21
'Arari kemɨra'iwarie
1 Kepauka kananeu tewiyari mɨti'aitametɨkai 'Arari kiekariyaritsie, Nekexi 'ukaitɨ, katinetimani kename 'ixaheritsixi Hatarimi huyeyari 'utɨa mehahu, kaniwarutakwini hipameta kaniwarutiwiya. 2 Hikɨ 'ixaheritsixi mɨpaɨ mekaniutiyuani Yawé hetsiemieme: «Xɨka 'ekɨ teme'iwa yapehaineni mɨtatsi'aye'unie, naime wakiekari tekanika'unakuni». 3 Yawé kaniwaru'enieni 'ixaheritsixi kememɨte'iwawiriekai, kaniwarupitɨani kananeutsixi memɨwara'iwakɨ, yunaime teɨteri mekaniwarukwini meta wakiekarite mekaniuka'una. 'Ayumieme mana Kuxima katiniuterɨwarieni.
Kuu wurunitsekɨ mɨwewiya
4 'Ixaheritsixi mekanayekɨne Huxi hɨriyaritsie Haramara Mɨxeta hepatsie me'eerietɨ, 'Erumi kwieyari warita me'ahutɨ. Huyeta me'uhutɨ mepɨkate'unenewi 5 mekaniutiniukixietɨkɨne Kakaɨyari hepaɨtsita meta Muitsexi:
—¿Titayari kuta 'Ekipitu xetatehayewitɨ makumawetsie temɨkwinikɨ? 'Ena 'ikwai haa kaniumaweni. 'Ariri ta'iyaritsie katineuyemieni 'ikɨ 'ikwai kwaiyarikɨ.
6 'Ayumieme Yawé kuuterixi memɨmɨya kaniwareyenɨ'airieni memɨwatikenikɨ, 'ana yumɨiretɨ 'ixaheritsixi mekaniukwini. 7 'Ixaheritsixi Muitsexi 'aurie me'ukɨneka mɨpaɨ mekatenitahɨawe:
—Yawé hepaɨtsita te'uniukixieka 'axatepɨte'uyuri meta 'ahepaɨtsita. Yawé keneutawawiri kuuterixi mɨwakumaweriyakɨ.
Muitsexi wahetsie 'utanuaku, 8 Yawé mɨpaɨ katinitahɨawe:
—Kuu 'ɨkiyari keneutawewieka, kɨyetsie 'ateewa keneuyeteka. Kemɨ'ane mekukeiwatɨ kwimemixeiya mekanitawikweikuni.
9 Muitsexi kuu 'ɨkiyari purunitsekɨ 'utawewieka kɨyetsie 'ateewa kaniyeteni. Kemɨ'ane me'utikeiyaka kuu kwi memukuxexeiyakai meputawikweitsitɨariwakai.
Muhawi huyeyari
10 Hikɨ 'ixaheritsixi mekaniyekɨne 'Uwuti rakutewakaku mekanitiyaxe. 11 Manata 'Uwuti memɨyekɨ 'Iye-'Awarini rakutewakaku mekanitiyaxe makumawetsie, Muhawi 'aurie tau makayuyuipike hepatsie. 12 Manata memɨyekɨ mayeweritsie Tsereri mekanitiyaxe. 13 Manata memɨyekɨ haa 'Axinuni 'anutaɨye mekanitiyaxe, makumawetsie 'amuxeutsixi wakwietsie muyehane. Haa 'Axinuni manuyehane kani'inɨaritɨni muhawitsixi wakwie meta 'amuxeutsixi kwieyari manuye'atɨkatsie. 14 'Ayumieme puyuterɨwanɨa Yawé kemɨtiyutami xapayaritsie:
«Haramara Mɨxeta hepatsie, mayeweweritsie meta haa 'Axinuni.
15 Mayeweweri mukɨatsie 'akaniyeuka 'Axi
meta Muhawi kwieyari manuye'atɨkatsie».
16 Manata memɨyekɨ Wehexi paitɨ, putsu matinieretsie Yawé hakewa Muitsexi mɨpaɨ mɨtiutahɨawixɨ: «Yunaime teɨteri keniwarukuxeɨri ne nekaniwaharitɨamɨkɨ». 17 'Ana yameteyurietɨ 'ixaheritsixi mɨpaɨ mekateniukwika:
«Haa kehewatineni.
Putsu ke'utakwika.
18 Mɨkɨ putsu, te'aitamete yu'itsɨkɨ mepɨwati'inixɨ
mariwemekɨ memɨteyurie yu'itsɨkɨ memeiyepikɨ».
Makumawetsie memɨyekɨ Matana mekanekɨne, 19 Manata memɨyekɨ Nakarieri mekaniu'axɨani, Nakarieri memɨyekɨ Wamuti mekaniu'axɨani, 20 Wamuti memɨyekɨ Muhawi kwieyaritsie mayeweri mekaniu'axɨani, Pitsikaha hɨriyari manukatsie, Ketsimuni mautahekɨatsie makumawe.
Tsikuni kemɨra'iwarie
21 'Ixaheritsixi mekaniwarenɨ'ani texaxatamete Tsikuni hetsɨa, 'amuxeutsixi tiwa'aitɨwame, mɨpaɨ metehehɨawetɨ:
22 «Tepɨmatsiwawirie pemɨra'aitatsie temuyekɨnekɨ. Yurikɨ mɨpaɨ tepaitɨka hawaikɨ mɨra'etsietsie tepɨkaheuyekɨne meta putsuta tepɨkahetihareni. Huye 'amatayewa 'utɨa xeikɨa tepuyekɨne, kepaukake temanuyekɨne 'akwieyaritsie».
23 Peru Tsikuni pɨkawarupitɨa hakewa mɨra'aita 'ixaheritsixi memuyekɨnekekai. Matsi pɨta yukuyaxima kaniwarukuxeɨrieni watakwinike makumawetsie. Kepauka Yahatsa mɨye'a mekaniwarutiwiya. 24 Matsi 'ixaheritsixi mekaniwara'iwa wakwie mekaniwarunawairieni, haa 'Axinuni manuyekatsie ye'atɨkaime haa Kawuki manuye'axetsie ye'atɨkaime, 'amunitsixi wakwie mananiere, kwie 'aixɨa mɨrekukurarutɨiyarietsie paitɨ. 25 'Ixaheritsixi 'amuxeutsixi wakiekaritetsie mekaniye'axɨani, mana wakiekaritsie mekaniyukuhayeikawakaitɨni, metatsiere kiekari Hetsiwuni meta kiekarite 'auriena mamanetɨkateitsie. 26 Kiekari Hetsiwuni, Tsikuni kiekarieya 'amɨyewa kanihɨkɨtɨkaitɨni, 'amuxeutsixi tiwa'aitɨwame, meripaitɨ ti'aitame Muhawi kiekame mutamiekai, kwieya minawairiekai haa 'Axinuni manuyekatsie paitɨ ye'atɨkaime.
27 'Ayumieme niuki wewiwamete mɨpaɨ mekaniutiyuaneni:
«Ketsuwuni kiekariyaritsie xekenahu, Tsikuni kiekarieyatsie.
'Aixɨa xekeneuyuri. 'Aixɨa xekeneukuyuriexɨa.
28 Hetsiwuni kiekariyaritsie tai kanatineni,
Tsikuni kiekarieyatsie nerɨkwari kanatinexɨani.
Muhawi kiekariteya naime kaniutixɨtsitɨani
'Axinuni hatɨayari hɨriyari manuye'atɨka.
29 Muhawi 'ahetsiemieme xɨa'ui nepaine.
Pekani'uniniri, Kemuxi kiekarieya.
'Akakaɨyari 'aniwema kaniwareutaweiyaxɨani
'aniwema 'ukari Tsikuni paitɨ mɨwaranuhapanikɨ,
'amuxeutsixi tiwa'aitɨwame wahetsɨa.
30 »Yunaime tekanixe'uka'una,
Hetsiwuni ye'atɨkaime meta Riwuni paitɨ ye'akame.
Yunaime Nupa paitɨ tekanixe'uxɨrietɨkɨne,
tekanixe'uka'una Merewa paitɨ xeye'atɨkaime».
31 Mɨpaɨ mekateniuyaxe 'ixaheritsixi 'amuxeutsixi wakwieyaritsie.
'Uhuki Watsanitsie ti'aitame kemɨra'iwarie
32 Muitsexi katiniuta'aita kwie Katsexi memuxeiyayukɨ, 'ixaheritsixi kiekari mamanetɨka mekaniwarutakwini, 'amuxeutsixi mekaniwarutaweiya mana memɨkiekai. 33 Me'akunuaxɨaka, Watsani huyeyari mekaniuwiya. Mana ti'aitame 'Uhuki, Watsani kiekame kaniwaranukunake yukuyaxima warawitɨtɨ watakwinike 'Erurehi mɨrakutewatsie.
34 Hikɨ Yawé Muitsexi mɨpaɨ katiniutahɨawe: «Pepɨkawamakaka, 'Uhuki nekanixeyetuiriemɨkɨ kuyaximama, meta kwieya naime. Tsikuni kepemeyuri 'amuxeutsixi tiwa'aitɨwame Hetsiwuni kiekame mɨpaɨta pekatiniyurimɨkɨ».
35 Mɨpaɨ mekatenimieni 'ixaheritsixi 'Uhuki ti'aitame meta niwemama, kuyaximama, nixeime mepɨka'uhayewaxɨ 'ayeniereme, mɨpaɨ kwie mekatena'iwa.