya ke'anu'ieni.
21 ¿Kekutari tiyɨkɨhɨaweni yutɨɨriyama wahetsiemieme mɨwaku'eirieni,
xɨkari yapaɨmexɨa xeikɨa heuyeweka mukumawerekɨ?
22 »¿Kemɨ'ane pɨyɨwe Kakaɨyari mɨtiuta'ɨkɨtɨani mɨkɨ mɨtimaiwenikɨ,
mɨkɨ matsi katihɨkɨ heitseriemekɨ yamɨtayɨni waɨkawa memauka'u wahetsiemieme?
23 Hipatɨ 'akuxi yakɨ meyumatetɨ mekanitakukuweni,
'aixɨa meteheu'erietɨ meta meka'uximatɨarietɨ,
24 wakwatsapaɨ waɨkawa wiyatɨkaikaku,
wa'umete waɨkawa tɨrɨkawikaku 'akuxi.
25 Hipatɨ mekanitakukuweni meyuhɨawetɨ,
'aixɨa mɨti'ane mekateha'inɨatawawetɨ.
26 Tumuanaripa yuxexuitɨ mekanikuhikuni,
mɨkɨ yunaitɨ kwitsiterixikɨ mekaneunɨtɨkaikuni.
27 »Nepɨtimate xeme kexemɨteku'eriwa,
meta yaxetekuxatatɨ kexemɨnetsiyurienikɨ xeikɨa.
28 Yaxeikɨatsiere nekatinimaika mɨpaɨ xekaniyuku'iwawiyani:
“¿Hakewa waɨkawa meukawe kiiya pewe?
¿Hakewa 'axamemɨte'u'iyari wakii peti'u?”
29 ¿Kɨkamete xekatewata'iwawiyawawe?
¿Kwi xekatewaku'eniwa kememutiyuanekɨ?
30 'Axamɨtiwayurie tukariyaritsie, 'axamɨtiuka'iyari puyutawikweitsitɨwa,
kepauka haxɨa tukariyari maye'anitsie putawikweitsitɨariwa,
31 ¿Kemɨ'ane hɨxiena mɨkɨ kemɨtiuka'iyarikɨ yapɨtitahɨawiwe?
¿Kemɨ'ane mɨrekapitɨani pɨyɨwe mɨkɨ kemɨtiuyurikɨ?
32 Kepauka mɨkite memakateukiwatsie manukweiyani,
maka'awietsie heima kanita'ɨwiyariemɨkɨ,
33 yɨmɨiretɨ teɨteri mekaniweiyani 'utɨmana,
meta yumɨiretɨ mekanika'awiwietani teukiyata.
Kwieta paitɨ muyeweritsie kani'uxipieka kayuwatɨ.
34 »¿'Akuxi xenetetakwewie xenetsinɨtɨanike yuniuki mɨkawaɨriyakɨ?
Kexemɨneteku'eiya naitɨ mɨkɨ pɨti'itarika».