3
Nuiwarite kememɨte'ukwinitɨarie
1 »'Iya tukaritsie, kemɨtika'inɨaritsie maye'anikɨ,
kepauka ne Kura 'aixɨa nemɨwayurieni meta Kerutsareme newahekwariyatɨ,
2 yunaime nuiwarite nekaniwakuxeɨriemɨkɨ
Kutsapati mayeweritsie nekaniwakanɨ'amɨkɨ.
Mana nekaneutahamɨkɨ teɨteri nemɨtiwakwinitɨanikɨ
neteɨterima 'Ixaheritsixi wahetsiemieme,
'ateewa nuiwarite watsata memɨwareutaweiyaxɨakɨ
meta nekwie memuyutaxitekiexɨakɨ.
3 Neteɨterima mepuyuta'iwiri kemɨ'anetsie mɨtinakenikɨ,
tɨɨri mepuwarupataxɨ 'ukari tuminikɨ memɨyuwitɨnɨa wahekɨ,
meta memɨtitarɨwenikɨ,
'ukari tɨɨrixi winukɨ mepuwarutua.
4 »Merikɨte, Tiru meta Tsiruni, meta naitsarie mɨtiuyehane Piritsiteu kwieyari hetsie, ¿ketita kuta xetehayexeiya nehetsiemieme? ¿Xenetekɨhɨwirienike xeteyu'erie? Xɨka mɨpaɨ 'aneni, nematsi kwitɨ yanepɨtiyurieni xehetsie mɨtinakenikɨ kexemɨnetsiyuriku, 5 xemetsɨ nehuru meta nepɨrata xekaniunawani, yutukita paitɨ xekatenetɨni piinite waɨkawa nemɨreuyehɨwa. 6 Xeme kɨriyekutsixi wahetsɨa neteɨterima xekaniwarutuani Kerutsareme meta Kura memɨtama yukwiepa memɨka'u'uwanikɨ.
7 »Matsi mɨpaɨ xeketenemaika, ne nepuwarayewitɨni tsepa hakewa paitɨ memetuiyakai, ne yanepɨtiyurieni mɨkɨ 'axakexemɨte'uyuri xehetsie mɨtinakenikɨ. 8 Xeniwema 'ukitsi 'ukari Kura kiekariyaritsie nepɨwatuani, mɨkɨta yaxeikɨa tsaweutsixi wahetsɨa mekaniwatuakuni nuiwarite 'ateewa kiekatari wahetsɨa». Yawé mɨpaɨ kaniutayɨni.
9 Nuiwarite mɨpaɨ xeketeniwarutaxatɨa:
Xekeneyuha'aritɨaka xemɨyutakwinikɨ.
Kuyaxi xekeniwaxeɨrieka.
Xekeneyuha'aritɨaka yunaitɨ 'ukitsi kuyaxa miemete xemuyutakwinikɨ.
10 Hatsaruni yu'ixipara xekenayeitɨa
meta huxa tɨriku xikame tepɨa 'amɨtewi xekenayeitɨa.
Kemɨ'ane meumaka mɨpaɨ ke'utayɨni:
«Ne nepɨka'ukama».
11 Xeiya xekeneyumexɨitɨaka, nuiwarite xemɨtama ta'aurie,
mana xekeneyuxeɨrieka mayeweritsie.
Yawé, keniwaranɨ'a memayu'eririya 'ahetsɨa miemete.
12 «Nuiwarite xekeneyukuxeɨri,
xekenehu Kutsapati muyeweri paitɨ,
mana nekananukayerɨmɨkɨ
teɨteri 'auriena kiekatari nemɨtiwakwinitɨanikɨ.
13 Keneukaxitekiri,
tɨriku 'aixɨa mɨ'anene kanihɨkɨtɨni.
Kaxie xekeneutiketsina,
matiketsinarɨwatsie pɨhɨpɨne.
Kaxie xariyariri panakayeuriwe:
puwaɨkawari 'axakememɨteyurie».
14 Mekaniyɨmɨireni memɨyɨxeɨrie
Mayeweri maye'atɨarienitsie.
'Ari Yawé tukarieya kanehuraniri
Mayeweri maye'atɨarienitsie.
15 Tau meta metseri kaniyɨrixɨakuni,
xurawetsixi mepɨkahekɨariwieniri.
16 Yawé puyutahaxɨatɨani Tsiyunitsie paitɨ,
Kerutsareme paitɨ tɨranarieya kani'enieriemɨkɨ,
kwie meta muyuawi kanitayuamɨkɨ.
Matsi Yawé kemɨ'ane memɨteɨterimama pɨwa'awietani,
'ixaheritsixi pɨwatɨrɨkariya.
Kakaɨyari yuteɨterima 'aixɨa kemɨwaruyuri
17 «Merikɨtsɨ xeme mɨpaɨ xekatenetimaikuni, ne Yawé xekakaɨyari,
Tsiyuni nemukakɨ neyemuri mɨpatsietsie.
Kerutsareme mɨpatsie kanayeimɨkɨ,
tawari 'ateewa kiekatari waɨriyarika mepɨkawatahaxɨani mexenawairienike.
18 »'Iya tukaritsie kaxie winuyari makaka hɨritsie panexɨani,
yemuritetsie retsi puhapaneni.
Haa puwayenexɨani 'akite manuyehapanetsie kura kwieyaritsie.
Yawé tukieyata haixa pɨtineikani,
'Akatsiya kɨyeyari pɨhatuiyani mayeweritsie mɨye'u.
19 'Ekipitu naime nepɨrakumaweriya,
'Erumi makumawe nepayeitɨani,
'axamemɨwaruyurikɨ Kura kwieyaritsie kiekatari,
wakwiepa waxuriya memutayeurikɨ 'atsimekateyuriekame.
20 Kura kwieyaritsie meta Kerutsaremetsie kiepa payani yuheyemekɨ,
yunaime nuiwari 'umemahu wahetsiemieme.
21 ¿Kamɨtsɨ netiwareuyehɨwirieni xuriya memutayeuri?
Matsi hawaikɨ nepɨkatiwareuyehɨwirieni».
Yawé Tsiyunitsie 'ukaitɨ kanayeimɨkɨ.