3
Kememɨtekwinitɨarieni kuwexinaruritsixi kemɨkatiheitserie memɨte'uximaya
1 Hikɨ mɨpaɨ nekaniutayɨni:
«Xekeneu'enana, Kakuwu nuiwarimama wakuwexinaruritsixi,
xemɨ'itsɨkate 'ixaheritsixi wahetsiemieme:
¿Kareuyewetse xeme
xemimaika tita mɨtiheitserie?
2 Xeme 'aixɨa mɨti'ane xekateni'uxieka, tita mɨkatiheitserie pɨtata xetenaki'erie,
neteɨterima me'ayeneniereme wanawiyari xepɨkatsana
meta wawaiyari wa'umeyaritsie,
3 xeme neteɨterima xepɨwakwa'a,
wanawiyari xepɨkatsana, wa'umeteyari xepɨtimura,
'etsipepeme xepɨwatixiteke wai xarita mɨka'etsarieni hepaɨ,
wai huxunuta mɨ'imaiyani hepaɨ».
4 'Uxa'atɨni Yawé mekanitahiwikuni parewiya mehewawiriwatɨ,
matsi mɨkɨ pɨkawata'eiya,
wahetsiemieme puyuti'awieta
'axamemɨte'uyurikɨ.
Kakaɨyari niukametemama memɨte'itawa meta yuri memɨtekuxata
5 'Ipaɨ kanaineni Yawé xehepaɨtsita,
Kakaɨyari niukametemama neteɨterima xemɨwareuyexɨrɨwa:
«Kemɨ'ane 'ikwai memɨxemikwa, kename kayuwatɨ'uma xepɨtewakuxaxatɨwa,
kemɨ'ane 'ikwai memɨkaxemikwa, kename kuyaxa 'ayani xepɨtewakuxaxatɨwa.
6 Hikɨ 'ayumieme, mepɨyɨriyarieni tawari tixaɨtɨkɨ mepɨkatexeiyatsitɨarieni,
mepɨkayɨwekaxɨaniri memɨtetaxata kemɨtiyɨni 'arike».
'Ikɨ Kakaɨyari niukametemama wahetsiemieme tau pakayune,
tukarikɨ wahetsiemieme yɨriya payani.
7 'Iyaritsie mieme memɨtaneniere mepɨyutitetewiya,
kakaɨyarixi memɨwaruta'iwawiya kemɨtiyɨnikɨ tixaɨtɨ mepɨkate'ayeitɨarieni.
Kakaɨyari wateta pɨreunani,
mɨkɨ tawari pɨkawata'eiya.
8 Ne, matsi, tɨrɨkariyakɨ nekanihɨneni,
nekanihɨneni Yawé 'iyarieyakɨ,
meta nekanihɨneni tita mɨtiheitseriekɨ meta tɨrɨkariyakɨ,
nekaniyɨweni Kakuwu nuiwarimama nemɨwarutaxatɨani ke'axamemɨtekahu
nekaniyɨwenita 'ixaheritsixi nemɨwataxatɨani ke'axamemɨte'uyuri.
'Itsɨkame 'axamɨtikamiekɨ, 'ayumieme Tsiyuni puka'unarie
9 Xeme 'ikɨ xekeneu'eni,
Kakuwu nuiwarimama wakuwexinaruritsixi,
meta 'itsɨkate 'Ixaheri kwieyaritsie miemete,
tita mɨtiheitserie xepɨxani'erie meta xepitituna niuki heitserie mɨtikuxata,
10 Kerutsareme meta netuki manuwe
'imieri meta kemɨkatiheitserie tukarikɨ yapɨtixuawe.
11 Wa'itsɨkate metepitɨarietɨ xeikɨa 'aixɨa mepɨteyurie,
wamawari wewiwamete mepɨwa'ɨxatsitɨa meteyuwiyatɨ,
meta wakakaɨyari niukametemama tuminikɨ xeikɨa mekatenikuxatani kemɨtiyɨni,
'imatɨrieka matsi, Yawé hetsie mekaniyutɨrɨkariyani, mɨpaɨ mekaniutiyuaneni:
«¿Tamɨ Yawé tahamatɨa katiuyeika?
Tame hawaikɨ 'axatepɨka'itɨarieni».
12 'Ayumieme, xeme ya'aneme xewiwiekaku
Tsiyuni kwietsanaripa hepaɨ tiyuxexeiyatɨ kanayeimɨkɨ,
Kerutsareme 'unimeyari xeikɨa kaniyuhekɨarimɨkɨ,
meta yemuri tuki manuwekai 'ɨtsita kanayeimɨkɨ.