2
'Utsikari kuyaxiyari
1 Kerutsaremetsie kuxineta xekeneutahɨtsiwani,
nehɨri mɨpatsie hetsie xekeneutihiwani mɨ'enieriekakɨ.
Yunaitɨ teɨteri kwiepa xemɨtama xekenemamaka,
'aritsɨari Yawé tukarieya 'ukanamieni
kaniyuritɨni kanehuraniri.
2 Yɨriya tukariyari kanaye'amɨkɨ,
hai tukariyari mɨyɨyɨxawi kanaye'amɨkɨ.
Hekɨariya kemɨtiyuhekɨa kahekɨarirɨmetɨ kwiepa,
mɨpaɨ katinimakatsiukɨni kiekari mɨmariwe mɨtɨrɨkaɨye,
meripaitɨ hatsuaku kemɨkatiɨyɨ,
nuiwarite 'umemahu wahetsiemiemeri hatsuaku yapɨkatiyɨni.
3 Mexiyukukuyamete meka'aye'axɨawawe 'iya tai kaniwatixɨtsitɨwani,
kepauka mɨpaɨ mɨraye'ani tai pɨtititaiya naime.
Mexixi kahaye'awe kiekari 'Ereni haraweriyari witsimɨraku'ane hepaɨ pɨtiyuxexeiya,
kepauka mɨpaɨ mɨtiyɨni yeuta makumawe payani.
Tɨrɨkariyaya hepaɨtsita tixaɨtɨ pɨkatitawikweni.
4 Kawayutsixi wahepaɨ mepɨteyuxexeiya,
kawayutsixi meha'atɨ meheuyukwiyuka wahepaɨ mepɨte'unanautsa.
5 Kepauka hɨri 'emutɨtɨtsie memeutatsukwaka,
kaxetatsixi yukukuyamete wayuarika hepaɨ pɨtiyu'eniɨriɨkɨ,
xatsi taipa taiyarietɨ mutatsipɨarɨka hepaɨ.
Kuyaxi memɨtɨrɨkawi 'aixɨa memɨteheku'u meyutakwinike mɨpaɨ mepɨteyuhekɨa.
6 Teɨteri marikakɨ meputiyɨyɨaka,
yunaitɨ mepunututuixietɨka.
7 Mepaye'axɨa memeuyutakwiwawe wahepaɨ,
wapaitɨ mepeutimake kuyaxi wahepaɨ.
Yuxexuitɨ mepuhu
'aixɨa meteheuku'utɨ kememɨteyu'uitɨakai.
8 Yuhetsie mepɨka'uyexɨrɨwe,
heitserie mepuhu yuxexuitɨ.
'Ɨrɨtsata mekaniuhuni
meka'anuyutaxɨrɨwatɨ.
9 Kiekaritsie mekanitahakeni,
kuraru heima mepeukamake,
kiitetsie mepɨtimake,
'etsimeuyeyeutsie mepeuhake tenawayamete wahepaɨ.
10 'Ikɨ kuyaxi wahɨxie kwie naitɨ puyuane
meta muyuawi pukuyuane,
tau meta metseri pɨyɨrixɨani,
meta xurawetsixi mepɨtehayewa mehekɨariwietɨ.
11 Yawé niukieya kanekutɨrarɨkani
yukuyaxima wahɨxie,
mepɨkayu'inɨatsinɨa kuyaximama
mepɨtɨrɨkawi niukieyatsie yamemɨtekahu.
Yawé tukarieya waɨkawa kanimariweni kanimakaxiwani.
Xewitɨ pɨkayɨwe mɨtinewirienikɨ.
Kememɨte'uta'imaiyarie memɨtehayewakɨ 'axameteyurietɨ
12 Yawé mɨpaɨ kanaineni: «Merikɨ,
yunaitɨ yu'iyarikɨ nehetsɨa xekeneu'axɨa,
xe'utitsuatɨ, xeyuheiwerietɨ xekatekwatɨ».
13 Yu'iyaritsie xekeneuyukatsanani
yukamixatsie pɨkatixaɨ.
Yawé yukakaɨyari hetsɨa xekeneu'axɨa,
mɨkɨ pɨtiuyukanenimaya pɨkahayu'eriya,
naki'eriyakɨ pɨhɨne kwitɨwa pɨka'uyeha'arɨwe,
pɨyuwaɨriya naime mɨreuyehɨwirienikɨ meta pɨkarakwinitɨani.
14 Heiwatɨ Kakaɨyari 'aixɨa mɨtinixe'uxei kemɨtiku'eriwakai mɨnipataxɨ,
'aixɨa mɨti'ane mɨtatiniuhayewi.
'Imikieri hatsite mɨkɨ meta kaxie winuyari mɨtiyeuriwa
Yawé xekakaɨyari hetsɨa katinimiemetɨni.
15 Kerutsaremetsie kuxineta xekeneutahɨtsiwani,
xeketeniwarukaxatɨa memɨyuhakienikɨ,
xekeniwaruta'ini yunaime 'axeikɨa.
16 Kiekatari xekeniwarukuxeɨri,
xekenepatsieka xeyuxeɨrietɨ
'ukirawetsixi mana kiekatari xekeniwarukuxeɨri,
'etsimemupepe meta xekeniwarukuxeɨri
meta tɨɨri memɨtsitsewetɨka.
Kewayeyani hekwamekɨ mutineɨkixɨ,
meta 'uka mɨhekwawikie kewayeyani yukiita.
17 Xekeneutitsuanani te'uximayatamete mawari wewiwamete Yawé hetsɨa miemete,
tuki mɨranutahakitɨre hɨxie meta mawari taiyame hɨxie xeti'utɨ,
mɨpaɨ xe'utiyuatɨ: «Yawé 'ateɨterima ketiniwareuyehɨwirieka.
Pepɨkatatsiyetuayani 'axatemɨka'itɨarienikɨ
kapa nuiwarite tahetsiemieme 'axame'utiyuanikɨ.
Hipatɨ mɨpaɨ memɨka'utiyuanenikɨ teɨteri:
“¿Hakewa xekakaɨyari peyeika?”»
Yawé kemɨtiwaruta'ei
18 Merikɨtsɨ Yawé matsiɨkɨme kanayeitɨani kemɨtinaki'eriekai yukwie hetsiemieme,
katiniwareuyehɨwirieni yuteɨterima.
19 Yawé mɨpaɨ katiniwaruta'eiya:
«Neuxei nepɨtixeyetuirieni, hatsite, kaxie winuyari mɨhekwa meta hatseiti,
waɨkawa nepɨxetihuxaitɨani 'aixɨa xeteyukuhɨaweme nepɨxehayewa.
Nepɨkaxeyetuani tawari
hipame kiekarite wahetsɨa xemɨnanaimarienikɨ.
20 »Nepɨkawapitɨani 'utsikari xeyeta 'amemayehu,
kwie makumawetsie meta makuwakitsie nepɨwareukɨnɨ'ani:
Haramara Mɨmɨkitsie nepɨwakayunitɨani wakuyaxi memanuyetei,
wa'utɨmata memuhu Haramara Meritexaniyatsie.
Wakaxari pɨtipɨne
waɨkawa pɨtiukuri'ɨaka».
Yawé waɨkawa mariwemekɨ katiniyurimɨkɨ.
21 Nekiekari pepɨkamaka,
matsi kene'atemawieka kene'uxipieka,
matsi Yawé waɨkawa mariweme katiniyuriemɨkɨ.
22 Tewaxi xepɨkamamaka 'ɨtsita xemu'uwa,
'ɨxa mumawekaitsie pɨtixuawere naitɨ pɨtiyɨra,
'iteɨrite yutakariri mɨtikwaiwa pɨtixuawitɨani,
piní meta kaxie waɨkawa pɨtixuawere.
23 Xekeneyutemamawieka Tsiyuni tɨɨriyamama,
temawierika xekenexeiyani Yawé yukakaɨyari hetsiemieme,
kepauka maye'ani wiyeri pukuyuitɨani tukarieyatsie.
Wiyeri pɨxehanɨ'airieni
xekaka'ewawekaku meta xeka'itsanayu,
meripaitɨ manukatɨatsie kemɨtiyurienekai hepaɨ.
24 Mɨrati'uritɨretsie tɨriku waɨkawa pɨtixuawere,
kaxie mahinarietsie winu mɨhekwa waɨkawa puxuaweni meta hatseiti.
25 «Ne nepɨtixekɨhɨwirieni
kepaɨmexɨa wiyari xemɨteheuyehɨa naime,
'iya kuyaxi memɨyumɨire tekɨmemete wahekɨ
kenemɨtiwarenɨ'a xehetsɨa:
'amemɨnene, meta yakɨmemɨnene,
'etsimemɨpepe meta kwimemɨpepe.
26 Xeme waɨkawa xepɨte'utikwa'ani, kexemɨteheukwaikɨ,
Yawé yukakaɨyari hetsiemieme 'aixɨa xeputiyuaneni,
xehetsiemieme 'aixɨa kemɨtiyurieni.
Tawariri hatsuaku neteɨterima nepɨkawatewiyatsitɨani.
27 Merikɨte 'ana mɨpaɨ mekatenetimaikuni kename ne 'ixaheritsixi wahamatɨa ne'uyeika,
kename ne Yawé xekakaɨyari nehɨkɨ,
xewitɨ tawari 'apɨka'uyeika kakaɨyaritɨtɨ ne'aurie.
Tawari hatsuaku neteɨterima mepɨkatewiyatsitɨarieni.
Yawé tukarieya
28 »'Arike mɨpaɨ tiyɨyu,
ne'iyari nepɨtatuani yunaime teɨteri wahetsie.
Xeme xeniwema 'ukitsi 'ukari mepɨtetaxata,
'ukirawetsixi mepɨteheinɨni
temarita mepɨtexeiyatsitɨarieni.
29 Mɨkɨ tukaritsie ne'iyari nepɨtatuani
'ukitsi meta 'ukari te'uximayatamete wahetsie.
30 Mɨyuawitsie meta kwiepa 'inɨari nepɨtiyurieni:
xuriya, tai, meta kɨtsi 'e'utɨtɨme.
31 Tau yɨwitɨ kanayeimɨkɨ
metserita xuriyapaɨ 'anetɨ kanayeimɨkɨ
mexi Yawé tukarieya kahaye'aweni,
kepauka mariwemekɨ mɨtiyurienitsie.
32 Yunaitɨ Yawé memahɨawe kemɨtimariwe
yutukari mekanitawikweitsitɨakuni,
hɨritsie xeikɨa Tsiyuni meta Kerutsaremetsie,
pɨyɨweni muyuta'una,
Yawé kemɨtiwarutahuawekai.
Memayeneniere wahamatɨa
xeikɨa mepu'uwani Yawé mɨwaruta'ini.