7
Hiwerika matsi kemɨtikuxatakai tixaxatame
1 Xɨa'ui ne.
Wiita 'ikwaxi muti'inɨiwatsie 'anutiyaku nepunua,
pɨkayɨweri kaxie nemɨtiwauni,
tsikere xeixatsimuyari nepɨkahexeiya nemitikwanikɨ,
xapa takari yɨrime tɨma nepɨkahexeiya, kɨmana nemɨmɨxime.
2 Teɨteri Kakaɨyari memayexeiya 'ikɨ kwieyaritsie mekanakuxɨtɨarieniri,
'ena kwiepa mepumaweri teɨteri 'aixɨa memɨte'u'iyari.
Yunaitɨ hipame mepɨwakwiku,
meta yunaitɨ mekaniyuwiniyatɨweni.
3 Nixewitɨ pɨkawara'iwa ke'axamemɨteyuriekɨ,
ti'aitame parewiwametemama meta 'itsɨkate mepiku'iwawa 'awie memɨtepitɨarienikɨ.
Memɨtɨrɨkawi mekateniku'iwawani xeikɨa,
meta yunaitɨ mekaniyutemawieritɨaka ketita memɨtehiwe'eriekɨ.
4 Watsata muyeika 'aixɨa mɨtiuka'iyari kwinimieme matsi katinihɨaka keyuri 'ɨtsi,
kemɨ'ane heitserie 'amuyeika, matsi kanitunini keyuri xuya.
Matsi kanaye'aximeniri memɨhɨxiyatɨarienitsie,
kanehuraniri tukari memɨtekwinitɨarienitsie,
kememutiyua memɨtaneniere 'ahetsɨa miemete.
5 Xeime 'ahepaɨ tewi yuri pepɨkati'eririeka,
'ahamikuma wahetsie pepɨkatiwiyani,
kene'akweriwayurieka kepemɨtikuxaxatɨwa
'ahamatɨa mukahupu.
6 Nu'ayatɨtɨ yupapa pɨxani'erie,
'uka yumaama pɨkaheu'enie,
meta mu'etsiekame yumu'e paye'unie,
memɨxe'aye'unie xeme yuxexuitɨ
xekiitatɨtɨ mepayetetɨka.
7 Matsi ne Yawé hetsie netiwiyatɨ nepɨta'ikwewa,
nepɨta'ikwewani Kakaɨyari hetsie netsiwikweitsitɨwame.
Nekakaɨyari kaneni'eniemɨkɨ.
'Ikwewarika memɨtawikweitsitɨarienikɨ
8 Pemɨnetsi'aye'unie 'aku, 'axakemɨnetiyuriekɨ pepɨkayutemawieka.
Nepatiwe, matsi nepanukukeni,
yɨwipa nepuyeika, matsi Yawé nehekɨariya pɨhɨkɨ.
9 Yawé hepaɨtsita 'axanekatiniuyurieni,
'ayumieme nepinewieni haxɨaya
kepaukake 'aixɨa mɨtiyurieni kenemɨtiuyurikɨ
meta kemɨtiheitserie nehetsiemieme.
Hikɨ 'ana hekɨaripa pɨnetsi'atɨani
meta neyutemawietɨ nepayani wikweitsitɨarikayakɨ.
10 Mɨnetsi'aye'unie kepauka mɨniere,
mɨpaɨ mɨnetikɨhɨawekai: «¿Hakewari 'akakaɨyari?»,
waɨkawamekɨ puyutitewiya.
Nekanixeiyamɨkɨ kemɨtika'unarieni,
karikɨ haxu huye 'utɨa mieme hepaɨ katiniketsinariemɨkɨ.
11 Kepauka 'akuraru 'amatayewa tawari mawewiyatɨyani
'ana kanihɨkɨtɨkamɨkɨ 'akwie 'apemɨtayeuriya.
12 Mɨkɨ tukaritsie 'ahetsɨa mepɨ'axɨani teɨteri,
'Atsiriya metsutɨtɨ meta 'Ekipitu kiekariteyaritsie paitɨ meye'atɨ,
Niru hatuxameyari manuyeka metsutɨtɨ meta 'Eupɨrate hatuxameyaritsie meye'atɨ,
haramaratsie metsutɨtɨ meta tapa haramaratsie paitɨ, meta teewanarixi xeime hɨritsietari.
13 Karikɨ mɨkɨ kwieyarite makumawe kanayeixɨamɨkɨ
teɨterimama ya'aneme meheutiwiwiexɨaku,
'axamemɨteyuriekaikɨ.
14 'A'itsɨ pe'akwetɨ 'ateɨterima keniwahɨneni,
muxatsi 'atewama,
yuxaɨta 'ɨtsita memɨkie,
'ɨtsi hixɨapa.
Watsani meta Karaha mu'ɨxayatsie ketiniwarutimikwa
meripaitɨ hepaɨ.
15 Mariweme ketineuyuri wahɨxie,
'Ekipitu kwieyaritsie pemɨwarayewitɨtsie hepaɨ.
16 Hipatɨ nuiwarite mekaninenierikuni mariwemekɨ kepemɨtiyurieni,
hikɨ yutɨrɨkariya mekanititewiyakuni,
yutenie mekaniuwɨrikuni
meta memɨkaheu'enana mekanayuyeitɨakuni.
17 Tumuanari mekanikutsenakuni kuuterixi wahepaɨ,
kwiepa yutawima memɨteku'uwa wahepaɨ.
Mepɨwayekɨne me'utiyɨyɨakatɨ hakewa memeyu'awietatɨka
meta, memamatɨ 'ahɨxie,
mekaniyuyetuakuni 'ahetsɨa, Yawé meta takakaɨyari.
18 Pumawe Kakaɨyari 'ahepaɨ tiuka'iyaritɨ,
'axamɨti'ane mɨtareuyehɨwiriwa
meta tixaɨtɨ mɨkarayeitɨwa ke'axamemɨte'uyuri
teɨterima memuyuhayewaxɨ.
'Aheyemekɨ pepɨkaha'a,
naki'eriya mɨmatsinakekɨ pɨta.
19 Tawari ketaneutinenimayata.
Ke'axatemɨte'uyuritsie kenakexi,
meta naime 'axaketemɨte'uyuri haramara 'amatiyewatsie ketineukaxɨri.
20 Matsiɨkɨme kenayeitɨa Kakuwu pemɨkaku'eiriwe hatsuaku,
meta 'Apɨrahami heitserie kepemɨtinaki'erie,
meripaitɨ tsutɨa paitɨ
kepemɨti'ahɨritɨa tatutsima wahamatɨa.