5
Ti'aitame Rawiri nuiwarieya hepaɨtsita
1 Neniwe 'uka yumemiwame, 'akuyaxima keniwarukuxeɨri,
takuraruri kananutinamieka.
'Iwaɨyɨkɨ yu'auritapa peutiweiyani
'Ixaheri kwieyaritsie ti'aitame.
2 Matsi 'ekɨ, Wereni 'Epɨrata,
kiekari 'etsipemɨyewa Kura nuiwarimama watsata,
'ahetsie pɨyeyani 'Ixaheritsie mɨtita'aita,
tsutɨa paitɨ kiekatari puwanuiwari,
watukari mɨka'inɨari.
3 'Ayumieme Kakaɨyari kaniwayetuamɨkɨ mɨwaraye'unie hetsɨa,
kepaukake 'ukaratsi mayehuka 'ukitɨme mɨtiniweni,
hikɨ 'ixaheritsixi memehapaniekai
yu'iwama 'ixaheritsixi wahetsɨa mepɨ'axɨani.
4 Peru xewitɨ kaninemɨkɨ muxatsi wahepaɨ wahɨweme mayani
Yawé tɨrɨkariyayakɨ,
mɨkɨ kemɨtimariwe 'ipitɨakaku Yawé kakaɨyarieya.
'Aixɨa 'iyari mepu'uwani, mɨkɨ mɨti'aitanikɨ
kwie kemɨyewa naimetsie.
5 Mɨkɨ kayuwatɨ temu'uwanikɨ yapɨtiyurieni.
Xɨka 'Atsiriya nuani takwieyaritsie
takwieyari ka'unake takiekarite kuraruyari 'amatitetewa,
tepitamieni yu'atahutame muxatsi wahɨwemete tewarawitɨtɨ,
meta 'atahaika kuyaxi memanuyetei wahekɨ,
6 mɨkɨ 'Atsiriyatsie mepɨtetahɨni 'ixiparakɨ,
Nimiruri kwieyatsie, nawaxakɨ mepɨteta'aita.
Xɨka 'Atsiriya takwieyari 'uka'unake,
xɨka takwieyaritsie watahanike,
mɨkɨ pɨtatsitawikweitsitɨani.
Memuyuhayewa
7 Kakuwu nuiwarimama memuyuhayewa,
teɨteri meyumɨireme watsata,
haɨtsi Yawé hetsɨa mieme hepaɨ mepɨ'aneni,
wiyeri 'amayetsuye tupiriya hetsie mɨkaxɨrɨwe hepaɨ,
teɨteri memɨka'inɨ'a,
meta tixaɨtɨ mɨkatiwarawawiriwa.
8 Kakuwu nuiwarimama memuyuhayewa nuiwarite watsata,
yumɨireme teɨteri watsata,
maye yeutarite watsata kemɨtiyumate mɨkɨ hepaɨ mepɨ'aneni,
maye temaikɨ muxatsi watsata kemɨtiyumate hepaɨ,
kepauka watsata meutahani puwatixutsina meta puwatikwa'a,
nixewitɨ wahetsie mɨtanuani mɨkayɨwekɨ.
9 Memɨxe'aye'unie xepɨwatakwini,
hikɨ yunaime xepɨwakwini memɨxekwitɨwe.
Kememɨte'itiyani kakaɨyarixi memɨkawarayexeiyanikɨ
10 Yawé mɨpaɨ kanaineni:
«Mɨkɨ tukaritsie 'akawayutsixi kuyaxa miemete nekaniwareuyehɨamɨkɨ,
metatsiere 'akaxetate kuyaxa miemete.
11 Kiekarite 'akwieyaritsie miemete nekanakuxɨtɨamɨkɨ
metatsiere naime 'akiekarite kuraruyari 'ematitɨtɨ.
12 Kepemɨtiyukewaiya nekaneitipariyamɨkɨ
meta kakaɨyarixi memuwaruta'iwawiya kemɨtiyɨnikɨ pepɨkawarexeiyaniri.
13 'Akakaɨyarixi nekaniwareutipariyamɨkɨ
meta 'atetexi memɨpatsietɨka 'amɨti'u,
tawariri hatsuaku wahɨxie pepɨkatitunumakeni
'amamakɨ pemɨtiwawewie wahɨxie.
14 'Atserá 'ɨkiyarite nepatihunaxɨani,
meta 'akiekarite 'unimeyari kwinieneme nekanikemɨkɨ,
15 neha'atɨ waɨkawa nekatiniwarakapitɨamɨkɨ
kemɨ'ane nuiwarite memɨkanetsi'anu'eni».