6
Kakaɨyari yuteɨterima kemɨtiwaxaneta
1 Yawé kemutaine xekeneu'eni:
«Kenanukukexi, hɨrite wahɨxie 'axanetsika keneyetua,
yemurite 'aniuki meke'u'enieni».
2 Yemurite xekeneu'eni, Yawé xanetsikaya,
kayuwatɨ xekeneu'enana, kwie tsutɨmeyari,
Yawé kanitsutɨaka yuteɨterima waxanetatɨ,
kanitsutɨani 'ixaheritsixi wahamatɨa 'aixɨa mɨtiyurienikɨ:
3 «Neteɨterima, ¿ne kenexe'uyuri?
Yaxekeneteneutahɨawi kepauka nepɨxe'umuinaxɨ.
4 Ne nekatiniuyurieni 'Ekipitu kwieyaritsie nemɨxe'ayewitɨ,
nemɨxe'uxɨnaxɨ mɨkɨ kwieyaritsie waɨriyarika xete'aitɨariekaku.
Ne nekaniwarutanɨ'ani Muitsexi, 'Aruni meta Miriyami,
memɨxe'uwitɨximenikɨ.
5 Neteɨterima, xekena'eriwani
Waraki Muhawi kwieyaritsie ti'aitame kemɨtiyurimɨkɨkai,
meta Warami Wehuxi nu'aya kemɨtita'ei.
Xekena'eriwani kexemɨte'ukɨ Tsitini xemɨyekɨ Kirikari paitɨ xemu'axɨa,
meta mɨpaɨ xeketenemaika Yawé kemɨtixe'utawikweitsitɨa».
6 ¿Kehepaɨ neyɨme Yawé hɨxie 'ahurawa nepunuani
meta kehepaɨ Kakaɨyari Mɨmariwe hɨxie netikatunumakeni?
¿Netiyɨwe mawari taiyariyarikɨ
yatɨni tsikeru xeiwiyari mexeiya neyetuatɨ?
7 ¿Yawé tiyukatemawieni miriyaritekɨ muxatsi 'ukitsi wahekɨ,
yatɨni tamamata miriyari 'akiyarikɨ hatseiti muhapane?
¿Neniwe mexɨakame netiyetuani,
nehetsie mɨyetɨa netiyetuani 'axanemɨtiuyurikɨ?
8 Yapekatiniutaxatɨarieniri tita 'aixɨa mɨti'ane.
Pepɨtiutaxatɨarieri tita mɨtitakwewie 'ahetsiemieme Yawé:
Yapepɨtiyurieneni tita mɨtiheitserie hepaɨtsita,
pepinaki'erieka nenimayatsika,
meta Kakaɨyari hɨxie mariweme pepɨka'ayuyeitɨwani.
Kememɨtekwinitɨarieni 'axamemɨte'uyurikɨ tuminikɨ meta teɨteri wahetsie
9 Nuiwarite meta teɨteri kiekaritsie kiekatari,
Yawé niukieya xekeneu'eni, pɨxeha'iniwa,
xɨka xetemaiwaweni, Yawé xekenemakaxeni.
10 «'Axaxemɨte'u'iyari.
¿'Atsinekaraineni tumini xemexeiya 'axa'anemekɨ xeme'iwaxɨ,
meta heuyewekamekɨ xemɨteku'inɨnɨata hepaɨtsita?
11 ¿Kename 'aixɨa 'ane nera'eriwani kirutame mɨtinawaya hepaɨtsita
meta tepɨa mahete manuyeyaxike 'aixɨa mɨkareuku'inɨatsie?
12 Xikutsixi kiekaritsie kiekatari 'axamepɨte'u'iyari,
kiekatari mepɨte'itawa,
yuteta yuneni mepexeiya ti'itawame.
13 'Ayumieme ne, nekametinikwinitɨamɨkɨ nemetsitiwayatɨ,
ne nepɨmetsika'una 'axapemɨtiuyurikɨ.
14 Pepɨtiutikwa'ani, matsi pepɨka'utahuxarɨweni,
matsi yaxeikɨa pepɨhaakatɨarieka.
Pemɨtiukaxexeiyani yapɨreuyeikani,
meta tita 'etsiwa pemɨrexeiyani memɨmatsi'aye'unie nekaniwayetuiriemɨkɨ.
15 Tita pemɨtika'eni mɨkɨ pepɨkaka'itsana,
huriwu takari tsepa pemutipɨnaxɨ hatseiti pepɨkahexeiyani,
meta kaxie winuyari pepɨka'anu'ieni tsepanetɨ takariyari pemutiketsi.
16 'Ekɨ 'aixɨa 'anemekɨ 'Umiri 'aitsikaya pekaniuweiyani
meta naime 'Akawi nuiwarimama kememɨteyurie,
yapepɨtiuyeika 'ɨxatsieya kemutiyuane.
'Ayumieme pemɨka'unarienikɨ nekameniyetuamɨkɨ,
meta 'ateɨterima nekaniwatewinɨamɨkɨ.
Teɨteri 'axakemematekɨhɨaweni pepinewieka».