2
Kememɨtekwinitɨarieni xikutsixi memɨteyukananaima
1 Xɨa'ui kemɨ'ane xeikɨa memɨyu'iyaritɨa 'axamemɨteyurienikɨ,
me'uheitɨ 'akuxi ke'axamemɨteyurienikɨ memitiwewiwa.
'Amɨtikataretsie, mɨpaɨ mepɨte'eye'atɨwa
mɨkɨ tɨrɨkariya memexeiyakɨ yuhetsie.
2 Kwie mɨraka'etsitɨre mehiwe'erietɨ, yupiini mekanayeitɨwani,
meta kiite, mɨkɨta yukii mekanayeitɨwani.
Waɨriyarika me'inanaimatɨ 'uki mekateni'aitɨaka meta tɨɨriyamama,
tewi meta tita mɨrexeiyakai.
3 'Ayumieme, Yawé mɨpaɨ kanaineni:
«Hikɨta nepɨta nekanihɨkɨtɨni nemɨne'iyaritɨa
wahetsie nemi'atɨanikɨ 'axamɨtiwayuriekakɨ,
mɨkɨ tsata memayuye'una mepɨkayɨwekaxɨani.
Mepɨkaku'uwaniri heitserie meheutanenieretɨ meyuti'ɨretɨ,
maye'akɨri tukari ke'axamemɨ'itɨarienikɨ.
4 'Ana tukaritsie hipatɨ mepɨwananaimaka,
hikɨ 'ikɨ hiwerika kwikariyari wahetsiemieme pɨtakwikarieni:
“Tepeuyexɨri.
Neteɨterima wakwie memaka'etsa mekaniyutaxitekiwani.
Kehepaɨtɨtɨ menetenawairietɨwe.
Memɨtatsi'a'iwaxɨ takwie mekaniyetuiriyarɨwani”».
5 'Ayumieme xepɨkaheixeiyani Yawé teɨterimama watsata
xeime kwie wayetuiriwame.
Kakaɨyari niukametemama memɨkahɨkɨ
6 'Ikɨ Kakaɨyari niukametemama mɨpaɨ mepɨnetekɨhɨawe:
«'Ari ketineuhayewa petihekɨatatɨ.
Pepɨkataraxaxatɨwani kename teka'unarieni».
7 Kakuwu nuiwarimama mɨpaɨ mekaniutiyuaneni:
«¿Kamɨtsɨ Yawé tinewatɨ 'ari tiuhayewaxɨ?
¿Kamɨtsɨ mɨyatiuka'iyari?
¿Tamɨ niukieya 'aixɨa katiyuyuruwa?
¿Tamɨ tame 'aixɨa mɨtiuka'iyari hepaɨ tekate'u'uwa?»
8 Takai xeme neteɨterima xepɨhɨkɨtɨkai,
peru hikɨri xemɨnetsi'aye'unie xepakɨ.
Hakewa mɨreyukwine memeyekɨka,
kayuwatɨ me'uhukaku huyeta,
wakamixa 'amɨtɨtɨ xepɨtewanawairietɨwe.
9 Neteɨterima 'ukarawetsixi
wakiita 'aixɨa memɨtemateta xepɨwarayexɨrɨwa,
meta watɨɨriyama yuheyemekɨ xepɨtewanawairie
naime tita nemɨtiwayetuiri.
10 Xekenanuku'uti. Xekeneuhuni,
'ikɨ 'ena xema'uxipie pɨkahɨkɨ.
Tita 'axamɨti'ane xepɨte'utahɨniyaxɨ,
xepika'unaxɨ naime yemekɨ.
11 Xɨka xewitɨ tixe'itaiyamɨtɨ,
xɨka nuani ti'itawatɨ mɨpaɨ tixe'utahɨawe:
«Ne nepɨtixetahekɨatɨani kaxie winuyari meta kaxie hayari wahepaɨtsita»,
'ikɨ teɨteri Kakaɨyari niukameya mepayeitɨani.
Kemutayɨ kemɨtiwaxɨnakekai
12 Kakuwu, yurikɨ mɨpaɨ nekanaineni,
ne yunaime 'ateɨterima nekaniwakuxeɨrimɨkɨ.
'Ixaheri, yurikɨ mɨpaɨ nekanaineni,
ne nekaniwakuteɨximɨkɨ memuyuhayewaxɨ.
Nepuwakuxeɨrieni muxatsi kuraruta memeuta'ɨnarieni hepaɨ,
muxatsi wahepaɨ, maku'ɨxaya hixɨapa,
memɨyuwaɨkawani hepaɨ tɨranari mepɨwewieni.
13 Panuyekani kemɨ'ane muhuyetarɨmeni,
meta mɨkɨtatsiere huye mepuyuwewirieximeni,
kitenie mekaniuyekɨnikuni hikɨ mekaniyehuni,
mexi tiwa'aitɨwame 'umieni 'anuyekaitɨ,
mexi Yawé 'anuyekaitɨ 'umieni.