22
Hairieka 'Eripaxi kemutayɨ
1 Mɨkɨ hepaɨtsita 'Eripaxi Temani kiekame mɨpaɨ katinita'eiya:
2 «¿Xewitɨ tiyɨwe, waɨkawa timaiwetɨ,
Kakaɨyari hetsiemieme tixaɨtɨ tiyunaki'erietɨ mayanikɨ?
3 ¿Tixaɨtɨ 'aixɨa ti'aneme tikaxeiya Naimekɨmɨtɨrɨkaɨye,
tewi heitserie pemexeiya pehɨkɨtɨkaku?
¿Mɨkɨ tixaɨtɨ rexeiyatɨ rayani
xɨka 'aixɨa 'anemekɨ pe'uyeikani?
4 ¿Kamɨtsɨ pemeyemakaxekɨ metiutate'a,
'ayumieme memataheitseritɨariwatsie meranuwitɨni?
5 Matsi kaniwaɨkawani 'axakepemɨtiuyuri.
'Axakepemɨtiuyuri pɨkayu'inɨatsinɨa.
6 'A'iwama pepɨtiwakwetatɨakai,
meta pekaheiyehɨatɨ wakemarite pepɨwakunawairiwakai,
meka'ukemarime pepɨwakuhayeikawakai.
7 Kemɨ'ane meuharimɨkɨkai pepɨkaharitɨakai,
'ikwai meuyehɨakai pepikweririekai.
8 Tewi waɨkawa meukawe pepa'ayeitɨa meta kwie 'ahetsiemieme pepayeitɨa,
tewi waɨkawa pemumariwe, mɨkɨtsie 'aixɨa pekatiniuyerɨni.
9 Wiuraxi tixaɨtɨ pepɨkatiwakumikwakai,
meta nutuite naime pepɨtiwakunawairiwakai.
10 'Ayumieme hikɨ winiyari 'a'aurie kanakani,
meta 'ayumieme pekanimariutsieka,
11 yɨriya pekaheuniereme kamenayeitɨaka,
haa mɨtɨrɨkaɨye kameniukayunitɨwani.
12 »Kakaɨyari matsi muyuawi 'ameutitewatsie kaniuyeikani.
Xurawetsixi keniwareutixeiya, 'aheutitewakaku memakatei.
13 Matsi 'ipaɨ pekaniutaineni: “¿Kakaɨyari ketimate?
¿Kamɨtsɨ tiyɨwe makɨyɨwitsie mɨtatsitaheitseritɨani?
14 Mɨkɨ muyuawi taheima muyema hetsie kaniyeikaneni muyuawi manuye'atɨkatsie ye'axetɨ,
meta haiwitɨri 'e'ayetsuitɨ kaneitinarɨmani,
'ayumieme pɨkatatsixeiya”.
15 »¿Meripai mieme yeiya petiyeweiyani
'axateyuruwamete kememɨte'u'uwakai?
16 Kahaye'awekaku 'akuxi yutukari mekaniutatɨmaiya,
haa mɨtɨrɨkaɨye watsutɨmeyari kanahautsitɨaxɨani.
17 Kakaɨyari mɨpaɨ mekateniutahɨawe: “Kayuwatɨ ketaneuhayewa.
¿Kekuta 'ekɨ petatsiyurieni, Naimekɨpemɨtɨrɨkaɨye?”
18 Kakaɨyari katiniuyurieni 'aixɨa mɨti'ane mɨtiuta hɨniyaxɨ wakiita.
Ne 'axamemɨteyurieri wa'ɨxatsi nepɨka'enieka.
19 «Heitseriemekɨ yamemɨtekahu mekaniyutemawieka 'axamemɨte'u'iyari kememɨte'uka'unarɨwa mewaxeiyatɨ,
wahetsie mɨkarahɨiwa mɨpaɨ mekaniutiyuaneni mewananaimatɨ:
20 “Memɨtatsi'aye'unieri mekaniuka'unarieni,
wapiinite taipa naitɨ katiniutixɨni”.
21 »Kakaɨyari hetsɨa 'aixɨa kene'ayuri, kayuwatɨ pehexeiyame kene'ayeitɨa mɨkɨ hamatɨa,
'ahetsie katinanuamɨkɨ perexeiyatɨ pemayanikɨ.
22 'Ɨkitsikaya tetana mayeneika keneutanaki'eri,
'a'iyaritsie niukieya kenaka'ɨki.
23 Naimekɨmɨtɨrɨkaɨye hetsɨa xɨka penuani
meta 'axamɨti'ane 'akie xɨka perayeweiya,
naimekɨ pekanihekwatɨariemɨkɨ,
24 xɨka 'ahuru 'aixɨa mɨ'anene*22:24 huru 'aixɨa mɨ'anene. Pɨyɨweta mutayɨni huru 'Upixi mieme. kwiepa pe'itixɨrieni
tetexitsata meta 'aita,
25 Naimekɨmɨtɨrɨkaɨye 'ahuru kanihɨkɨtɨkamɨkɨ 'ahetsiemieme,
meta mɨkɨ 'apɨrata 'aixɨa mɨ'ane kanihɨkɨtɨkamɨkɨ 'ahetsiemieme.
26 Naimekɨmɨtɨrɨkaɨye hetsie pepɨ'atemawieka,
Kakaɨyari hetsɨa pepeutaniereni.
27 Kepauka pemuyunenewie, mɨkɨ kameni'enimɨkɨ,
'ekɨta kepemɨti'ahɨritɨakɨ pekaneye'atɨiriemɨkɨ.
28 Ketita pemɨtitsutɨani yapɨtikɨyɨneni,
'ahuyeta xawatɨriya pɨhekɨariwieka,
29 Memuyuti'ɨre Kakaɨyari tixaɨtɨ pɨkatiwarayeitɨwa,
tixaɨtɨ memɨkatehayuyeitɨa kaniwaranuku'uitɨwani.
30 Mɨkɨ wahetsie mɨkarahɨiwa kaniwawikwetsitɨaka,
'aixɨa pemɨtiuyurikɨ pekanitawikwetsitɨariemɨkɨ».